Go kgalemelwa ga baperofeti ba tsietso ba banna
1Lefoko la ga Jehofa la tla mo go nna, la re: 2“Morwa motho, perofesa o nyatse baperofeti ba Iseraele ba ba perofesang, o reye ba ba perofesang se e leng sa pelo ya bone fela, o re: ‘Utlwang, lefoko la ga Jehofa.’
3“Morena Modimo o bua jaana, a re: Go latlhega baperofeti ba ba dieleele, ba ba salang mowa wa bone morago, mme ba sa bone sepe! 4Wena Iseraele, baperofeti ba gago ba ntse jaaka bophokoje mo mafelong a a kgakgabetseng. 5Ga lo ise lo palame mo diphatleng, le fa e le go tsosolosetsa ba ntlo ya Iseraele lorako, go tla lo ema mo tlhabanong mo letsatsing la Jehofa. 6Ba bonye boithamako le boitsejwanape jwa maaka, ba ba reng Jehofa a re a re; mme Jehofa a sa ba roma; mme ba solofeditse batho go re lefoko le tlaa tlhomamisiwa. 7A ga lo a bona ponatshegelo ya boithamako, a ga lo a bua boitsejwanape jwa maaka, fa e bo ne ne lo tle lo re: ‘Jehofa a re a re’; le mororo ke se ka ka bua?”
8Ke gone ka moo Morena Modimo o bua jaana, a re: “Ereka lo buile boithamako, lo bonye maaka, ka re, bonang, ke tlhabana le lona. Go bua Morena Modimo. 9Le seatla sa me se tlaa tlhabana le baperofeti ba ba bonang boithamako, le ba ba buang boitsejwanape jwa maaka; ga ba ketla ba nna mo lekgotleng la batho ba me, le gone ga ba ketla ba kwalwa mo lokwalong lwa maina a ba ntlo ya Iseraele, le gone ga ba ketla ba tsena mo lefatsheng la Iseraele, mme lo tlaa itse fa ka le Morena Modimo.
10“E re ka, ee, e re ka ba timeditse batho ba me, ba re: ‘Kagiso’; mme go se na kagiso; mme e re fa mongwe a aga lorako, bonang, ba lo batege ka sedilo se se sa dubegang. 11O reye ba ba lo bategang ka sedilo se se sa dubegang, o re: Lo tlaa wa; go tlaa na pula e e penololang; le lona maje a matona a sefako, lo tlaa wa; mme phefo ya ledimo e tlaa thuba lona lorako. 12Bonang, e tlaa re lorako lo sena go wa, a ga lo ketla lo rewa go twe: ‘Patego e kae e lo lo bategileng ka yone?’
13“Ke gone ka moo, go bua jaana Morena Modimo, a re: ‘Ke tlaa lo thuba fela ka phefo ya ledimo mo tšararegong ya me; mme go tlaa na pula e e penololang mo bogaleng jwa me, le maje a matona a sefako a go lo nyeletsa ka tsubutlo e kgolo. 14Ke tlaa thuba jalo lorako lo lo lo bategileng ka sedilo se se sa dubegang, ke tlaa lo rutla go ya go fitlha fela mo mmung, go tsamaya motheo wa lone o senolwa; mme lo tlaa wa, le lona lo tlaa nyelediwa mo gare ga lone; mme lo tlaa itse fa ke le Jehofa.
15“ ‘Ke tlaa dirafaletsa lorako tšararego ya me jalo, le ba ba lo bategileng ka sedilo se se sa dubegang; ke tlaa lo raya ke re: Lorako ga lo tlhole lo le teng, le fa e le ba ba lo bategileng; 16e bong baperofeti ba Iseraele ba ba perofesang ka ga Jerusalema, le ba ba o bonelang diponatshegelo tsa kagiso, mme go se na kagiso.’ ” Go bua Morena Modimo.
Go kgalemelwa ga baperofeti ba tsietso ba sesadi
17“Wena morwa motho, o lebise sefatlhogo sa gago go tlhabana le bomorwadia batho ba ga eno, ba ba perofesang se e leng sa pelo tsa bone fela; mme o perofese o ba nyatse. 18O re, Morena Modimo o bua jaana, a re: A bo go latlhega basadi ba ba gokelang merabana mo ditokololong tsa mabogo, ba direla ditlhogo tsa batho bangwe le bangwe dirwalo tsa khai go tla ba tsoma mewa ya batho! A lo a bo lo tlaa tsoma mewa ya batho ba me, mme lo ipolokela mewa e e leng ya lona? 19Lo ntlhapaditse mo bathong ba me ka merafo ya barele ya diatla, le ka dikabetla tsa senkgwe, go tla lo bolaya mewa e e sa tshwanelang go swa, le go boloka mewa e e sa tshwanelang go tshela, ka go aka ga lona mo bathong ba me ba ba reetsang maaka.”
20Ke gone ka moo Morena Modimo o bua jaana, a re: “Bonang, ke tlhabana le merabana ya lona, e lo tsomang mewa ya batho ka yone teng, jaaka dinonyane, mme ke tlaa e gagola mo mabogong a lona; ke tlaa lesa mewa e tsamaye, e bong mewa e lo e tsomang jaaka dinonyane. 21Le dirwalo tsa lona tsa khai ke tla di gagola, ke golola batho ba me mo seatleng sa lona, mme ga ba ketla ba tlhola ba nna mo seatleng sa lona go tsongwa; mme lo tlaa itse fa ke le Jehofa. 22E re ka lo hutsafaditse pelo ya basiami ka maaka, ba ke sa ba hutsafatsang; lo thatafaditse diatla tsa moikepi, gore a tle a se ka a boa mo tseleng ya gagwe ya boikepo, mme a itse go bolokwa a tshela, 23ke gone ga lo ketla lo tlhola lo bona boithamako, le fa e le go bua maitseanape, mme ke tlaa golola batho ba me mo seatleng sa lona; mme lo tlaa itse fa ke le Jehofa.”
