ESETHERE 7

₁Jalo kgosi ya tla e na le Hamane go ja modiro le Esethere mohumagadi. ₂Mme kgosi ya fela e raya Esethere gape ka tsatsi la bobedi mo modirong wa bojalwa jwa mofine, e re: “Ana thapelo ya gago ke eng mohumagadi Esethere? O tlaa e newa; topo ya gago ke eng? Le fa e ka bo e le bontlhanngwe jwa bogosi go tlaa dirafadiwa.”

₃Foo Esethere mohumagadi a fetola a re: “Fa ke bonye botsalano mo matlhong a gago, kgosi, fa go ka kgatlha kgosi, a nke ke newe botshelo jwa me ka thapelo ya me, le batho ba gaetsho ka topo ya me. ₄Gonne re rekisitswe, nna le batho ba gaetsho, go tla re senngwa, re bolawa, re be re nyelela. Fa re kabo re ne re rekisitswe go tla re nna batlhanka le malata fela, nka bo ke didimetse fela, le fa mmaba a ne a tlaa retelelwa ke go emele tshenyegelo ya kgosi.”

₅Foo ga bua kgosi Ahasueruse a raya Esethere mohumagadi a re: “Ke mang, mme o kae motho yo o iketleeditseng go gopola mo pelong ya gagwe go dira jalo?”

₆Esethere a re: “Ke moganetsi le mmaba, e bong Hamane yo wa moloi yo.” Foo Hamane a boifa fa pele ga kgosi le mohumagadi. ₇Kgosi ya nanoga ka bogale jwa yone mo modirong wa bojalwa jwa mofine, ya ya mo tshimong ya motse wa kgosi; mme Hamane, a ema a re o lopa botshelo jwa gagwe mo go Esethere mohumagadi; gonne a bona fa bosula bo laotswe ka ga gagwe ke kgosi.

₈Foo kgosi ya boa kwa tshimong ya motse wa kgosi, ya boela mo felong ga modiro wa bojalwa jwa mofine; Hamane a bo a wetse mo sesekamelong se Esethere o mo go sone. Foo kgosi ya re: “A o betelela le ene mohumagadi fa pele ga me mo ntlong?” Ya re lefoko le sa ntse le tswa mo molomong wa kgosi boo ba khurumetsa Hamane sefatlhogo. ₉Foo ga bua Harebona, mongwe wa baopafadiwa ba ba fa pele ga kgosi, a re: “Bonang, le sone sefata sa polaelo se se bogodimo jwa dimetara di le 22, se Hamane o se baakanyeditseng Moretekai yo o ne a bua molemo ka ga kgosi, se eme mo ntlong ya ga Hamane.” Mme kgosi ya re: “Mo pegeng mo go sone.” ₁₀Jalo ba pega Hamane mo sefateng sa polaelo se o ne a se baakanyeditse Moretekai. Foo bogale jwa kgosi jwa kokobela.