ESERA 7

₁Jaana e rile morago ga dilo tse, mo pusong ya ga Aretaserese kgosi ya Peresia, Esera morwa Seraia, morwa Asaria, ₂morwa Hilekia, morwa Shalume, morwa Satoke, morwa Ahitube, ₃morwa Amaria, morwa Asaria, morwa Meraiothe, morwa Serahia, morwa Usi, ₄morwa Buki, morw Abišua, morwa Finehase, ₅morwa Eleasare, morwa Arone moperesiti yo mogolo; ₆Esera yoo a tlhatloga a tswa Babilone, mme a bo a le mokwadi yo o bobebe mo molaong wa ga Moše, o Jehofa Modimo wa Iseraele o ne a o beile; mme kgosi ya mo naya gotlhe ka fa o lopang ka gone, ka fa seatleng sa ga Jehofa Modimo wa gagwe se leng mo go ene ka teng.

₇Ga tlhatloga bangwe ba bana ba Iseraele, le ba baperesiti, ba Balefi, ba baopedi, ba balebedi ba kgoro le ba Banethinime, ba ya Jerusalema ka ngwaga wa bosupa wa ga Aretaserese kgosi. ₈Mme a fitlha kwa Jerusalema ka kgwedi ya botlhano, ke go re mo ngwageng wa bosupa wa kgosi. ₉Gonne e rile ka letsatsi la ntlha la kgwedi ya ntlha, a simolola go bolola kwa Babilone, ya re ka letsatsi la ntlha la kgwedi ya botlhano a fitlha mo Jerusalema, ka fa seatla se se molemo sa Modimo wa gagwe se leng mo go ene ka gone. ₁₀Gonne Esera o ne a itlhomamisitse pelo gore o tlaa batla molao wa ga Jehofa, a ba a o dira, a ba a ruta batho melao le dikatlholo mo Iseraele.

₁₁Jaana a ke malebela a lokwalo lo kgosi Aretaserese o lo neileng Esera moperesiti, mokwadi, e bong mokwadi wa mafoko a ditaolo tsa ga Jehofa, le wa melao ya gagwe e o e neetseng Baiseraele. ₁₂A re: “Aretaserese, kgosi ya dikgosi, go Esera moperesiti, mokwadi wa molao wa Modimo wa legodimo, yo o itekanetseng, a kwala jaana le jaana, ka re: ₁₃Ke ntsha taolo, gore bone botlhe batho ba Iseraele, mo bogosing jwa me, le baperesiti ba bone, le Balefi ba ba ratang ka pelo ya bone go ya Jerusalema, ba ye nao. ₁₄E re ka o rongwa ke kgosi le bagakolodi ba yone ba supa, wa ya go botsa ka ga Juta le Jerusalema, ka fa molaong wa Modimo wa gago, o o mo seatleng sa gago; ₁₅le go isa selefera le gouta tse kgosi le bagakolodi ba yone ba di neileng Modimo wa Iseraele ka pelo e e beleegang, Modimo o bonno jwa one bo leng kwa Jerusalema. ₁₆Le selefera sotlhe le gouta tse o tla di fitlhelang mo lefatsheng lotlhe la Babilone, di na le neo ya batho e e leng ya pelo e e beleegang fela, le ya baperesiti, ba ntshetsa ntlo ya Modimo e e kwa Jerusalema ka pelo e e thamileng fela; ₁₇ke gone o reke ka tlhoafalo yotlhe ka madi ao, dipoo le diphelefu le dikwanyana, di na le dithsupelo tsa tsone tsa boupe, le ditshupelo tsa tsone tsa noo, o di ise tshupelo mo sebesong sa ntlo ya Modimo wa lona, e e kwa Jerusalema.

₁₈“Se se tlaa nnang molemo mo matlhong a gago le a bana ba ga rraago go se dira ka selefera le gouta tse di salang, lo dire sone ka fa go rateng ga Modimo wa lona. ₁₉Le dilwana tse o di neelwang tsa tirelo ya ntlo ya Modimo wa gago, o di fitlhise fa pele ga Modimo wa Jerusalema. ₂₀Sengwe se sele se se ka tlhokafalang mo ntlong ya Modimo wa gago, se o bonang o tshwanetse go se ntsha, o se ntshe fela mo ntlong ya kgosi ya dikhumo.

₂₁“Mme nna, e bong nna, Aretaserese kgosi, ke ntshetsa baboloki botlhe ba dikhumo ba ba kwa moseja ga noka taolo, go re sengwe le sengwe se Esera moperesiti, mokwadi wa molao wa Modimo wa legodimo, o tlaa se lopang mo go lona, se dirwe fela ka tlhoafalo yotlhe, ₂₂go ya go fitlha kwa dikilokerameng de le 3 400 tsa selefera, dikgetsi tsa mabele, di le 100, dilitara tsa bojalwa jwa mofine di le 2 000, dilitara tsa lookwane di le 2 000 le letswai le le sa balweng selekanyo. ₂₃Sengwe le sengwe se se laotsweng ke Modimo wa legodimo, a se direlwe ntlo ya Modimo wa legodimo fela jalo; gonne bogale bo ka bo bo wela go reng mo bogosing jwa kgosi le bomorwa yone? ₂₄Gape re a lo itsise ka ga baperesiti le Balefi, baopedi, balebedi ba kgoro, Banethimine, le batlhanka ba ntlo eo ya Modimo, go re, e tlaa bo e le go tlola molao fa lo tsaya lekgetho, sehuba, kgotsa morokotso mo go bone.

₂₅“Mme wena Esera, ka fa botlhaleng jwa Modimo wa gago, jo bo mo seatleng sa gago, o tlhome basiamisi le baatlhodi ba ba tlaa atlholang batho botlhe ba ba kwa moseja ga noka, botlhe ba ba itseng melao ya Modimo wa gago; lo rute bone ba ba sa e itseng. ₂₆Le fa e le mang yo o ganang go dira molao wa Modimo wa gago, le molao wa kgosi, a a sekisiwe ka tlhoafalo yotlhe, le fa e ka bo e le ka go bolawa, gongwe ka go lelekwa, kgotsa ka go gapelwa dilo, kgotsa ka go tsenngwa mo ntlong ya kgolegelo.”

₂₇A go bakweng Jehofa, Modimo wa borraetsho, yo o tsentseng selo se se ntseng jalo mo pelong ya kgosi, go kgabisa ntlo ya ga Jehofa e e mo Jerusalema; ₂₈a bile a nkatlabaleleditse pelonomi fa pele ga kgosi le bagakolodi ba yone, le fa pele ga dikgosana tse dikgolo tsa kgosi; mme ka thatafadiwa ka fa seatla sa ga Jehofa Modimo wa me se ile sa nna mo go nna ka gone, mme ka phutha mo go Baiseraele banna ba e leng ditlhogo, gore ba tsamaye le nna.