DANIELE 5

₁Kgosi Belešasare a direla bagolwane ba gagwe ba 1 000 modiro o mogolo, mme a nwa bojalwa jwa mofine fa pele ga ba ba 1 000 bao. ₂Belešasare a re a sa ntse a leka bojalwa jwa mofine, a laola gore ba lere dijana tsa gouta le tsa selefera tse Nebukatenesare rraagwe o kileng a di gapa mo tempeleng kwa Jerusalema; gore kgosi le bagolwane ba yone, le basadi ba yone, le bagadingwana ba yone, ba nwele mo go tsone. ₃Foo ba lere dijana tsa gouta tse di gapilweng mo tempeleng ya ntlo ya Modimo e e kwa Jerusalema; mme kgosi le bagolwane ba yone, le basadi ba yone, le bagadingwana ba yone, ba nwela mo go tsone. ₄Ba nwa bojalwa jwa mofine, mme ba baka medimo ya gouta, le ya selefera, le ya kgotlho, le ya tshipi, le ya logong, le ya lentswe.

₅Ya re ka lone lobaka loo fela ga tswa menwana ya seatla sa motho, mme ya kwala bolebana le setlhomo sa lobone mo bodilong jwa lomota lwa ntlo ya kgosi; mme kgosi ya bona ntlha ya seatla se se kwalang. ₆Foo sefatlhogo sa kgosi sa khwata, megopolo ya yone ya e hudua; malokololo a dinoka tsa yone a repa, le mangole a yone a ntaana. ₇Kgosi ya goa ka thata, gore ba lere dingaka, le Bakalatea, le baloi. Kgosi ya bua ya raya banna ba ba botlhale ba Babilone ya re: “Le fa e le mang yo o tlaa balang lokwalo lo, mme a ntshupetsa phuthololo ya lone, o tlaa apesiwa bohibidu jo bo mokgona, o tlaa apara mpolokwane wa gouta mo thamong, mme o tlaa nna molaodi wa boraro mo bogosing.” ₈Foo ga tsena babotlhale botlhe ba kgosi, mme ba retelelwa ke go bala lokwalo, le fa e le go itsise kgosi phuthololo ya lone. ₉Foo kgosi Belešasare a khidiega thata, mme sefatlhogo sa gagwe sa khwata, le bagolwane ba gagwe ba tseana.

₁₀Jaana mohumagadi wa kgosi, a tsena mo ntlong ya modiro ka ntlha ya mafoko a kgosi, le bagolwane ba yone; mohumagadi a bua, a re: “A kgosi e tshele ka bosakhutleng; a megopolo ya gago e se go khidie, a sefatlhogo sa gago se se khwate. ₁₁Go na le monna mongwe mo bogosing jwa gago, yo mowa wa medimo e e itshepileng o mo go ene; mme e rile mo metlheng ya ga rraago ga fitlhelwa mo go ene lesedi, le tlhaloganyo, le botlhale jo bo tshwanang le botlhale jwa medimo; mme kgosi Nebukatenesare rraago, ka re, kgosi rraago, a mo dira mogolo wa baitseanape le dingaka, le Bakalatea, le baloi; ₁₂ka gonne ga fitlhelwa mo go ene Daniele yoo mowa o o dimang, le kitso, le tlhaloganyo, le phuthololo ya ditoro, le go lepolola dinyoba tse di boteng, le go tlosa dikakabalo, yo kgosi ya mo raya leina ya re: Beletešasare. Mme jaana a Daniele a ye go bidiwa, mme o tlaa supa phuthololo.”

₁₃Foo Daniele a leriwe fa pele ga kgosi. Kgosi ya bua ya raya Daniele ya re: “A ke wena Daniele, wa bana ba botshwaro jwa Juta, ba kgosi rre o ne a ba tsaya kwa Juta? ₁₄Ke utlwile ka ga gago, fa mowa wa medimo o mo go wena, le go re go fitlhelwa mo go wena lesedi, le tlhaloganyo, le botlhale jo bo feteletseng. ₁₅Mme jaana babotlhale, le dingaka ba lerilwe fa pele ga me, gore ba tle go bala lokwalo lo, le go nkitsise phuthololo ya lone; mme ba reteletswe ke go supa phuthololo ya selo se. ₁₆Ke utlwile ka ga gago fa o ka ntsha diphuthololo, o ba o lepolola dikakabatso; jaana fa o ka bala lokwalo wa ba wa nkitsise phuthololo ya lone, o tlaa apesiwa bohibidu jo bo mokgona, o tlaa apara mpolokwane wa gouta mo thamong, o ba o nna molaodi wa boraro mo bogosing.”

₁₇Foo Daniele a fetola a bua fa pele ga kgosi, a re: “A dineo tsa gago e nne tsa gago, mme o neye o sele dituelo tsa gago; le fa go ntse jalo ke tlaa balela kgosi lokwalo, ke ba ke e itsise phuthololo.

₁₈“Kgosi, aitse Modimo wa Mogodimodimo o kile wa naya Nebukatenesare rraago bogosi, le bogolo, le kgalalelo, le borena. ₁₉Ya re ka ntlha ya bogolo jo o bo mo neileng, batho botlhe ba ditšhaba, le ba merafe, le ba dipuo ba roroma, ba boifa fa pele ga gagwe, a bolaya ba o ratang go ba bolaya, a rekegela ba o ratang go ba rekegela; a godisa ba o ratang go ba godisa, mme a isa tlase ba o ratang go ba baya tlase. ₂₀Mme e rile pelo ya gagwe e goletsegile, le mowa wa gagwe o thatafetse a ba a tla a dira ka bokaka, a pagololwa mo setulong sa gagwe sa bogosi, mme ba mo tseela kgalalelo ya gagwe. ₂₁A lelekwa mo baneng ba batho; pelo ya gagwe ya ediwa ya diphologolo, le boago jwa gagwe jwa nna mo dieseleng tsa naga; a hudisiwa bojang jaaka dikgomo, mmele wa gagwe wa kolobediwa ke monyo wa legodimo; ga tsamaya a itse fa Modimo o o Mogodimodimo o busa mo bogosing jwa batho, le go re, o bo laodisa mongwe fela yo o mo ratang.

₂₂“Mme wena Belešasare morwawe, ga o a ikokobetsa pelo, le fa o ne o itsile dilo tsotlhe tse. ₂₃O ikgodiseditse Morena wa legodimo; mme ba lerile dijana tsa ntlo ya gagwe fa pele ga gago, mme wena, le bagolwane ba gago, le basadi ba gago, le bagadingwana ba gago lo nwetse bojalwa jwa mofine mo go tsone; o bakile medimo ya selefera, ya gouta, ya kgotlho, ya tshipi, ya logong le ya lentswe, e e sa boneng, e e sa utlweng, e e sa itseng; mme Modimo o go hema ga gago go leng mo seatleng sa one, le o ditsela tsotlhe tsa gago di leng tsa one, ga o a o galaletsa. ₂₄Foo ntlha nngwe ya seatla ya rongwa e tswa fa pele ga one, mme ga kwalwa lokwalo lo.

₂₅“Lokwalo lo lo kwadilweng ke lo, ga twe: ‘MENE, MENE, TEKELE, UFARESINE.’ ₂₆Phuthololo ya selo se ke e: MENE: Modimo o sekaseka bogosi jwa gago, mme o bo khutlisitse. ₂₇TEKELE: O lekantswe mo dilekanyong tsa pego, mme o fitlhetswe o tlhaetse. ₂₈PERESE: Bogosi jwa gago bo kgaogantswe, mme bo neilwe Bamete le Baperesia.”

₂₉Foo Belešasare a laola, mme ba apesa Daniele bohibidu jo bo mokgona, ba baya mpolokwane wa gouta mo thamong ya gagwe, ba kua ka ga gagwe, ba re: “Ke ene molaodi wa boraro mo bogosing.” ₃₀E rile mo bosigong joo fela Belešasare kgosi ya seKalatea a bolawa. ₃₁Mme Dario wa Momete a tsaya bogosi, a le dinyaga e ka ne e le 62.