Mana le makutikweo
1Ba tloga ba tswa mo Elime, mme phuthego yotlhe ya bana ba Iseraele ya fitlha mo nageng ya Sine e e fa gare ga Elime le Sinai, e le ka letsatsi la 15 la kgwedi ya bobedi morago ga ba sena go tswa mo lefatsheng la Egepeto. 2Phuthego yotlhe ya bana ba Iseraele ya ngongoregela Moše le Arone mo nageng. 3Bana ba Iseraele ba ba raya ba re: “A bo re ka bo re swetse kwa lefatsheng la Egepeto ra bolawa ke seatla sa ga Jehofa fela, jale ka re sa ntse re ntse fa dipitsaneng tsa nama, jale ka re sa ntse re ijela dijo re kgora; gonne lo re ntshwditse kwano nageng e, go tla lo bolaya phuthego e yotlhe fela ka tlala.”
4Foo Jehofa a raya Moše a re: “Bona, ke tlaa lo nesetsa dijo di tswa kwa legodimong; batho ba tlaa tswa ka tsatsi lengwe le lengwe ba ya go ipapalela mo go lekanyeng letsatsi leo fela, gore ke ba leke ke bone boo ba tlaa sepela mo taolong ya me kgotsa nnyaa. 5A go diragale gore e re ka letsatsi la borataro ba baakanye se ba se bapetseng se nne se se kanang ka papadi ya malatsi a le mabedi.”
6Moše le Arone ba raya bana ba Iseraele botlhe ba re: “Ka maitseboana lo tlaa itse fa Jehofa a lo ntshitse kwa lefatsheng le Egepeto; 7e tlaa re ka moso lo tlaa bona kgalalelo ya ga Jehofa; gonne o utlwile dingongorego tsa lona ka ga gagwe; rona re be re le eng fa e bo ne ne lo re ngongoregela jaana?” 8Moše a re: “Go tlaa nna jaana, motlhang Jehofa o lo nayang nama maitseboa go e ja, le mo mosong dijo gore lo je lo kgore gonne Jehofa o utlwile dingongorego tsa lona tse lo di ngongoregang ka ga gagwe; mme rona re be re le eng? Dingongorego tsa lona ga se ka ga rona, fa e se ka ga Jehofa fela.”
9Moše a raya Arone a re: “Raya phuthego yotlhe ya bana ba Iseraele o re: ‘Atamelang fa pele ga Jehofa, gonne o utlwile dingongorego tsa lona.’ ” 10Ga diragala, ya re Arone a sa bua le phuthego yotlhe ya bana ba Iseraele, ba leba kwa nageng, mme bonang, kgalalelo ya ga Jehofa e bonala mo lerung. 11Jehofa a bua le Moše a re: 12“Ke utlwile dingongorego tsa bana ba Iseraele; bua nabo o re: ‘E tlaa re maitseboa lo tlaa ja nama, mo mosong lo tlaa kgora dijo, lo itse fa ke le Jehofa Modimo wa lona.’ ”
13Ya re maitseboa makutikweo a tla, a khurumetsa bothibelelo; ka moso monyo wa bo o koame mo tikologong yotlhe ya bothibelelo. 14E rile monyo o sena go tlhotlhorega, sefatlhogo sa naga sa bo se bonala selonyana se se dikgolokwanyane tse dinnyennyane jaaka kgogotshwane fa fatshe. 15E rile bana ba Iseraele ba se bona ba raana ba re: “Ke eng?” Gonne ba ne ba sa itse gore ke eng. Moše a ba raya a re: “Ke dijo tse Jehofa o di lo neileng go di ja. 16Se Jehofa o se laotseng ke se, a re: ‘Lo se gole mongwe le mongwe ka fa go jeng ga gagwe; mongwe le mongwe selekanyo sa lefiswana ka fa palong ya batho ba lona, mongwe le mongwe a se tseele ba ba mo mogopeng wa gagwe.’ ”
17Bana ba Iseraele ba dira jalo, bangwe ba gola bogolo, ba bangwe bobotlana. 18E rile ba go lekanya ka lefiswana, yo o ne a gotse bogolo ga a ka a salelwa ke sepe, le yo o ne a gotse bobotlana ga a ka a tlhaela; mongwe le mongwe a gola ka fa go jeng ga gagwe. 19Moše a ba raya a re: “A go se nne motho ope yo o se sadisetsang moso.” 20Le fa go ntse jalo ba se ka ba reetsa Moše; bangwe ba bone ba se sadisetsa moso, mme sa nyeula diboko, sa nkga; Moše a nna bogale nabo. 21Ba se gola ka meso yotlhe, motho mongwe le mongwe ka fa go jeng ga gagwe; fela e re letsatsi le gotela se tlhapologe. 22Ya re ka letsatsi la borataro ba gola selekanyo sa malatsi a le mabedi, e bong mafiswana a le mabedi a motho mongwe le mongwe; mme balaodi botlhe ba phuthego ba tla ba bolelela Moše. 23A ba raya a re: “Se ke sone se Jehofa o se buileng a re: ‘Ka moso e tlaa bo e le boikhutso jo bo masisi, ke Sabata yo o itshepileng wa ga Jehofa: lo bese se lo se besang, lo apeye se lo se apayang; gotlhe mo go salang lo go ipeele ka moso.’ ” 24Ba se beela moso jaaka Moše a laotse; mme sa se ka sa nkga, le gone go ne go se seboko mo go sone. 25Moše a re: “Jang sone seo gompieno; gonne gompieno ke Sabata wa ga Jehofa; gompieno ga lo ketla lo se fitlhela mo nageng. 26Lo tlaa se gola ka malatsi a le marataro; ka letsatsi la bosupa go Sabata, ga go ketla go nna sepe ka lone.”
27Ga dirala ya re ka letsatsi la bosupa batho bangwe ba tswa ba re ba ya go gola, mme ba se ka ba fitlhela sepe. 28Jehofa a raya Moše a re: “Lo tlaa gana ka lobaka lo lo kaye go tshegetsa ditaolo tsa me le melao ya me? 29Bonang, e re ka Jehofa a lo neile Sabata, ke gone ka letsatsi la borataro o lo neileng dijo tsa malatsi a le mabedi; a motho mongwe le mongwe a nne felong ga gawe, go se nne motho ope yo o tlogang mo felong ga gagwe ka letsatsi la bosupa.” 30Jalo batho ba ikhutsa ka letsatsi la bosupa.
31Ba ntlo ya Iseraele ba se raya leina ba re, Mana; se ne se le seswaanyana ka mmala, moutlwalo wa sone mo ganong o ntse jaaka dipapetlanyana tsa boupi tse di dubilweng ka dinotshe. 32Moše a re: “Se Jehofa o se laotseng ke se, a re: A se bolokwe se tletse ka lefiswana, se bolokelwe dikokomana tsa lona; gore ba tle ba bone sejo se ke se lo jesitseng mo nageng, jale ka ke lo ntsha mo lefatsheng la Egepeto.” 33Moše a raya Arone a re: “Tsaya sejana, o se olele mana ka lefiswana le le tletseng, o a tsenye mo go sone, o se beye fa pele ga Jehofa, go tla a bolokelwa dikokomana tsa lona.” 34Jaaka Jehofa a laotse Moše, Arone a a baya fa pele ga Tshupo go tla a bolokwa. 35Bana ba Iseraele ba a ja mana ka dinyaga di le 40, ga tsamaya ba fitlha mo lefatsheng le le ntsweng; ba ne ba ja mana ga tsamaya ba fitlha mo melelwaneng ya lefatshe la Kanana. 36Lefiswana le, la bidiwa omera, ke go re, fa efa e kgaogantswe sesome, e be e le kgaogano e le nngwe fela.
