DUTERONOME 19

₁“E tlaa re Jehofa Modimo wa gago a kgaola merafe e lefatshe la yone o le go nayang, mme o le rua mo boemong jwa yone, o aga mo metseng ya yone le, mo matlong a yone, ₂o itomololele metse e le meraro mo lefatsheng la gago le Jehofa Modimo wa gago o le go nayang go le rua. ₃O ipaakanyetse tsela, le melelwane ya lefatshe la gago, le Jehofa Modimo wa gago o le go ruisang, o le kgaoganye seraro, gore mmolai wa motho mongwe le mongwe a tshabele gone. ₄Jo ke jone boemo jwa mmolai wa motho, yo o tlaa tshabelang gone, mme a tshele: le fa e le mang yo o bolayang wa ga gabo a sa itse, a sa mo ila gale, ₅jaaka fa motho a ya kwa sekgweng a na le wa ga gabo, ba ya go rema dikgong, a bo a re o rema setlhare ka selepe, tshipi ya selepe ya somoga, ya tlolela mo go wa ga gabo, mme a swa; a a tshabele kwa go mongwe wa metse e meraro, mme a tshele; ₆e se re kgotsa mmusolosi wa madi a konatelela mmolai wa motho, pelo ya gagwe e sa ntse e gotetse, mme a mo tshwara ka tsela e telele, a mo itaya a swa, e tswa a sa tshwanelwa ke loso ka a ne a sa mo ile gale. ₇Ke gone ka moo ke go laolang, ka re: O itomololele metse e le meraro.

₈“E tlaa re fa Jehofa Modimo wa gago a atlhamolosa molelwane wa gago, jaaka a ikanetse borraeno, mme a go naya lefatshe lotlhe le o ne a le solofeditse borraeno fa a tlaa le ba naya, ₉fa o tshegetsa taolo e yotlhe go e dira, e ke e go laolelang gompieno, go rata Jehofa Modimo wa gago, le go sepela ka metlha yotlhe mo ditseleng tsa gagwe, foo o tlaa ikokeletsa ka metse e mengwe e le meraro kwa ntle ga e meraro eo, ₁₀gore madi a a se nang molato a se ka a tshololwa mo gare ga lefatshe la gago le Jehofa Modimo wa gago o le go nayang boswa, jalo molato wa madi wa nna mo go wena.

₁₁“Mme fa motho mongwe a ila wa ga gabo, mme a mo lalela, a mo nanogela, a mo itaya a swa; fa a tshabela kwa go mongwe wa metse eo, ₁₂foo bagolwane ba motse wa gagwe ba rome ba ye go mo lere, ba mo neele mmusolosi wa madi, gore a swe. ₁₃Leitlho la gago le se mo utlwele botlhoko; o tlose madi a a se nang molato mo go Iseraele, gore go tle go ye sentle nao.

₁₄“O se ka wa katosa molelwane wa motho wa gaeno, o bagologolo ba o tlhomileng mo bosweng jwa gago, jo o tlaa bo ruang mo lefatsheng le Jehofa Modimo wa gago o le go nayang go le rua.

₁₅“Mosupi a le mongwe fela a a se tsogele motho ka ga boikepo bongwe, kgotsa ka ga boleo bongwe, mo boleong bongwe jo o bo leofang; a sengwe sa kgang se atlholwe ka molomo wa basupi ba le babedi, kgotsa ka molomo wa basupi ba le bararo. ₁₆E re fa mosupi yo o sa siamang a ka tsogela motho go supa tshiamololo ka ga gagwe; ₁₇foo banna bao boo babedi, ba kgang e mo go bone, ba eme fa pele ga Jehofa, fa pele ga baperesiti le baatlhodi ba lobaka loo; ₁₈baatlhodi ba tlhotlhomise ka tlhoafalo, mme fa ba fitlhela mosupi e le wa maaka, a pateleditse ngwana a rraagwe, ₁₉foo lo mo direle jaaka a ne a gopotse go direla ngwana wa ga rraagwe; jalo o tlaa bo o tlosa bosula mo gare ga gago. ₂₀Ba ba salang ba tlaa utlwa ba boifa, mme ga ba ketla ba tlhola ba dira bosula jo bo ntseng jalo mo gare ga gago. ₂₁Leitlho la gago a le se utlwele botlhoko; botshelo bo tswelwe ke botshelo, leitlho ke leitlho, leino ke leino, seatla ke seatla, lonao ke lonao.