EKESODO 31

₁Jehofa a bua le Moše a re: ₂“Bona, Besalele morwa Uri morwa Hure, wa lotso lwa Juta, ke mmiditse ka leina. ₃Ke mo tladitse mowa wa Modimo, wa botlhale, le wa tlhaloganyo, le wa kitso mo tirong nngwe le nngwe. ₄Go akanyetsa ditiro tsa matsetseleko, go dira ka gouta, le ka selefera, le ka kgotlho. ₅Le go setela majana go a tlhoma mo diaparong, le go seta dikgong, le go dira ditiro tsotlhe fela. ₆Mme nna, bona ke tlhomile nae Oholiabe, morwa Ahisamake, wa lotso lwa ga Dane; mme mo pelong tsa botlhe ba ba pelo e e tlhalefileng, ke tsentse botlhale, gore ba dire tsotlhe tse ke di ba laoletseng; ₇mogope wa bophuthegelo, le letlole la tshupo, le senno sa boutlwelo botlhoko se se mo godimo ga lone, le dilwana tsotlhe tsa mogope; ₈le tafole le dilwana tsa yone, le setlhomo se se itshekileng sa dipone se na le dilwana tsotlhe tsa sone, le maswalo; ₉le sebeso sa tshupelo e e fisiwang se na le dilwana tsotlhe tsa sone, le mogopo o o tlhapelang, le setlhomo sa one; ₁₀le diaparo tse di dirilweng ka maatlametlo, le diaparo tse di itshepileng tsa ga Arone moperesiti, le diaparo tsa bomorwawe tsa go direla mo tirong ya boperesiti; ₁₁le lookwane lo lo tlolwang, le maswalo a maroku a a lonko lo monate a felo ga boitshepo, ba di dire tsotlhe ka fa ke di go laoletseng ka gone.”

₁₂Jehofa a bua le Moše a re: ₁₃“Le gone o bue le bana ba Iseraele o re: ‘Ruri lo tlaa boloka Bosabata ba me; gonne ke sesupo gare ga me le lona go ya le dikokomana tsotlhe tsa lona, gore lo tle lo itse fa ke le Jehofa yo ke lo itshepisang. ₁₄Ke gone bolokang Sabata; gonne o lo itshepetse, mongwe le mongwe yo o o tlolang, ruri a a bolawe; gonne le fa e le mang yo o tlaa dirang tiro mo go one, ene motho yoo a kgaolwe mo go ba ga gabo. ₁₅Tiro a e dirwe ka malatsi a le marataro; letsatsi la bosupa ke Sabata wa boikhutso jo bo masisi, yo o itshepetseng Jehofa; le fa e le mang yo o dirang tiro ka letsatsi la Sabata, ruri a a bolawe. ₁₆Ke gone ka moo a bana ba Iseraele ba boloke Sabata, go tlhokomela Sabata, go ya le dikokomana tsotlhe tsa bone, gore e nne kgolagano e e sa khutleng. ₁₇Ke sesupo gare ga me le bana ba Iseraele ka bosakhutleng; gonne Jehofa o dirile legodimo le lefatshe ka malatsi a le marataro, mme e rile ka letsatsi la bosupa a ikhutsa, mme a homola.’ ”

₁₈E rile a sena go wetsa go bolelelana le Moše mo thabeng ya Sinai, a mo neela matlapa a le mabedi a tshupo, e le matlapa a a kwadilweng ka monwana wa Modimo.