Go aga le go tlhoma motlaagana
1Jehofa a bua le Moše a re: 2“E tlaa re ka letsatsi la ntlha la kgwedi o tlhome motlaagana wa mogope wa bophuthegelo. 3O tsenye letlole la tshupo mo go one, o bipe letlole ka sesiro. 4O ise tafole mo teng, o rulaganye dilo tse di nnang mo go yone; o ise setlhomo sa dipone mo teng, o tshube dilampa tsa sone. 5O beye sebeso sa gouta ya go fisetsa maswalo fa pele ga letlole la tshupo, mme o beele mojako wa motlaagana sebipo. 6O beye sebeso sa tshupelo e e fisiwang fa pele ga mojako wa motlaagana wa mogope wa bophuthegelo. 7O beye mogopo o o tlhapelang fa gare ga mogope wa bophuthegelo le sebeso, o bo o thele metsi mo go one. 8O tlhome lolwapa mo tikologong, o pege sebipo sa kgoro ya lolwapa.
9“O tseye lookwane lo lo tlolwang, mme o tlotse motlaagana le tsotlhe tse di mo go one, o o itshepise, le dilwana tsotlhe tsa one; mme o tlaa nna boitshepo. 10O tlotse sebeso sa tshupelo e e fisiwang, le dilwana tsotlhe tsa sone, mme o itshepise sebeso; sebeso se tlaa nna boitshepo jo bo itshepileng. 11O tlotse mogopo o o tlhapelang le setlhomo sa one, o o itshepise.
12“O tlaa lere Arone le bomorwawe fa mojakong wa mogope wa bophuthegelo, o ba tlhapisa ka metsi. 13O apese Arone diaparo tse di itshepileng; o mo tlotse, o mo itshepise gore a ntirele mo tirong ya boperesiti. 14O lere bomorwawe, o ba apese bohempe; 15o ba tlotse jaaka o tloditse rraabo, gore ba ntirele mo tirong ya boperesiti; go tlodiwa ga bone e tlaa nna boperesiti jo bo sa khutleng mo go bone, go ya le dikokomana tsa bone tsotlhe fela.”
16Moše a dira jalo, jaaka tsotlhe tse Jehofa a di mo laoletseng, a dira jalo fela. 17Ya re ka kgwedi ya ntlha ka ngwaga wa bobedi, ka letsatsi la ntlha la kgwedi, motlaagana wa tlhongwa. 18Moše a tlhoma motlaagana, a ba a tlhoma ditlhako tsa one, a emisa dimati tsa one, a tsenya merapalego ya one, a tlhoma maotwana a one. 19A tsharolola mogope mo godimo ga motlaagana, a baya sekhurumetso sa mogope mo go one kwa godimo, jaaka Jehofa a laotse Moše. 20A tloga a tsenya tshupo mo letloleng, a tsenya disikaro mo letloleng, a ba a baya senno sa boutlwelobotlhoko mo letloleng fa godimo. 21A isa letlole mo motlaaganeng, a pega sesiro sa sebipo, a bipa letlole la tshupo, jaaka Jehofa a laotse Moše.
22A tsenya lomati lwa bojelo mo mogopeng wa bophuthegelo, fa lotlhakoreng lwa motlaagana ka fa ntlheng ya botsheka, ka fa ntle ga sesiro. 23A rulaganya senkgwe mo go lone fa pele ga Jehofa; jaaka Jehofa a laotse Moše. 24A tsenya setlhomo sa dipone mo mogopeng wa bophuthegelo, bolebana le lomati lwa bojelo, fa lotlhakoreng lwa motlaagana ntlheng ya borwa. 25A tshuba dilampa fa pele ga Jehofa; jaaka Jehofa a laotse Moše. 26A tsenya sebeso sa gouta mo mogopeng wa bophuthegelo fa pele ga sesiro. 27A fisetsa mo go sone maswalo a maroku a a nkgang monate; jaaka Jehofa a laotse Moše. 28A baya sebipo sa mojako wa motlaagana. 29A baya sebeso sa tshupelo e e fisiwang fa mojakong wa motlaagana wa mogope wa bophuthegelo, a isa mo go sone tshupelo e e fisiwang le tshupelo ya boupe; jaaka Jehofa a laotse Moše. 30A baya mogope o o tlhapelang fa gare ga mogope wa bophuthegelo le sebeso, a thela metsi mo go one, a go tlhapiwang ka one. 31Moše le Arone le bomorwawe ba tlhapa diatla ba itlhapisa dinao mo go one. 32e ne e tle e re fa ba tsena mo mogopeng wa bophuthegelo, le fa ba atamela kwa sebesong, ba tlhape; jaaka Jehofa a laotse Moše. 33A tlhoma lolwapa mo tikologong ya motlaagana le sebeso, a pega sebipo sa kgoro ya lolwapa. Moše a swetsa tiro jalo.
Leru mo godimo ga motlaagana
34Foo leru la khurumetsa mogope wa bophuthegelo, le kgalalelo ya Modimo ya tlala mo motlaaganeng. 35Moše a retelelwa ke go tsena mo mogopeng wa bophuthegelo, ka ntlha ya leru le le ntseng godimo ga one, mme kgalalelo ya ga Jehofa ya tlala mo motlaaganeng. 36E ne e tle e re leru le tlosiwa mo godimo ga motlaagana bana ba Iseraele ba tswelele kwa pele mo ditsamaong tsotlhe tsa bone; 37fa leru le sa tlosiwe, foo ba se ke ba tloge, go tsamaye leru le tlosiwe. 38Gonne leru la ga Jehofa la nna mo motlaaganeng fa go le motshegare, e re bosigo go nne molelo gone, mo ponong ya ba ntlo ya Iseraele botlhe fela, mo ditsamaong tsotlhe tsa bone.
