Modimo o tshegofatsa Iseraele
1“Wena morwa motho, perofesetsa dithaba tsa Iseraele, o re: Lona dithaba tsa Iseraele, utlwang lefoko la ga Jehofa. 2Morena Modimo o bua jaana, a re: E re ka baba ba buile ka ga lona ba re: ‘Ahe!’ ba ba ba re: ‘Mafelo a a tlotlometseng a bogologolo ke a rona go a rua.’
3“Ke gone perofesa, o re: Morena Modimo o bua jaana, a re: e re ka, ee, e re ka ba lo swafaditse, ba lo komeditse ka ntlha tsotlhe, gore lo nne seruiwa sa masalela a merafe, mme lo bolelwa ke melomo ya babuabui, lo le tumedi e e bosula mo bathong; 4ke gone, lona dithaba tsa Iseraele, utlwang lefoko la Morena Modimo; Morena Modimo o bua jaana le dithaba le makhubu, le meedi, le melapo le dikgakgabalo tse di swafetseng, le metse e e tlogetsweng, e e duleng thopo le setshego mo masaleleng a merafe e e mo tikologong.
5“Ke gone ka moo Morena Modimo o bua jaana, a re: Ruri ke buile ka molelo wa lefufa la me ka ga masalela a merafe, le ka ga Etome otlhe fela, ba ba ineileng lefatshe la me go le rua ka boitumelo jwa pelo yotlhe ya bone, ka kilo ya mowa, go le latlhela kwa ntle e le thopo.
6“Ke gone perofesa ka ga lefatshe la Iseraele, o reye dithaba, le makhubu, le meedi, le melapo, o re: Morena Modimo o bua jaana, a re: Bonang, ke buile mo lefufeng la me, le mo tšararegong ya me, gonne lo belege botlhabisa ditlhong jwa baditšhaba. 7Ke gone ka mo Morena Modimo o bua jaana, a re: Ke tsholeditse letsogo la me ka re: Ruri baditšhaba ba ba mo tikologong ya lona, ba tlaa belega botlhabisa ditlhong jwa bone.
8“Lona dithaba tsa Iseraele, lo tlaa tlhogisa dikala, lo tlaa ungwela batho ba me Iseraele; gonne ba gaufi go tla. 9Gonne bonang, ke ntlheng ya lona, ke tlaa retologela kwa go lona, mme lo tlaa lengwa lo jalwa. 10Ke tlaa ntsifatsa batho mo go lona, ba ntlo ya Iseraele botlhe, e bong botlhe fela; mme metse e tlaa nnwa, le mafelo a a ropefetseng a tlaa agiwa. 11Ke tlaa ntsifatsa mo go lona motho le kgomo; mme batho ba tlaa ntsifala ba ata le dikgomo. Ke tlaa dira gore lo nnwe ka fa popegong ya lona ya pele, ke tlaa lo direla sentle bogolo go mo ditshimologong tsa lona; mme lo tlaa itse fa ke le Jehofa. 12Ee, ke tlaa tsamaisa batho mo go lona, e bong batho ba me ba Iseraele; mme ba tlaa go rua, o tlaa nna boswa jwa bone, mme ga o ketla o tlhola o ba thukhutha bana gope.
13“Morena Modimo o bua jaana, a re: E re ka ba lo raya ba re: ‘Wena lefatshe o mosuputsi wa batho, o ntse o le mothukhuthi wa morafe wa gaeno;’ 14ke gone ga o ketla o tlhola o suputsa batho gope, le fa e le go thukhutha morafe wa ga eno, go bua Morena Modimo. 15Le gone ga nketla ke tlhola ke go leseletsa o utlwa botlhabisa ditlhong jwa merafe, ga o ketla o tlhola o belega kgobo ya baditšhaba, ga o ketla o tlhola o kgopisa morafe wa ga eno; go bua Morena Modimo.”
Iseraele o a šafadiwa
16Gape lefoko la ga Jehofa la tla mo go nna, la re: 17“Morwa motho, e rile ba ntlo ya Iseraele ba sa ntse ba agile mo lefatsheng la ga bone, ba le itshekolola ka mokgwa wa bone le ka ditiro tsa bone; mokgwa wa bone fa pele ga me o ne o ntse jaaka leswe la mosadi a le medibela. 18Ke gone ka moo ka ba goromeletsa tšararego ya me ka ntlha ya madi a ba a tsholotseng mo lefatsheng, le ka go bo ba le itshekolotse ka medimo ya bone ya disetwa. 19Ka ba gasamisetsa mo merafeng, ba phatlalalediwa le mafatshe; ke ba sekisitse ka fa mokgweng wa bone le ka fa ditirong tsa bone. 20Mme e rile ba fitlha kwa merafeng, kwa ba ileng teng, ba fitlhile ba tlhapatsa leina la me le le boitshepo; ka batho ba buile ka ga bone, ba re: Bao ke batho ba ga Jehofa, mme ba dule mo lefatsheng la gagwe. 21Mme ka tlhomogela leina la me le le boitshepo pelo, le ba ntlo ya Iseraele, ba ne ba le tlhapaditse mo merafeng, kwa ba ne ba ile teng.
22“Ke gone, raya ba ntlo ya Iseraele o re: Morena Modimo o bua jaana a re: Ga ke dire se ka ntlha ya lona, lona ba ntlo ya Iseraele, fa e se ka ntlha ya leina la me le le boitshepo, le lo le tlhapaditseng mo merafeng kwa lo ne lo ile teng. 23Ke tlaa itshepisa leina la me le legolo, le le tlhapaditsweng mo merafeng, le lo le tlhapaditseng mo gare ga yona; mme merafe e tlaa itse fa ke le Jehofa, go bua Morena Modimo, mogang ke itshepisiwang mo go lona fa pele ga matlho a yona. 24Gonne ke tlaa lo tsaya mo merafeng ke lo phutha kwa mafatsheng otlhe, mme ke tlaa lo lere mo lefatsheng la ga lona. 25Foo ke tlaa lo kgatsha ka metsi a a itshekileng, mme lo tlaa itsheka; ke tlaa lo tlhapisa leswe lotlhe la lona, le medimo yotlhe ya lona ya disetwa. 26Le gone ke tlaa lo naya pelo e ntšha, ke tlaa tsenya mowa o moša mo teng ga lona; ke tlaa tlosa pelo ya sekalentswe mo nameng ya lona, mme ke tlaa lo naya pelo ya senama. 27Ke tlaa tsenya mowa wa me mo teng ga lona, ke tlaa lo tsamaisa mo ditaong tsa me, lo tlaa tshegetsa dikatlholo tsa me, lo di dira. 28Lo tlaa aga mo lefatsheng le ke le neileng borraeno; lo tlaa nna batho ba me, le nna ke tlaa nna Modimo wa lona. 29Ke tlaa lo dibela mo masweng otlhe a lona; ke tlaa bitsa mabele, ke a ntsifatsa, ke sa beye popamo epe mo go lona. 30Ke tlaa ntsifatsa loungo lwa setlhare, le totafalo ya masimo, mme ga lo ketla lo tlhola lo kgojwa ka tlala mo merafeng. 31Foo lo tlaa gakologelwa mekgwa ya lona e e bosula, le ditiro tsa lona tse di seng molemo; lo tlaa itshulafalela mo ponong ya lona ka ntlha ya maikepo a lona, le ka ntlha ya tse di makgapha tsa lona. 32A go itsiwe ke lona go re mo ga ke go dire ka ntlha ya lona, go bua Morena Modimo; tlhajwang ke ditlhong, lo sosobagane ka ntlha ya mekgwa ya lona, lona ba ntlo ya Iseraele.”
33“Morena Modimo o bua jaana, a re: E tlaa re mo motlheng o ke lo tlhapisang ka one maikepo otlhe a lona, ke tlaa dira gore metse e nnwe, mme mafelo a a ropefetseng a tlaa agiwa. 34Le lefatshe le le kileng la ne le swafetse le tlaa lengwa, le mororo le ne le le tshwafalo fela mo ponong ya botlhe ba ba fetang ka teng. 35Ba tlaa bua ba re: ‘Lefatshe le, le le kileng la ne le swafetse, le bile le fetogile le ntse jaaka tshimo ya Etene; le metse e e neng e kgakgabetse, e swafetse, e le marope fela, e bile e thekeleditswe, e ntswe ke batho.’ 36Foo merafe e e setseng mo tikologong ya lona e tlaa itse fa nna Jehofa ke agile mafelo a a ne a rutlologile, ke tlhomile mo go neng go swafetse; nna Jehofa ke buile, mme ke tlaa go dira.”
37Morena Modimo o bua jaana, a re: “Le ka ga sone se, ke tlaa bodiwa ke ba ntlo ya Iseraele go se ba direla; ke tlaa ba atisetsa batho jaaka letsomane. 38Jaaka letsomane la setlhabelo, jaaka letsomane la Jerusalema mo medirong ya one e e laotsweng; jalo fela metse e e ropefetseng e tlaa tlala matsomane a batho; mme ba tlaa itse fa ke le Jehofa.”
