EKESODO 35

₁Moše a phutha phuthego yotlhe ya bana ba Iseraele, a ba raya a re: “A, ke one mafoko a Jehofa o a laotseng, gore lo a dire. ₂Tiro e dirwe ka malatsi a le marataro, mme e re letsatsi la bosupa e nne letsatsi le lo le itshepetseng, e nne Sabata wa boitapolosetso Jehofa, jo bo masisi; le fa e le mang yo o dirang tiro ka lone a a bolawe. ₃Lo se ka lwa gotsa molelo mo maagong otlhe a lona ka letsatsi la Sabata.”

₄Moše a bua le phuthego yotlhe ya bana ba Iseraele a re: “Se, ke sone se Jehofa o se laotseng a re: ₅Ntshetsang Jehofa tshupelo mo go lona; mongwe le mongwe yo pelo ya gagwe e ratang, a e lere, tshupelo ya ga Jehofa: gouta, le selefera, le kgotlho. ₆Le bobududu, le bohibidu jo bo mokgona, le bohibidu jo bo letlhololo, le letsela la leloba le le boleta, le maodi a dipodi; ₇le matlalo a diphelefu a a tsentsweng mmala o mohibidu, le matlalo a manyebi, le dikgong tsa makala; ₈le lookwane lwa lesedi, le dinkgisa monate tsa lookwane lo lo tlolwang, le tsa maswalo a a nkgang monate; ₉le majana a šohama, le majana a a tlhongwang a sekhutlana, le a letlatla la sehuba.

₁₀“A motho mongwe le mongwe yo o pelo e e tlhalefileng mo go lona a tle, mme a dire tsotlhe tse Jehofa o di laotseng. ₁₁E bong motlaagana le mogope wa one, le sekhurumetso sa one, le dikgoge tsa one, le dimati tsa one, le merapalego ya one, le maotwana a one, le ditlhako tsa one; ₁₂le letlole le disikaro tsa lone; senno sa boutlwelo botlhoko le sesiro sa sebipo; ₁₃le lomati lwa bojelo le disikaro tsa lone, le dilwana tsotlhe tsa lone, le senkgwe sa tshupo; ₁₄le sone setlhomo sa lesedi, le dilwana tsa sone, le dilampa tsa sone, le lookwane lwa lesedi; ₁₅le sebeso sa maswalo, le disikaro tsa sone, le lookwane lo lo tlolwang, le maswalo a a nkgang monate, le sebipo sa mojako, fa mojakong wa motlaagana. ₁₆Sebeso sa tshupelo e e fisiwang, le leiso la sone le le setlatla la kgotlho, le disikaro tsa sone, le dilwana tsotlhe tsa sone, le mogopo o o tlhapelang le setlhomo sa one; ₁₇matsela a a lepelelang a lolwapa, le maotwana a lone, le ditlhako tsa one, le sebipo sa kgoro ya lolwapa; ₁₈dimapo tsa motlaagana, le dimapo tsa lolwapa, le megala ya tsone; ₁₉le diaparo tse di dirwang ka botswerere, tsa go direla mo felong ga boitshepo, diaparo tse di itshepileng tsa ga Arone moperesiti le diaparo tsa bomorwawe, go tla ba direla mo tirong ya boperesiti.”

₂₀Phuthego yotlhe ya bana ba Iseraele ya phatlalala ya tloga fa pele ga Moše. ₂₁Ba tla, mongwe le mongwe yo pelo ya gagwe e mo tlhotlheletsang, le mongwe le mongwe yo mowa wa gagwe o mo ratisitseng, mme ba lere tshupelo ya ga Jehofa, ya tiro ya mogope wa bophuthegelo, le ya tirelo yotlhe ya one, le ya diaparo tse di itshepileng. ₂₂Ba tla, banna ba na le basadi, e bong botlhe ba ba pelo e e ratang, ba lere dikgokedi tsa sehuba, le manyena a ditsebe, le manyena a dipala menwana a dikanela, le mefitshana, e le mekgabo ya gouta yotlhe fela, e bong monna mongwe le mongwe yo o ne a isetsa Jehofa tshupelo ya gouta. ₂₃Monna mongwe le mongwe yo go fitlhetsweng bobududu, le bohibidu jo bo mokgona, le bohibidu jo bo letlhololo, le letsela la leloba le le boleta, le maodi a dipodi mo go ene, le matlalo a diphelefu a a tsentsweng mmala o mohibidu, le matlalo a manyebi, a di lere. ₂₄Mongwe le mongwe yo o ntshang tshupelo ya selefera le kgotlho, a bo a lere tshupelo ya ga Jehofa; le monna mongwe le mongwe yo go fitlhetsweng dikgong tsa mokala mo go ene tsa tiro nngwe ya tirelo, a di lere. ₂₅Basadi botlhe ba ba pelo e e tlhalefileng ba otlha ka diatla tsa bone, ba lere se ba se otlhileng, bobududu le bohibidu jo bo mokgona, le bohibidu jo bo letlhololo, le letsela la leloba le le boleta. ₂₆Basadi botlhe ba pelo tsa bone di ba tlhotlheletsang mo botlhaleng, ba otlha maodi a dipodi. ₂₇Le balaodi ba lere majana a šohama, le majana a a tlhongwang a sekhutlana, le a letlatla la sehuba; ₂₈le dinkgisa monate, le lookwane; e le tsa lesedi le tsa lookwane lo lo tlolwang, le tsa maswalo a a nkgang monate. ₂₉Bana ba Iseraele ba lere tshupelo ya peleego fela kwa go Jehofa; e bong monna le mosadi mongwe le mongwe yo pelo ya gagwe e mo ratisitseng go di leretse tiro yotlhe, e Jehofa o e laotseng go dirwa ka seatla sa ga Moše.

₃₀Moše a raya bana ba Iseraele a re: “Bonang, Jehofa o biditse ka leina Besalele, morwa Uri, morwa Hure wa lotso lwa Juta; ₃₁o mo tladitse mowa wa Modimo wa botlhale, le wa tlhaloganyo, le wa kitso, le wa tiro nngwe le nngwe. ₃₂Le go akanyetsa ditiro tsa matsetseleko, go dira ka gouta, le ka selefera, le ka kgotlho. ₃₃Le wa go setela majana go tlhongwa, le wa go seta dikgong, go dira mo tirong ya botsetseleko. ₃₄O tsentse mo pelong ya gagwe gore a rute batho, ene le Oholiabe morwa Ahisamake, wa lotso lwa Dane. ₃₅Bao o ba tladitse botlhale jwa pelo, go dira ditiro dingwe le dingwe tsa mogabi wa majana, le tsa motsetseneki, le tsa motsantsabetsi ka bobududu, le ka bohibidu jo bo mokgona, le bohibidu jo bo letlhololo, le ka letsela la leloba le le boleta, le tsa mologi, e bong tsa bone ba ba dirang ditiro dingwe le dingwe, le tsa bone ba ba itseng go akanyetsa ditiro tsa matsetseleko.