Maano a ga Hamane a go bolaya Bajuta
1Morago ga dilo tse kgosi Ahasueruse a goletsa Hamane morwa Hametathe wa Moagage, a mo isa kwa pele, a baya setulo sa gagwe godimo ga dikgosana tsotlhe tse o nang natso. 2Batlhanka botlhe ba kgosi, ba ba mo kgorong ya kgosi ba ikoba, ba tlotla Hamane gonne kgosi e laotse jalo ka ga gagwe. Mme Moretekai a se ka a ikoba a ba a se ka a mo tlotla.
3Foo batlhanka ba kgosi, ba ba mo kgorong ya kgosi, ba raya Moretekai ba re: “Ana o tlolelang taolo ya kgosi?” 4Ga dirala ya re ba ntse ba bua nae ka malatsi otlhe, mme a se ka a ba reetsa, ba bolelela Hamane gore ba tle ba bone boo mafoko a ga Moretekai a tlaa ema; gonne o na a ba boleletse fa a le Mojuta.
5E rile Hamane a bona fa Moretekai a sa ikobe, le fa e le go mo tlotla, foo Hamane a tlala bogale. 6Mme a nyatsa go tsenya Moretekai a le esi diatla; gonne ba ne ba mmoleletse batho ba ga gabo Moretekai; ke gone ka moo Hamane a leka go senya Bajuta botlhe go ya le bogosi jotlhe jwa ga Ahasueruse, e bong batho ba ga gabo Moretekai.
7E rile ka kgwedi ya ntlha, e e leng kgwedi ya Nisane, ka ngwaga wa 12 wa ga kgosi Ahasueruse, ba thela Pure, ke go re bola, fa pele ga Hamane ka malatsi otlhe, le ka dikgwedi tsotlhe, go ya kgweding ya 12, e e leng kgwedi ya Atare.
8Mme Hamane a raya kgosi Ahasueruse a re: “Go na le tšhaba nngwe e e faletseng, e kgaoganye kgaoganye mo ditšhabeng mo mafatsheng otlhe a bogosi jwa gago; mme melao ya bone e tshwanologile le melao ya ditšhaba tse dingwe tsotlhe fela; le gone ga ba tshegetse ditaolo tsa kgosi; ke gone ka moo ga go a tshwanela kgosi go ba leseletsa. 9Fa go ka kgatlha kgosi, a go kwalwe gore ba senngwe, mme nna ke tlaa tsenya dikilokerama tse di fetang 340 000 tsa selefera mo diatleng tsa ba ba laolang tiro e, ya kgosi, go tla ba e lere mo dipolokelong tsa dikhumo tsa kgosi.”
10Kgosi ya somola lenyena mo seatlang sa yone, ya le naya Hamane morwa Hametathe wa Moagage; mmaba wa Bajuta. 11Kgosi ya raya Hamane ya re: “Selefera se neilwe wena, le bone batho, go dira ka bone ka fa o bonang go le molemo ka teng.”
12Foo bakwaledi ba kgosi ba bidiwa ka kgwedi ya ntlha, ka letsatsi la 13 la yone; mme ga kwalwa ka fa go tsotlhe tse Hamane o di laoletseng balaodisiwa ba kgosi ka gone, le balaodi ba ba laolang mo kgaolong nngwe le nngwe ya lefatshe, le magosana a sešaba sengwe le sengwe kgaolo nngwe le nngwe ya lefatshe ka fa go kwaleng ga yone, le sešaba sengwe le sengwe ka fa puong ya sone; lo no lwa kwalwa mo ineng la kgosi Ahasueruse, lwa kanwa ka lenyena la kgosi. 13Dikwalo tsa isiwa ke batsamaisi ba dikwalo kwa dikgaolong tsotlhe tsa mafatshe otlhe a kgosi, go senya, le go bolaya, le go nyeletsa Bajuta botlhe, makau le batsofe, banyana le basadi, ka letsatsi le le lengwe fela, e bong ka tsatsi la 12 la kgwedi ya 12, e e leng kgwedi ya Atare, le gore go gapiwe dilo tsa bone. 14Malebela a lokwalo a na a itsisiwe ditšhaba tsotlhe, gore taolo eo e bolelwe mo kgaolong nngwe le nngwe ya lefatshe gore ditšhaba di ipaakanyetse letsatsi leo.
15Batsamaisi ba dikwalo ba tsamaya ba potlakisiwa ke taolo ya kgosi, mme molao wa tlhongwa mo Shušane motse wa kgosi. Kgosi le Hamane ba dula ba nwa; motse wa Shušane one wa tseakana fela.
