ESEKIELE 23

₁Lefoko la ga Jehofa la ba la tla mo go nna, la re: ₂“Morwa motho, go kile ga ne go le basadi ba le babedi, bana ba mosadi a le mongwe fela. ₃Ba dira boaka kwa Egepeto; ba dira boaka mo borweetsaneng jwa bone. Mabele a bone a ne a papielwa gone, mme ba apaapa ditlhoko tsa bokgarebana jwa bone gone. ₄Leina la yo mogolwane e ne e le Ohola, monnawe e le Oholiba; mme ba tla ba nna ba me, ba belega bana ba basimane le ba basetsana. Mme ka ga maina a bone, Samaria ke Ohola, Jerusalema ke Oholiba.

₅“Ohola a akafala a sa ntse a le wa me; mme a rata dinyatsi tsa gagwe thata, e bong Baasiria ba o ne a bapile nabo. ₆Ba ba apereng bobududu, balaodi le balaodisiwa, botlhe e le makolwane a a eletsegang, bapalami ba ba palamang dipitse. ₇A ineela mo go bone ka maakafalo a gagwe, banna e le ba ba tlhaotsweng ba Asiria botlhe fela; bangwe le bangwe ba o ba ratang thata o ne a itshekolola ka medimo ya disetwa ya bone yotlhe fela. ₈Mme e sa le ka metlha ya Egepeto ga a ise a ke a kgaogane le boaka jwa gagwe; gonne e rile mo borweetsaneng jwa gagwe ba robala nae, ba apaapa ditlhoko tsa bokgarebana jwa gagwe, ba goromeletsa boaka jwa bone mo go ene. ₉Ke gone ka moo ka mo tsenya mo seatleng sa dinyatsi tsa gagwe, e bong mo seatleng sa Baasiria, ba o ba ratileng thata. ₁₀Bao ba senola bosaikategang jwa gagwe; ba gapa bana ba gagwe ba basimane le ba basetsana, mme ene ba mmolaya ka tšhaka, mme a nna setlhajwa difela mo basading, gonne ba ne ba dirafatsa ditshekiso mo go ene.

₁₁“Oholiba monnawe a bona mo, mme le fa go ntse jalo a nna sebodu bogolo go ene mo dithatong tsa gagwe, le mo maakafalong a gagwe a a bileng a feta a ga mogoloe. ₁₂A rata Baasiria thata, balaodi le balaodisiwa, ba ba bapileng nae, ba ba kgabileng ka matsabatsaba a magolo, e le bapalami ba ba palamang dipitse botlhe fela a le makolwane a a eletsegang. ₁₃Ka bona fa a senyegile; ba tsaya tsela e le nngwe fela ka bobedi jwa bone.

₁₄“Ene a totisa maakafalo a gagwe; gonne a bona ditshwano tsa banna ba tshwantshitswe mo lomoteng, ditshwantsho tsa Bakalatea di dirilwe ka bohibidu jo bo kganyang; ₁₅ba tlamilwe ka meitlamo mo lothekeng, ba rwele ditlhoro tse di mebalabala mo ditlhogong, e le dikgosana botlhe fela fa motho a ba leba, ka fa tshwanong ya Babilone mo Kalatea, lefatshe la bone la botsalelo. ₁₆Ya re a itlhoma a di bona fela a ba rata thata fela, mme a roma barongwi kwa go bone kwa Kalatea. ₁₇Bababilone ba tla kwa go ene mo bolaong jwa dithato, ba mo senya ka boaka jwa bone, mme a leswefala ka bone, mowa wa gagwe wa ba wa tenwa ke bone. ₁₈Jalo a senola maakafalo a gagwe, a itshenola bosaikategang jwa gagwe. Foo mowa wa me wa tenwa ke ene jaaka mowa wa me o ne o tennwe ke mogolowe. ₁₉Le fa go ntse jalo a ntsifatsa maakafalo a gagwe fela, a ntse a gakologetswe metlha ya borweetsana jwa gagwe, jale jaaka a akafala mo lefatsheng la Egepeto. ₂₀A rata dinyatsi tsa bone thata, ba nama ya bone e ntseng jaaka ya diesela, ba motlhapo wa bone o ntseng jaaka motlhapo wa dipitse. ₂₁Jalo o ne wa ikgopodisa botlhodi jwa borweetsana jwa gago, ka Baegepeto ba apaapa ditlhoko tsa gago, ka mabele a gago e sa ntse e le a borweetsana jwa gago.”

₂₂“Ke gone, wena Oholiba, Morena Modimo o bua jaana, a re: Bona, ke tlaa go tsosetsa dinyatsi tsa gago, tse di tenneng mowa wa gago; ke tlaa di lere mo go wena ka ntlha tsotlhe. ₂₃Bababilone, le Bakalatea botlhe, Bapekodi, le Bašoa, le Bakoa le Baasiria botlhe nabo; makolwane a a eletsegang, balaodi le balaodisiwa botlhe fela, dikgosana le batho ba ba tumileng, botlhe ba palame dipitse. ₂₄Ba tlaa go bololela ba na le dibolao, le dikara, le makoloi, le masomo a ditšhaba; ba tlaa go ipaakanyetsa ka thejana, le thebe le tlhoro ya phemelo ka ntlha tsotlhe; ke tlaa ba neela tsheko, mme ba tlaa go atlhola ka fa dikatlholong tsa bone. ₂₅Ke tlaa go beela lefufa la me, mme ba tlaa go direla ka tšararego; ba tlaa go kgaola nko le ditsebe, mme masalela a gago a tlaa wa ka tšhaka; ba tlaa go thukhutha bana ba gago ba basimane le ba basetsana; masalela a gago a tlaa lailwa ke molelo. ₂₆Gape ba tlaa go apola diaparo, mme ba tlaa go tseela mekgabo ya gago e mentle. ₂₇Ke tlaa khutlisa botlhodi jwa gago mo go wena, le boakafalo jwa gago jo bo tswang lefatsheng la Egepeto; mme ga o ketla o ba tsholeletsa matlho, le fa e le go tlhola o gakologelwa Egepeto gope.”

₂₈Gonne Morena Modimo o bua jaana, a re: “Bona, ke tlaa go tsenya mo seatleng sa ba o ba tlhoileng, mo seatleng sa ba ba tenneng mowa wa gago. ₂₉Ba tlaa go direla ka kilo, ba tlaa tlosa gotlhe mo o go dirileng, ba tlaa go tlogela o sa ikatega o le loforotlho fela; mme bosaikategang jwa maakafalo a gago bo tlaa senolwa, e bong botlhodi jwa gago le maakafalo a gago. ₃₀Dilo tse o tlaa di direlwa, ka o ne o akafalela ba ditšhaba, le ka gonne o leswefaditswe ke medimo ya bone ya disetwa. ₃₁O tsamaile mo tseleng ya ga mogoloo; ke gone ke tlaa tsenyang senwelo sa gagwe mo seatleng sa gago.”

₃₂Morena Modimo o bua jaana, a re: “O tlaa nwa senwelo sa ga mogoloo, se se boteng, se segolo; o tlaa tshegwa ka tshotlo, o nna lonyatso; senwelo se, se tshola botona thata. ₃₃O tlaa kgorisiwa botagwa le bohutsana ka senwelo sa kgakgamalo le tshwafalo, ka senwelo sa ga mogoloo Samaria.

Go bua Morena Modimo.

₃₅Ke gone Morena Modimo o bua jaana a re: “E re ka o ntebetse, o ntatlhetse ka kwa motlhaneng ga gago, ka re, le wena belega botlhodi jwa gago le maakafalo a gago.”

₃₆Gape Jehofa a nthaya a re: “Morwa motho, a o tlaa atlhola Ohola le Oholiba? Fa e le jalo o ba kakanyetse tse di makgapha tsa bone. ₃₇Gonne ba dirile boaka, go bile go na le madi mo diatleng tsa bone, gape ba dirile boaka le medimo ya bone ya disetwa; mme le bana ba bone, ba ba ba bonyeng le nna, ba ba ralaleditse molelo gore ba bolawe. ₃₈Gape ba ntiretse selo se; ba itshekolotse felo ga me ga boitshepo, ka tsatsi le le lengwe fela, ba bile ba tlhapaditse bosabata ba me. ₃₉Gonne e rile ba sena go bolaela medimo ya bone ya disetwa bana ba bone, foo ba tla ka tsatsi leo fela mo felong ga me ga boitshepo, ba tla go go tlhapatsa; mme bonang, ba dirile jalo mo gare ga ntlo ya me.

₄₀“Gape lo romile lwa ya go bitsa banna ba ba tswang kgakala, ba go romilweng morongwa kwa go bone, mme bonang ba tsile; ba o ne wa ba itlhapisetsa wa itshasa mo matlhong, wa itsabaketsa ka mekgabo; ₄₁wa dula mo bolaong jwa serena, lomati lwa bojelo lo lo baakantsweng lo le fa pele ga jone, lo o ne wa baya maswalo a me mo go lone, le lookwane lwa me. ₄₂Mme go dumaduma ga bontsi jwa batho ba ba iketlileng ga bo go ntse nae; mme ga leriwe batagwi ba tswa kwa nageng, ba na le ba e leng batho fela; mme ba rwesa basadi bao boo babedi mefitshana mo mabogong, le dirwalo tse dintle mo ditlhogong.

₄₃“Foo ga bua nna ka ga gagwe yo o leng mogologolo mo maakafalong, ka re: Jaanong ba tlaa dira boaka nae, le ene nabo. ₄₄Ba tsena mo go ene, jaaka go tle go tsenwe kwa mosading wa seaka; ba tsena jalo kwa go Ohola le kwa go Oholiba, basadi ba ditlhodi. ₄₅Banna ba ba siameng, ba tlaa ba sekisa ka tshekiso ya diaka, le ka tshekiso ya basadi ba ba tshololang madi, gonne ke diaka, e bile madi a batho a mo diatleng tsa bone.”

₄₆Gonne Morena Modimo o bua jaana, a re: “Ke tlaa lere lesomo le tla go tlhabana nabo, mme ke tlaa ba neela go akgaakgelwa kwa le kwa le go thukhuthwa. ₄₇Lesomo le tlaa ba kgobotletsa ka maje, ba tlaa ba fofotsa ka ditšhaka tsa bone; ba tlaa bolaya bana ba bone ba basimane le ba basetsana, ba tlaa fisa matlo a bone ka molelo. ₄₈Ke tlaa khutlisa botlhodi jwa bone jalo mo lefatsheng, gore basadi botlhe ba ithute, gore ba se ka ba dira ka fa botlhoding jwa lona. ₄₉Ba tlaa lefetsa botlhodi jwa lona mo go lona; lo tlaa belega maleo a medimo ya lona ya disetwa, ditshwantsho tsa lona; mme lo tlaa itse fa ke le Morena Modimo.”