EKESODO 25

₁Jehofa a bua le Moše a re: ₂“Bua le bana ba Iseraele gore ba mpaakanyetse tshupelo; mo mothong mongwe le mongwe yo pelo ya gagwe e mo ratisang, lo tseye tshupelo ya me mo go ene. ₃E ke yone tshupelo e lo tlaa e tsayang mo go bone; e bong gouta, le selefera, le kgotlho, ₄le bobududu, le bohibidu jo bo mo kgona, le bohibidu jo bo letlhololo, le letsela la leloba le le boleta, le maodi a dipodi; ₅le matlalo a diphelefu, a a tsentsweng mmala o mohibidu, le matlalo a manyebi, le dikgong tsa makala; ₆le lookwane lwa lesedi, le dinkgisa monate tsa lookwane lo lo tlolwang, le tsa maswalo a a monate, ₇majana a sohama, le majana a a lomelwang mo sekhutlaneng, le mo letlatleng la sefuba. ₈Ba ntirele ntlo e e itshepileng gore ke tle ke age mo go bone. ₉Lo e dire ka fa ke go supetsang ka gone gotlhe fela, ka fa sekaong sa dilwana tsa one.”

₁₀“Ba dire letlole ka dikgong tsa makala: boleele jwa lone e nne selekanyo sa disentimetara di le 110, boatlhamo jwa lone e nne selekanyo sa disentimetara di le 66, le bogodimo jwa lone e nne selekanyo sa disentimetara di le 66. ₁₁Mme o le manege gouta e e sa pekwang, o le manege ka fa teng le ka fa ntle, o le direle segomo sa gouta mo tikologong yotlhe ya lone. ₁₂O le bopele melepo ya gouta e le mene, o e tsenye mo maotong a yone a mane; melepo e le mebedi e nne ka fa tlhakoreng longwe, le melepo e le mebedi e nne ka fa tlhakoreng lo longwe. ₁₃O dire disikaro tsa makala, o di manege gouta. ₁₄O tsenye disikaro mo melepong e e ka fa ditlhakoreng tsa letlole, gore go sikarwe letlole ka tsone. ₁₅Disikaro di nne mo melepong ya letlole; a di se tlosiwe mo go yone. ₁₆O tlaa tsenya mo letloleng tshupo e ke tlaa e go nayang.

₁₇“O dire senno sa boutlwelo botlhoko ka gouta e e sa pekwang: boleele jwa sone e nne selekanyo sa disentimetara di le 110 le boatlhamo jwa sone e nne disentimetara di le 66. ₁₈O dire ditšheruba di le pedi ka gouta; o di dire ka gouta e e papetlilweng ka noto, di nne mo dintlheng tsoo pedi tsa senno sa boutlwelo botlhoko. ₁₉O dire gore tšheruba e nne kwa ntlheng nngwe, le tšheruba e nne kwa ntlheng e nngwe; o dire senno sa boutlwelo botlhoko le ditšheruba tse di mo ntlheng tsoo pedi tsa sone gore e nne gouta nngwe fela e sa kgaogana. ₂₀Ditšheruba di tsharololele diphuka tsa tsone kwa godimo, di khurumetse senno sa boutlwelo botlhoko ka diphuka tsa tsone di lebanye difatlhogo; difatlhogo tsa ditšheruba di lebe senno sa boutlwelo botlhoko. ₂₁Senno sa boutlwelo botlhoko se nne mo godimo ga letlole; mo teng ga letlole o tlaa tsenya tshupo e ke tlaa e go nayang. ₂₂Ke tlaa rakanela nao gone, ke le mo godimo ga senno sa boutlwelo botlhoko, ke le fa gare ga ditšheruba tse pedi tse di mo godimo ga letlole la tshupo, ke tlaa bua nao ka ga dilo tsotlhe tse ke tlaa di go neelang go di laolela bana ba Iseraele.”

₂₃“O dire tafole ka mokala; boleele jwa yone e nne disentimetara di le 88, boatlhamo jwa yone bo nne disentimetara di le 44, le bogodimo jwa yone bo nne disentimetara di le 66. ₂₄O e manege gouta e e sa pekwang, o e direle segomo sa gouta mo tikologong ya yone. ₂₅O e direle merapalego mo tikologang ya yone: boatlhamo bo le kana ka dimilimetara di le 75; o direle merapalego ya yone segomo mo tikologong ya yone. ₂₆O e direle melepo ya gouta e le mene, mme o tsenye melepo eo ka fa dikgonong tsoo nne tsa maoto a yone. ₂₇A melepo e nne gaufi le losi lwa morapalego, go nna manno a disikaro tse go sikarwang tafole ka tsone. ₂₈Disikaro o di dire ka mokala, o bo o di manege gouta gore tafole e sikarwe ka tsone. ₂₉O dire megotšana ya yone, le dintshwana tsa yone, le digwana tsa yone, le digo tsa yone, tse go thelwang ka tsone; dilo tse o di dire ka gouta e e sa pekwang. ₃₀Mo tafoleng o tlaa baya senkgwe sa tshupo fa pele ga me ka metlha yotlhe.”

₃₁“O dire setlhomo sa dipone ka gouta e e sa pekwang: se dirwe ka gouta e e papetlilweng ka noto, e bong marago a sone, le thito ya sone; dinkgwanyana tsa sone, le dikgolokwane tsa sone, le dithunya tsa sone, a di nne gouta nngwe fela naso e sa kgaogana. ₃₂Go nne dikala di le thataro tse di tswang mo ditlhakoreng tsa sone; dikala di le tharo tsa setlhomo sa dipone di tswe mo lotlhakoreng longwe, le dikala di le tharo tsa setlhomo sa dipone di tswe mo lotlhakoreng lo longwe. ₃₃Dinkgwanyana di le tharo tse di dirilweng jaaka dithunya tsa thamane di nne mo kaleng nngwe, di na le kgolokwane le sethunya; le dinkgwanyana di le tharo tse di dirilweng jaaka dithunya tsa thamane di nne mo kaleng e nngwe, di na le kgolokwane, le sethunya; go nne jalo mo dikaleng tse thataro tse di tswang mo setlhomong: ₃₄Le mo setlhomong go nne dinkgwanyana di le nne tse di dirilweng jaaka dithunya tsa thamane, dikgolokwane tsa tsone, le dithunya tsa tsone; ₃₅le kgolokwane e nna fa tlase ga dikala di le pedi, e le gouta e le nngwe fela e sa kgaogana, le kgolokwane fa tlase ga dikala di le pedi e le gouta e le nngwe fela e sa kgaogana; le kgolokwane fa tlase ga dikala di le pedi e le gouta e le nngwe fela e sa kgaogana, go direlwe, dikala tse thataro tse di tswang mo setlhomong sa lobone. ₃₆Dikgolokwane tsa tsone, le dikala tsa tsone e nne gouta nngwe fela e sa kgaogana; gotlhe fela ga sone e ne gouta e e sa pekwang, e e papetlilweng ka noto, e sa kgaogana. ₃₇O dire dilampa tsa sone di supa; o di tlhome mo go sone gore di bonese bolebana naso. ₃₈Le dipoma tsa tsone, le dipomelo tsa tsone, a e nne tsa gouta fela e e sa pekwang. ₃₉Se dirwe, se na le dilwana tse tsotlhe, ka gouta e e sa pekwang, e le bokete jwa talenta. ₄₀O bone gore o di dire ka fa sekaong sa tsone, se o se bontshitsweng mo thabeng.