Baiseraele ba kgabaganya Lewatle le Lehibidu
1Jehofa a bua le Moše a re: 2“Bua le bana ba Iseraele gore ba boele kwa morago ba ye go thibelela fa pele ga Pihahirothe fa gare ga Migetole le lewatle, fa pele ga Baalesefone; lo tlaa thibelela go lebagana nago fa lewatleng. 3Faro o tlaa ithaya ka ga bana ba Iseraele, a re: ‘Ba kgweleilwe ke lefatshe, ba kaletswe ke naga fela.’ 4Ke tlaa thatafatsa pelo ya ga Faro, o tla ba latelela, mme ke tlaa inaya tlotlo ka Faro le ka ntwa yotlhe ya gagwe; Baegepeto ba tlaa itse fa ke le Jehofa.” Ba dira jalo.
5Ga bolelelwa kgosi ya Egepeto fa batho ba tshabile; pelo ya ga Faro le tsa batlhanka ba gagwe tsa fetoga ka ga batho, ba re: “Ke eng se re se dirileng fa e bo ne ne re lesitse Iseraele a tswa mo go re direleng?” 6A baakanya kara ya gagwe, a tsaya batlhabani ba gagwe. 7A tsaya dikara tse di tlhophegileng di le 600, le dikara tsotlhe tsa Egepeto, le balaodi botlhe ba tsone. 8Jehofa a thatafatsa pelo ya ga Faro kgosi ya Egepeto, mme a konatelela bana ba Iseraele; gonne bana ba Iseraele ba ne ba dule ka letsogo le le tsholetsegileng. 9Baegepeto ba ba konatelela ka dipitse le dikara tsa ga Faro tsotlhe fela, le bapalami ba dipitse ba gagwe, le ntwa ya gagwe, ba fitlha ba thibelela fa lewatleng fa Pihahirothe, go lebagana le Baalesefone.
10E rile Faro a atamela, bana ba Iseraele ba tsholetsa matlho a bone, mme bonang, Baegepeto ba bo ba tla kwa go bone; mme ba boifa thata; bana ba Iseraele ba goela kwa go Jehofa. 11Ba raya Moše ba re: “A e ne e le ka gobo go se na diphupu kwa Egepeto, fa e bo ne ne e le fano o re tlositse gone re tla go swela mo nageng? Ana o ne o re direlelang jalo wa re ntsha kwa Egepeto? 12A ga se lone lefoko le re le buileng nao re le mo Egepeto ra re: ‘Re lese gore re direle Baegepeto’? Gonne go ne go le molemo mo go rona go direla Baegepeto bogolo go go swela mo nageng jaana.”
13Moše a raya batho a re: “Se boifeng, emang fela lo bone poloka ya ga Jehofa, e o tlaa e lo direlang gompieno, gonne Baegepeto ba lo ba bonyeng gompieno, ga lo ketla lo tlhola lo ba bona gope ka bosakhutleng. 14Jehofa o tlaa lo tlhabanela, mme lona lo tlaa didimala fela.”
15Jehofa a raya Moše a re: “Ana, o goelelang kwa go nna? Bua le bana ba Iseraele gore ba tswelele pele. 16Wena o tsholetse thobane ya gago o otlololele lewatle letsogo la gago o le tsetsereganye; bana ba Iseraele ba tlaa tsena mo gare ga lewatle ba gata lefatshe le le omeletseng. 17Nna, bona, ke tlaa thatafatsa dipelo tsa Baegepeto, ba tlaa ba sala morago ba tsena mo teng: ke tlaa inaya tlotlo ka Faro le ka ntwa yotlhe ya gagwe; mo dikareng tsa gagwe le mo bapalaming ba dipitse ba gagwe. 18Baegepeto ba tlaa itse fa ke le Jehofa motlhang ke inayang tlotlo ka Faro, ka dikara tsa gagwe le bapalami ba dipitse ba gagwe.” 19Moengele wa Modimo yo o ntseng a eteletse khuduga ya Iseraele pele, a huduga a ya a ba pota ka kwa morago; le mosipuri wa leru wa huduga fa pele ga bone, wa ema fa morago ga bone. 20Wa nna fa gare ga khuduga ya Egepeto le khuduga ya Iseraele; go bo go le leru le lefifi, le fa go ntshe jalo la sedifatsa mo bosigong; mme khuduga e nngwe ga e a ka ya atamela e nngwe bosigo jotlhe.
21Moše a otlololela lewatle letsogo la gagwe; mme Jehofa a busa lewatle ka morago bosigo jotlhe, ka phefo e e thata ya botlhabatsatsi, a dira lewatle lefatshe le le omeletseng, mme metsi a bo a tsetsereganye. 22Bana ba Iseraele ba tsena mo gare ga lewatle ba gata lefatshe le le omeletseng; metsi a bo a le lomota ka fa ntlheng ya letsogo le legolo, le la molema. 23Baegepeto ba ba konatelela, ba ba sala morago ba tsena mo gare ga lewatle, dipitse tsotlhe tsa ga Faro le dikara tsa gagwe, le bapalami ba dipitse ba gagwe. 24Ga diragala ya re ka tiso ya makuku, Jehofa a okomela ntwa ya Baegepeto a le mo teng ga mosipuri wa molelo le wa leru, mme a nyerisa ntswa ya Baegepeto marapo. 25A somola maoto a dikara tsa bone, ga nna thata go di kgweetsa, Baegepeto ba bo ba re: “A re tshabeng sefatlhogo sa ga Iseraele, gonne Jehofa o a ba tlhabanela, o tlhabana le Baegepeto.”
26Jehofa a raya Moše a re: “Otlololela lewatle letsogo la gago gore metsi a boye a tle godimo ga Baegepeto, le mo dikareng tsa bone, le mo bapalaming ba dipitse ba bone.” 27Moše a otlololela lewatlhe letsogo la gagwe, mme ya re bosigo boo sa lewatle la boela mo thateng ya lone; Baegepeto ba tshaba ba tlhabaganye nalo; Jehofa a ribegetsa Baegepeto mo gare ga lewatle. 28Metsi a boa a khurumetsa dikara, le bapalami ba dipitse, e bong ntwa yotlhe ya ga Faro e e ba setseng morago e tsenye mo lewatleng; ga se ka ga sala le fa e le yo mongwe fela wa bone. 29Bana ba Iseraele ba tsamaya lefatshe le le omeletseng mo gare ga lewatle; metsi a bo a ntse lomota mo go bone ka fa ntlheng ya le legolo le la molema.
30Jalo Jehofa a golola Iseraele ka tsatsi leo mo seatleng sa Baegepeto; mme Iseraele a bona Baegepeto ba swetse fela fa dintshing tsa lewatle. 31Iseraele a bona tiro e kgolo e Jehofa o e dirileng mo go Baegepeto; mme batho ba boifa Jehofa, ba dumela mo go Jehofa le mo go Moše motlhanka wa gagwe.
