DUTERONOME 25

₁“E re fa go na le kgang mo banneng, mme ba ya katlholong, mme baatlhodi ba ba atlhola; foo a ba siamisetse mosiami, mosiamolodi ba mo sekise; ₂fa mosiamolodi a tshwanetse go bediwa, moatlhodi a laole gore a kgwathe, a bediwe fa pele ga matlho a gagwe, palo ya dithupa e le ka fa tshiamololong ya gagwe. ₃O ka mmaya dithupa di le 40, mme a se ka a di fetisa, gonne fa a fetisa, mme a mmaya dithupa di le dintsi tse di fetang tseo, foo ngwana wa ga rraago o ka tla a kaiwa selo fela mo go wena.

₄“O se ka wa bofa kgomo molomo fa e photha mabele.

₅“Fa bana ba monna ba agile mmogo, mongwe wa bone a swa, mme a se na ngwana wa mosimane, mosadi wa moswi a se ka a nyalelwa kwa ntle ke moeng; a morwa rra monna wa gagwe a tsene kwa go ene, a mo tseye go nna mosadi, a mo direle tshwanelo ya morwa rra monna. ₆Ngwana yo o tlaa mo tsalang pele, a tsalelwe leina la ga morwa rraagwe yo o suleng, gore leina la gagwe le se ka la phimoga mo Iseraele. ₇Fa monna yoo a sa rate go tsaya mosadi wa ga morwa rraagwe, foo mosadi wa ga morwa rraagwe a ye kwa bagolong kwa kgotleng ya motse, a re: ‘Morwa rra monna wa me o gana go tsosetsa morwa rraagwe leina mo go Iseraele, o gana go ntirela tshwanelo ya morwa rra monna wa me.’ ₈Foo a bagolwane ba motse ba mmitse, ba bue nae; fa a ema, a re: ‘Ga ke rate go mo tsaya;’ ₉foo mosadi wa morwa rra monna wa gagwe a ye kwa go ene fa pele ga bagolo a mo role setlhako, a mo kgwele mathe mo sefatlhogong mme a mo fetole a re: ‘A go direlwe jalo monna yo o sa ageng ntlo ya ga morwa rraagwe.’ ₁₀Leina la gagwe monna le bidiwe mo Iseraele, go twe: ‘Ntlo ya yo o rotsweng setlhako.’

₁₁“E re fa banna ba lwa mmogo, mme mosadi wa yo mongwe a atamela a tla go golola monna wa gagwe mo seatleng sa yo o mo itayang, mme a ntsha letsogo a mo gamutla ka lepele; ₁₂foo o kgaole mosadi letsogo; leitlho la gago le se ka la mo utlwela botlhoko gope.

₁₃“O se ka wa nna le di lekanya bokete tse di mefuta mebedi e e fapaanyeng mo kgetseng ya gago, tse dikgolo le tse dinnye. ₁₄O se ka wa dira le dielo tse di fapaanyeng mo ntlong ya gago, tse dikgolo le tse dinnye. ₁₅O nne le sebokete se se lekanyang se se itekanetseng, se se siameng; o bo o nne le seelo se se itekanetseng, se se siameng; gore malatsi a gago a nne maleele mo lefatsheng le Jehofa Modimo wa gago o le go nayang. ₁₆Gonne botlhe ba ba dirang dilo tse di ntseng jalo, e bong botlhe ba ba dirang ka tshiamololo, ba makgapha mo go Jehofa Modimo wa gago.

₁₇“Gakologelwa se Amaleke o se go diretseng mo tseleng fa lo tswa kwa Egepeto; ₁₈ka fa o ne a go kgatlhantsha mo tseleng ka gone, a go bolaela ba ba kwa morago, botlhe ba ba bokoa fa morago ga gago, ka o ne o lapile o tsenywe ke letsapa; a se ka a boifa Modimo. ₁₉Ke gone a e re Jehofa Modimo wa gago a sena go go naya boikhutso mo babeng botlhe ba gago mo tikologong, mo lefatsheng le Jehofa Modimo wa gago o le go nayang go nna boswa go le rua, o phimolele ruri kgakologelo ya ga Amaleke fa tlase ga legodimo; o se ka wa lebala.