ESEKIELE 15

₁Lefoko la ga Jehofa la tla mo go nna, la re: ₂“Morwa motho, ana setlhare sa mofine se molemo wa eng bogolo go setlhare sengwe fela; ke raya kala ya mofine e e mo gare ga ditlhare tsa sekgwa? ₃A go ka tsewa dikgong mo go sone tsa go dira tiro nngwe? Kgotsa, a batho ba ka tsaya lomapo mo go sone go tla ba pega sejana sengwe mo go lone? ₄Bonang, se latlhelwa mo molelong go orwa; molelo o jele dintlha tsa sone tsoo pedi, mme bogare jwa sone bo fisitswe; a se sa na le molemo wa tiro nngwe? ₅Bonang, e rile se sa ntse se le mmogo, sa bo se se na tiro epe; bogolo jang jaanong ka molelo o se jele, mme se šele, a se sa ntse se ka nna le tiro nngwe?”

₆Ke gone ka moo, go bua Morena Modimo, a re: “Jaaka setlhare sa mofine mo ditlhareng tsa sekgwa, se ke se tsentseng mo molelong go orwa, ke tlaa tsenya banni ba Jerusalema jalo. ₇Ke tlaa lebisa sefatlhogo sa me go tlhabana nabo; ba tlaa tswa mo molelong, mme molelo o tlaa ba laila; mme lo tlaa itse fa ke le Jehofa, mogang ke lebisang sefatlhogo sa me go tlhabana nabo. ₈Ke tlaa swafatsa lefatshe, gonne ba tlodile, go bua Morena Modimo.”