Jehofa o hudusa Baiseraele mo thabeng ya Sinai
1Jehofa a bua le Moše a re: “Tloga o tswe fano, wena le batho ba o ba tlhatlositseng kwa lefatsheng la Egepeto, lo ye kwa lefatsheng le ke le ikanetseng Aberahame le Isake le Jakobe ka re: ‘Ke tlaa le naya losika lwa gago:’ 2Ke tlaa roma moengele wa me fa pele ga gago; ke tlaa leleka Mokanana, le Moamore, le Mohite, le Moperise, le Mohife, le Mojebuse: 3E bong kwa lefatsheng le le elang maši le dinotshe; gonne ga nketla ke tsamaya ke le mo gare ga gago; gonne o tšhaba e e thamo e thata; nka tla ka go nyeletsa mo tseleng.”
4E rile batho ba utlwa mafoko a a botlhoko a, ba lela; mme ga se ka ga nna le ope yo o aparang mekgabo ya gagwe. 5Jehofa a bua le Moše a re: “Raya bana ba Iseraele o re, ga twe: ‘Lo tšhaba e e thamo e thata; fa ke ka tsena mo go lona ka ema go le gonnye fela, ke ne ke tlaa lo nyeletsa; ke gone ka moo o apole mekgabo, ke tle ke itse se ke tlaa se go dirang.’ ” 6Ke fa bana ba Iseraele ba ikapola mekgabo, go tloga fa thabeng ya Horebe go ya kwa pele.
Motlaangana wa ga Jehofa
7Jaana Moše o ne a tle a tseye mogope a o tlhome kwa ntle ga bothibelelo kwa kgakala le bothibelelo, mme a o raya leina a re: “Mogope wa Bophuthegelo.” E ne e tle e re mongwe le mongwe yo o batlang Jehofa, a tswele kwa Mogopeng wa Bophuthegelo, o o leng kwa ntle ga bothibelelo. 8Go dirale go re, e ne e re fa Moše a tswela kwa Mogopeng, batho botlhe ba nanoge ba eme, mongwe le mongwe fa mojakong wa mogope wa gagwe, ba lebe Moše a tsamaye a tsene mo Mogopeng. 9Go dirale e re fa Moše a tsena mo Mogopeng, mosipuri wa leru o fologe, o eme fa mojakong wa Mogope; Jehofa a bue le Moše. 10E re batho botlhe fa ba bona mosipuri wa leru o eme fa mojakong wa Mogope; ba nanoge ba obame, mongwe le mongwe a le fa mojakong wa mogope wa gagwe. 11Jehofa o ne a tle a bue le Moše go lebanywe ka difatlhogo, jaaka motho a tle a bue le tsala ya gagwe. Mme ene a boele kwa bothibelelong; mme modiredi wa gagwe, e bong Jošua morwa Nune, motho wa lekau, a se ke a tlogele mogope.
Jehofa o solofetsa go nna le batho ba gagwe
12Moše a raya Jehofa a re: “Bona, o ntheile wa re: ‘Hudusa tšhaba e:’ mme ga o a nkitsise yo o tlaa mo romang le nna. Le fa go ntse jalo o rile: ‘Ke a go itse ka leina, o bile o bonye tsalano mo matlhong a me.’ 13Mme jaana ka re, fa ke bonye tsalano mo matlhong a gago, a ko o mpontshe ditsela tsa gago jaana, gore ke go itse, gore ke bone tsalano mo matlhong a gago; mme o gopole gore morafe o ke tšhaba ya gago.”
14Morena a re: “Go tlaa ya Sebonalo sa me nao, ke tlaa go ikhutsisa.” 15A mo raya a re: “Fa Sebonalo sa gago se sa ye le nna, o se ka wa re tlosa fano. 16Gonne jaana go tlaa itsiwe ka eng fa ke bonye tsalano mo matlhong a gago, nna le batho ba gago? A ga e tlaa bo e le ka go tsamaya le rona, gore nna le batho ba gago, re lomololwe mo bathong botlhe ba ba mo lefatsheng?”
17Jehofa a raya Moše a re: “Ke tlaa dira le sone selo se o se buileng, gonne o bonye tsalano mo matlhong a me, le ka leina ke a go itse.”
18A re: “Ke a go rapela, a ko o mpontshe kgalalelo ya gago.”
19A re: “Molemo wa me otlhe ke tlaa o fetisa fa pele ga gago, ke tlaa bolela leina la ga Jehofa fa pele ga gago. Ke tlaa nna tsalano le yo ke tlaa nnang tsalano nae, ke tlaa bontsha ene boutlwelo botlhoko yo ke tlaa mmontshang boutlwelo botlhoko.” 20A re: “Ga o a nonofa go bona sefatlhogo sa me; gonne motho ga a ketla a mpona a ba a tshela.” 21Jehofa a re: “Bona, go na le manno fa go nna, mme o tlaa ema mo godimo ga lefika. 22E tlaa re kgalalelo ya me e feta ke go tsenye mo lofarong lwa lefika, ke go bipe ka seatla sa me, go tsamaya ke feta. 23Ke tlaa tlosa seatla sa me, mme o tlaa mpona motlhana; sefatlhogo sa me sone ga se ketla se bonwa.”
