GENESISE 37

₁Jakobe a aga mo lefatsheng la majako a ga rraagwe, mo lefatsheng la Kanana.

₂Tse ke dipolelo kaga ba ga Jakobe.

Josefe a le dinyaga di le 17, a disa letsomane a na le bomogolowe; a bo a le lekawana a na le bomorwa Bileha, le bomorwa Silepa, basadi ba ga rraagwe. Josefe a isa polelo e e bosula ka ga bone kwa go rraagwe.

₃Jaana Iseraele a bo a rata Josefe bogolo go bana botlhe ba gagwe, ka gobo e le ngwana wa botsofe jwa gagwe; mme a mo direla kobo e e mebala mentsi. ₄Bomogolowe ba bona fa rraabo a mo rata bogolo go bone botlhe; mme ba mo ila, ba ne ba sa kake ba bua nae sentle gope.

₅Josefe a lora toro, a e bolelela bomogolowe; mme ba mo ila segolo bogolo. ₆A ba raya a re: “Ke a lo rapela, a ko lo utlwe toro e ke e lorileng: ₇Gonne, bonang, re ne re bofa dingata tsa mabele mo leoteng, mme ka tshoganetso ngata ya me ya nanoga ya ba ya ema ya tsepalala, mme dingata tsa lona tsa tla tsa e dikanyetsa, tsa ikobela ngata ya me.”

₈Bomogolowe ba mo raya ba re: “A tota o gopola gore o ka re busa? Le gone a o gopola gore o ka re laola?” Ba fela ba mo ila segolo bogolo ka ntlha ya ditoro tsa gagwe le mafoko a gagwe.

₉A fela a lora toro e nngwe, a e bolelela bomogolowe a re: “Bonang, ke bile ke lorile toro e nngwe gape: Letsatsi le kgwedi, le dinaledi di le 11 tsa inkobela.”

₁₀A e bolelela rraagwe, le bomogolowe; rraagwe a mo kgalemela a mo raya a re: “Toro e o e lorileng ke yang? A ruri nna le mmaago, le bomogoloo, re tlaa tla go go ikobela fa fatshe?” ₁₁Bomogolowe ba mo hufegela; mme rraagwe ene a tshola polelo e ka pelo.

₁₂Bomogolowe ba ya go fudisa letsomane la ga rraabo kwa Shekeme. ₁₃Mme Iseraele a raya Josefe a re: “Kana bomogoloo ba hudisa letsomane kwa Shekeme? Ntlo, ke tlaa go roma kwa go bone.” Mme a mo raya a re: “Ke fano.”

₁₄A mo raya a re: “A ko o tsamaye jaana, o ye go bona bomogoloo gore a ba sa tshedile sentle, le letsomane a le ntse sentle; o itse go ba o tla o mpolela.” A mo roma a tswa mokgatšheng wa Heberone, mme a fitlha kwa Shekeme. ₁₅Monna mongwe a mo fitlhela, a kaila kaila fela mo nageng; mme monna yo a mmotsa a re: “O batlang?”

₁₆A re: “Ke batla bomogolole; ke a go rapela, a ko o mpolelele kwa ba hudisang gone.”

₁₇Monna yo a re: “Ba hudugile mono; gonne ke ba utlwile ba re: ‘A re yeng kwa Dothane.’ ” Josefe a latela bomogolowe, a ba fitlhela kwa Dothane. ₁₈Ba mmona a sa le kgakala; mme a re a ise a ba atamele, ba mo rera gore ba tle ba mmolaye. ₁₉Ba raana ba re: “Bonang rraditoro ke yole o etla. ₂₀Ntlong jaana; a re mmolayeng re mo latlhele mo mokoleng mongwe, re tle re re: ‘Sebatana se mo jele;’ re tlaa bona se se tlaa tswang mo ditorong tsa gagwe.”

₂₁Rubene a utlwa, mme a mo golola mo seatleng sa bone, a re: “A re se tloseng botshelo jwa gagwe.” ₂₂Rubene a ba raya a re: “Se tshololeng madi; mo latlheleng mo mokoleng o, o o mo nageng, lo se ka lwa baya seatla sepe mo go ene;” ya bo e le gore a mo golole mo seatleng sa bone, a tle a mo rebolele rraagwe. ₂₃Ga dirala ya re Josefe a fitlha kwa go bomogolowe, ba mo apola kobo ya gagwe, e bong kobo e e mebala mentsi e o e apereng. ₂₄Ba mo tsaya, ba mo latlhela mo mokoleng; mme mokole o ne o se na sepe, go ne go se na metsi mo go one.

₂₅Ba nna fa fatshe ba a ja dijo. Ba tsholetsa matlho a bone, ba leba, mme bonang, go bo go tla lesomo le le etileng la Baišemaele, ba tswa Gileate ba na le dikamela tsa bone di belesitse dilo tse di lonko lo lo monate tsa malao, le balema, le mura, ba re ba di isa kwa Egepeto. ₂₆Mme Juta a raya bomorwa rraagwe a re: “Go tlaa re thusa eng fa re bolaya monnaa rona, re loba madi a gagwe? ₂₇Ntlong, re mmapatseng mo go Baišemaele, mme a seatla sa rona se se ka sa nna mo go ene; gonne ke monnaa rona, nama ya rona.” Mme bomorwa rraagwe ba mo dumela. ₂₈Ga feta Bamidiane, e le babapatsi. Bomogoloa Josefe ba goga Josefe ba mo ntsha mo mokoleng; ba mo rekisa mo go Baišemaele ka dipapetla tsa selefera di le 20. Mme ba isa Josefe kwa Egepeto.

₂₉Rubene a boela kwa mokoleng; a ya a fitlhela Josefe a seyo mo mokoleng; mme a gagola diaparo tsa gagwe. ₃₀A boela kwa go bomonnawe a re: “Ngwana ga a yo; mme nna ke tlaa ya kae?”

₃₁Ba tsaya kobo ya ga Josefe, ba bolaya potsane, ba ina kobo mo mading. ₃₂Ba isa kobo e e mebala mentsi, ba e fitlhisa kwa go rraabo; ba re: “Selo se re se begile; a ko o sekaseke o bone gore a ke kobo ya ga morwao kgotsa nnyaa.”

₃₃A e itse, a re: “Ke kobo ya ga morwaake; sebatana se mo jele; ga go na pelaelo Josefe o gagogantswe.” ₃₄Jakobe a gagola diaparo tsa gagwe, a tswala letsela la kgetsi mo lothekeng, a lelela morwawe ka malatsi a le mantsi. ₃₅Bomorwawe botlhe, le bomorwadie botlhe ba nanoga, ba re ba a mo gomotsa; mme a gana go gomodiwa a re: “Ka gonne ke tlaa fologela mo lebitleng kwa go morwaake ke ntse ke hutsafetse fela.” Mme rraagwe a mo lelela.

₃₆Bamidiane ba feta ba mo rekisa kwa Egepeto mo go Potifare, mogolwane wa ga Faro, kgosana ya maotlana.