ESERA 10

₁Jaana ya re Esera a sa ntse a rapela, a dira boipolelo, a lela, a itatlhela fa fatshe fa pele ga ntlo ya Modimo, ga bo go phuthegetse kwa go ene phuthego e kgolo thata ya banna le basadi le banyana ba ba tswang mo Iseraele; gonne batho ba lela mo go botlhoko. ₂Mme Shekania morwa Jehiele, mongwe wa bomorwa Elame, a fetola a raya Esera a re: “Re leofetse Modimo wa rona, re nyetse basadi ba seeng ba ditšhaba tsa lefatshe; le fa go ntse jalo jaana go na le tsholofelo ka ga Iseraele ka ga selo se. ₃Ke gone jaana, ra re: A re direng kgolagano le Modimo wa rona ya go tlhala basadi bao botlhe, le botlhe ba ba tsetsweng ke bone, ka fa kgakololong ya morena wa me, le ya ba ba roromelang taolo ya Modimo wa rona; mme a go dirwe ka fa molaong. ₄Nanoga; gonne ke tiro ya gago, mme le rona re na nao; nametsega, mme o go dire.”

₅Foo Esera a nanoga, a ikanisa ditlhogo tsa baperesiti, le Balefi, le Baiseraele botlhe, go re, ba tlaa dira ka fa lefokong le. Jalo ba ikana. ₆Foo Esera a nanoga fa pele ga ntlo ya Modimo, a tsena mo ntlwaneng ya ga Johanane morwa Eliašibe; ya re a fitlha gone a se ka a ja dijo, le fa e le go nwa metsi; gonne o ne a hutsafaletse tlolo ya bone ba botshwaro.

₇Mme ba opa mokgosi mo lefatsheng lotlhe la Juta le Jerusalema mo baneng botlhe ba botshwaro, gore ba phuthegele kwa Jerusalema; ₈le go re le fa e le mang yo o sa tleng malatsi a le mararo a ise a fete, ka fa kgakololong ya dikgosana le bagolwane, dilo tsa gagwe tsotlhe o tlaa di thukhuthwa, le ene a kgaolwa mo phuthegong ya ba botshwaro. ₉Foo banna botlhe ba Juta le Benjamine ba phuthegela kwa Jerusalema mo malatsing a mararo; e le kgwedi ya bofera o le mongwe, le letsatsi la 20 la kgwedi, mme batho botlhe ba dula mo felong fa go atlhameng fa pele ga ntlo ya Modimo, ba roroma ka ntlha ya selo se, le ka ntlha ya pula e tona.

₁₀Esera moperesiti a ema a ba raya a re: “Lo tlodile, lo nyetse basadi ba seeng go tla lo totisa molato wa Baiseraele. ₁₁Ke gone jaana dirang boipolelo mo go Jehofa Modimo wa borraeno lo bo lo dire go rata ga gagwe; lo ikgaoganye le ditšhaba tsa lefatshe, le bone basadi ba seeng.”

₁₂Foo phuthego yotlhe ya mo fetola, ya bua ka lentswe le le tsholetsegileng ya re: “Jaaka o buile ka ga rona, re na le go dira fela jalo. ₁₃Batho re bantsi e bile ke lobaka lwa pula e kgolo, ga re a nonofa go ema kwa ntle, le gone tiro ga se ya letsatsi le le lengwe fela kgotsa ya a le mabedi; gonne re tlodile thata mo selong se. ₁₄A dikgosana tsa rona di tlhomelwe phuthego yotlhe jaana, mme a botlhe ba ba mo metseng ya rona, ba ba nyetseng basadi ba seeng, ba tle ka dipaka tse di tlaa tlhongwang, bagolwane ba motse mongwe le mongwe ba na nabo, le baatlhodi ba teng, go tsamaya bogale jo bo tukang jwa Modimo wa rona bo busiwe mo go rona, go tsamaye tiro e e fele.” ₁₅Jonathane morwa Asahele le Jahaseia morwa Tikefa ya nna bone bosi ba ba emeng ba gana selo se: Mešulame le Shabethai wa Molefi ba ba thusa.

₁₆Bana ba botshwaro ba dira jalo. Esera moperesiti a na le bangwe ba ditlhogo tsa makgotla a borara, ka fa makgotleng a borra ba bone, mme botlhe ba lomololwa ka maina a bone; mme ba dula ka letsatsi la ntlha la kgwedi ya lesome, go tla ba sekaseka selo se. ₁₇Ka ga banna botlhe ba ba nyetseng basadi ba seeng, e rile go tla letsatsi la ntlha la kgwedi ya ntlha ba bo ba weditse.

₁₈Mo go bomorwa baperesiti ga fitlhelwa bangwe ba ba nyetseng basadi ba seeng, e bong mo go bomorwa Ješua morwa Josatake le bomonnawe, Maaseia, le Eliesere, le Jaribe, le Getalia. ₁₉Mme ba ikwala gore ba tlaa tlhala basadi ba bone; mme e re ka ba le molato ba isa phelefu ya letsomane tshupelelo ya molato wa bone.

₂₀Ba bomorwa Imere: Hanani le Shebedia.

₂₁Bo bomorwa Harime: Maaseia le Elija, le Shemaia, le Jehiele, le Usia.

₂₂Ba bomorwa Pašure: Elioenai, Maaseia, Išemaele, Nathanaele, Josabate le Elasa. ₂₃Le ba Balefi: Josabate, Shimei, Kelaia (ke ene Kelita), Pethahia, Juta le Eliesere. ₂₄Wa baopedi: Eliašibe, le ba balebedi ba kgoro: Shalume, Teleme le Uri. ₂₅Baiseraele, ba bomorwa Paroše: Ramia, Isia, Malekia, Mijamine, Eleasare, Malekia le Benaia.

₂₆Ba bomorwa Elame: Matania, Sekaria, Jehiele, Abadi, Jeremothe le Elija.

₂₇Ba bomorwa Satu: Elioenai, Eliašibe, Matania, Jeremothe, Sabate le Asise.

₂₈Ba bomorwa Bebai: Johanane, Hanania, Sabai, Athelai.

₂₉Ba bomorwa Bani: Mešulame, Maluke, le Ataia, Jašube, Sheale le Jeremothe.

₃₀Ba bomorwa Pahathe-moabe: Atena, Kelale, Benaia, Maaseia, Matania, Besalele, Binui le Manase.

₃₁Ba bomorwa Harime: Eliesere, Isia, Malekia, Shemaia, Shimeone, ₃₂Benjamine, Maluke, Shemaria.

₃₃Ba bomorwa Hašume: Matenai, Matata, Sabate, Elifelete, Jeremai, Manase, Shimei.

₃₄Ba bomorwa Bani: Maatai, Amerame, le Uele; ₃₅Benaia, Beteia, Keluhi; ₃₆Fania, Meremothe, Eliašibe; ₃₇Matania, Matenai le Jaasu; ₃₈le Bani, Binui, Shimei; ₃₉le Shelemia, Nathane le Ataia; ₄₀Makenatebai, Shašai, Sharai; ₄₁Asarele, le Shelemia, Shemaria; ₄₂Shalume, Amaria, Josefe.

₄₃Ba bomorwa Nebo: Jeiele, Matithia, Sabate, Sebine, Ito le Joele, Benaia.

₄₄Bao botlhe ba ne ba nyetse basadi ba seeng; bangwe ba bone ba na le basadi ba ba bonyeng bana nabo.