Bogolo jwa ga Jehofa
1“Ke gone o rate Jehofa Modimo wa gago, mme o tshegetse taolelo ya gagwe, le ditao tsa gagwe, dikatlholo tsa gagwe, le ditaolo tsa gagwe ka metlha yotlhe. 2Lo bo lo itse gompieno, gonne ga ke bue le bana ba lona, ba ba se kang ba itse, ba se ka ba bona kwatlhao ya Jehofa Modimo wa gago, le bogolo jwa gagwe, le lesogo la gagwe le le nonofileng, le letsogo la gagwe le le otlologileng. 3Le ditshupo tsa gagwe, le ditiro tsa gagwe tse o ne a di mo gare ga Egepto, mo go Faro kgosi ya Epepeto, le mo lefatsheng lotlhe la gagwe; 4le se o ne a se direla ntwa ya Egepeto, dipitse tsa bone le dikara tsa bne tsa tlhabano; jaaka a ba ribegeditse ka metsi a Lewatle le Lehibidu fa ba ne ba lo konatelela, le jaaka Jehofa a ba sentse, nako e sa le eno; 5le se o se lo diretseng mo nageng, ga tsamaya lwa tla mo felong fano; 6le se o ne a se direla Dathane le Abirame, bomorwa Eliabe, morwa Rubene; jaaka lefatshe le ne la atlhamologa legano, la ba kometsa, le ba matlo a bone, le megope ya bone, le sengwe le sengwe se se tshedileng se se ba setseng morago, mo gare ga Baiseraele botlhe. 7Matlho a lona a bonye tiro yotlhe e kgolo ya ga Jehofa, e o ne a e dira.
Masego a lefatshe la tsholofetso
8“Ke gone tshegetsang taolo yotlhe e ke e lo laolelang gompieno, gore lo nne thata, lo tsene lo ye go rua lefatshe le lo kgabaganyetsang kwa go lone go le rua; 9le gore lo lelefatse malatsi a lona mo lefatsheng le, le Jehofa o ne a le ikanela borra ba lona go le ba naya le losika lwa lwa bone, lefatshe le le elang maši le dinotshe. 10Gonne lefatshe le o yang kwa go lone o ya go le rua, ga le a nna jaaka lefatshe la Egepeto, le lo duleng kwa go lone, kwa o ne wa jala peo ya gago, wa e nosa ka lonao lwa gago, jaaka tshimo ya merogo. 11Lefatshe le lo kgabaganyetsang kwa go lone go le rua, ke lefatshe la makgabana le mekgatšha, mme le nwa metsi a pula ya legodimo. 12Ke lefatshe le Jehofa Modimo wa gago o le tlamelang; matlho a ga Jehofa Modimo wa gago a mo go lone ka metlha yotlhe, go tswa tshimologong ya ngwaga go ya bokhutlong jwa ngwaga.
13“Go tlaa dirala gore, e tlaa re fa lo reetsa ditaolo tsa me ka tlhoafalo, tse ke di lo laolelang gompieno, go rata Jehofa Modimo wa lona, le go mo direla ka pelo yotlhe ya lona, le ka mowa otlhe wa lona, 14ke tlaa nesa pula ya lefatshe la lona mo lobakeng lwa yone, pula ya sephai, le pula ya kgogolamoko, gore o tle o rore mabele a gago, le bojalwa jwa gago jwa mofine, le lookwane lwa gago. 15Ke tlaa tlhogisetsa dikgomo tsa gago bojang mo nageng ya gago, mme o tlaa ja o kgora. 16Lo itise, gore dipelo tsa lona di se ka tsa tsietsega, lwa fapoga, lwa direla medimo e sele, lwa e obamela; 17mme bogale jwa ga Jehofa jwa lo tukela, mme a tswala legodimo, gore pula e tlhokafale, le gore lefatshe le se ntshe maungo a lone; mme lwa swa ka bonako lo tswa mo lefatsheng le le molemo, le Jehofa o le lo nayang.
18“Ke gone bolokang mafoko a, a me, mo pelong ya lona, le mo moweng wa lona; lo a bofelele mo diatleng tsa lona go nna sesupo, a nne sebeo sa fa gare ga matlho a lona. 19Lo a rute bana ba lona, lo bue ka ga one, fa o dutse mo ntlong ya gago, le fa o tsamaya mo tseleng, le fa o rapame, le fa o rapamologa.
20“O a kwale mo mephakwaneng ya mejako ya ntlo ya gago, le mo dikgorong tsa gago; 21gore malatsi a lona a ntsifadiwe le malatsi a bana ba lona mo lefatsheng le Jehofa o le ikanetseng borra ba lona go le ba naya, jaaka malatsi a magodimo kwa godimo ga lefatshe.
22“Gonne fa lo tshegetsa ka tlhoafalo taolo e yotlhe e ke e lo laolelang, go e dira; go rata Jehofa Modimo wa lona, go tsamaya mo ditseleng tsotlhe tsa gagwe, le go mo ngaparela; 23foo Jehofa o tlaa lelekela merafe yotlhe e fa pele ga lona, mme lo tlaa rua merafe e megolo, e e nonofileng bogolo go lona. 24Gongwe le gongwe fa pato ya lonao lwa lona e tlaa gatang gone go tlaa nna ga lona, go tswa nageng fela, le Lebanone, go tswa kwa nokeng, noka ya Euferatese, go ya fela lewatleng le le kwa bophirimatsatsi, e tlaa nna molelwane wa lona. 25Ga go ketla go nonofa monna ope go ema fa pele ga lona; Jehofa Modimo wa lona o tlaa baya go boitshega le go tshabega ga lona mo lefatsheng lotlhe le lo tlaa le gatang, jaaka a buile le lona.
26“Bonang, gompieno ke baya tshegofatso le phutso fa pele ga lona: 27Tshegofatso, fa lo ka reetsa ditaolo tsa ga Jehofa Modimo wa lona, tse ke di lo laolelang gompieno; 28le phutso, fa lo gana go reetsa ditaolo tsa ga Jehofa Modimo wa lona, mme lo fapoga tsela e ke e le laolelang gompieno, go ya go sala medimo e sele morago, e lo iseng lo e itse. 29E tlaa re Jehofa Modimo wa gago a go fitlhisitse mo lefatsheng le o yang go le rua, o beye tshegofatso mo thabeng ya Gerisime, le phutso mo thabeng ya Ebale. 30A ga di kwa moseja ga Joretane, di potile tsela ya bophirimatsatsi ka kwa morago mo lefatsheng la Bakanana ba ba agileng mo Areba, bolegagana le Gilegale, fa maokeng a More? 31Gonne lo na le go kgabaganya Joretane lo ya go tsena lo rua lefatshe le Jehofa Modimo wa lona o le lo nayang, mme lo tlaa le rua, lo aga mo go lone. 32Lo tlhokomele go dira ditao tsotlhe le dikatlholo tse ke di bayang fa pele ga lona gompieno.
