Josefe o tlhalosa ditoro tsa kgosi
1Ga dirala ya re kwa bokhutlong jwa dinyaga di le pedi tse di tletseng, Faro a lora, mme bonang a bo a eme fa nokeng. 2Mme bonang, ga tlhatloga dikgomo tse dinamagadi di supa mo nokeng di le mebele mentle, di nonne; tsa fula mo motlhakeng. 3Morago ga tsone ga tlhatloga dikgomo tse dingwe tse dinamagadi di supa, di le mebele e maswe, di le mekoduwe, tsa ema fa dikgomong tse dingwe tse dinamagadi, fa losing lwa noka. 4Dikgomo tse dinamagadi tse di mebele e maswe, tse di mekoduwe, tsa a ja tsa fetsa dikgomo tse dinamagadi tse di mebele mentle, tse di nonneng. Foo Faro a thanya. 5A robala a ba a lora lwa bobedi; mme bona diako tsa mabele di supa tsa tswa mo lotlhakeng lo le longwe fela, di nonne, di le molemo. 6Mme bonang, diako di supa, tse di se nang sepe, tse di tshubilweng ke phefo ya botlhabatsatsi, di tlhoga morago ga tsone. 7Diako tse di swabileng tsa kometsa diako tse supa tse di nonneng tse di tletseng; Faro a thanya, a lemoga fa a ne a lora. 8Ga dirala ya re ka moso mowa wa gagwe wa bo o fuduegile, ka moo a roma a bitsa dingaka tsotlhe tsa Egepeto, le ba botlhale botlhe ba gone. Faro a ba bolelela toro ya gagwe; mme ga bo go se na ope yo o ka e mo phuthololelang.
9Foo, ga bua motshola phafana yo mogolo, a raya Faro a re: “Ke gakologelwa melato ya me gompieno. 10Faro o kile a re a le bogale le batlhanka ba gagwe, a ntsenya mo tisong mo ntlong ya kgosana ya maotlana, nna le moapei yo mogolo. 11Ra lora toro mo bosigong bo le bongwe fela, nna le ene; ra lora mongwe le mongwe ka fa phuthololong ya toro ya gagwe. 12Ga bo go na le lekau gone le rona, la Mohebere, motlhanka wa kgosana ya maotlana; mme ra mmolelela, mme a re phuthololela ditoro tsa rona; a phuthololela mongwe le mongwe ka fa torong ya gagwe. 13Ga dirala fela jaaka a re phuthololetse, ga nna fela jalo; nna a mpusetsa mo tirong ya me, ene a mo pega.”
14Foo Faro a roma a bitsa Josefe, mme ba mo ntsha ka potlako mo moleteng, mme a ipeola, a apara diaparo di sele, a ya a tsena kwa go Faro. 15Faro a raya Josefe a re: “Ke lorile toro, mme ga go na ope yo o ka e mphuthololelang; ke utlwile ka ga gago ga twe, e a re fa o utlwa toro o e phutholole.”
16Josefe a fetola Faro a re: “Ga go yo mo go nna; Modimo o tlaa naya Faro phetolo ya kagiso.”
17Faro a raya Josefe a re: “Mo torong ya me, bona, ke ne ke eme fa losing lwa noka. 18Mme bona, ga tlhatloga dikgomo tse dinamagadi di supa mo nokeng, di nonne di le mebele mentle; tsa fula mo motlhakeng. 19Mme bona, dikgomo tse dinamagadi di supa tsa tlhatloga morago ga tsone, di le mekoduwe, di le mebele e maswe thata, di le lopatiko, tse ke iseng ke ke ke bone tse di tshwanang natso gope mo lefatsheng lotlhe la Egepeto ka bomaswe jwa tsone. 20Dikgomo tse dinamagadi, tse di mekoduwe tse di mebele e maswe, tsa a ja tsa swetsa dikgomo tse dinamagadi tsa pele tse di nonneng. 21E rile di sena go di ja di di swetsa, go ne go sa ka ke ga itsiwe fa di di jele; tsa bo di sa ntse di le mebele e maswe jaaka mo tshimologong. Foo ka thanya. 22Ka bona mo torong ya me, bonang, go tswa diako di supa mo lotlhakeng lo le longwe fela, di tletse, di le molemo. 23Mme bona, diako di supa tse di swabileng, tse di se nang sepe, di tshubilwe ke phefo ya botlhabatsatsi, tsa tlhoga morago ga tsone. 24Diako tse di se nang sepe tsa kometsa diako tse supa tse dintle; mme ka e bolelela dingaka, ga bo go se na ope yo o ka e nthanolelang.”
25Josefe a raya Faro a re: “Toro ya ga Faro nngwe fela; se Modimo o tlogang o se dira, o se boleletse Faro. 26Dikgomo tse dinamagadi, tse supa, tse di molemo, ke dinyaga di supa; le diako tse supa tse di molemo, ke dinyaga di supa; toro nngwe fela. 27Dikgomo tse dinamagadi tse di mekoduwe, tse di mebele a maswe, tse di tlhatlogileng morago ga tsone, ke dinyaga di supa, le tsone diako tse di se nang sepe, tse di tshubilweng ke phefo ya botlhabatsatsi, di tlaa nna dinyaga di supa tsa leuba. 28Ke sone se ke se buileng le Faro; se Modimo o tlogang o se dira o se supeditse Faro. 29Bona, go tla dinyaga di supa tsa letlotlo le legolo la dijo mo lefatsheng lotlhe la Egepeto. 30Morago ga tsone go tlaa tsoga dinyaga di supa tsa leuba; letlotlo lotlhe le tlaa lebalwa mo lefatsheng la Egepeto; mme leuba le tlaa fedisa lefatshe. 31Letlotlo ga le ketla le itsiwe mo lefatsheng ka ntlha ya leuba leo le le le latelang; ka le tlaa nna botlhoko thata. 32E re ka toro e le sebedi e diretswe Faro gabedi, ke ka gonne selo se se tlhomamisitswe ke Modimo, Modimo o tlaa akofa o se dirafatsa.
33“Ke gone jaana, a Faro a lebalebe monna yo o tlhaloganyang, yo o botlhale, a mo tlhome go nna tlhogo ya lefatshe la Egepeto. 34A Faro a dire mo, a tlhome balebalebedi ba lefatshe, ba tseye sa botlhano sa lefatshe la Egepeto ka dinyaga tse supa tsa letlotlo. 35Ba kgobokanye dijo tsotlhe tsa dinyaga tse di molemo, tse di tlang, ba phuthele mabele mo seatleng sa ga Faro, go nna dijo mo metseng, mme ba a boloke. 36Dijo tse di tlaa nna sebolokelwa lefatshe, go lebelela dinyaga tse di supang tsa leuba, tse di tlaa nnang mo lefatsheng la Egepeto; gore lefatshe le se ka la nyelela ka leuba.”
Josefe o dirwa molaodi wa Egepeto
37Selo se sa nna molemo mo matlhong a ga Faro le mo matlhong a batlhanka botlhe ba gagwe. 38Faro a raya batlhanka ba gagwe a re: “A re ka bona mongwe yo o ntseng jaaka yo, e le monna yo mowa wa Modimo o ntseng mo go ene?” 39Faro a raya Josefe a re: “E re ka Modimo o go supeditse tsotlhe tse, ga go na ope yo o tlhaloganyang le fa e le yo o botlhale jaaka wena. 40O tlaa nna tlhogo ya ntlo ya me: batho botlhe ba me ba tlaa laolwa ka fa lefokong la gago; fa e se mo setulong sa bogosi fela, ke tlaa nna mogolo mo go wena.” 41Faro a raya Josefe a re: “Bona, ke go tlhomile go nna tlhogo ya lefatshe lotlhe la Egepeto.” 42Faro a rola lenyena le le kanang mo seatleng sa gagwe, a le rwesa Josefe mo seatleng, a mo apesa diaparo tsa leloba le le boleta, a ba a mo apesa mpolokwane wa gouta ma thamong ya gagwe. 43A mo palamisa kara ya bobedi e o nang nayo; mme ba goa fa pele ga gagwe ba re: “Khubamang ka mangole;” a mo tlhoma go nna tlhogo ya lefatshe lotlhe la Egepeto. 44Faro a raya Josefe a re: “Ke nna Faro, kwa ntle ga gago ga go ketla go tsholetsa ope letsogo la gagwe le fa e le lonao lwa gagwe mo lefatsheng lotlhe la Egepeto.” 45Faro a raya Josefe leina a re, Safenathe-panea; a mo naya Asenathe morwadia Potifera, moperesiti wa One, go nna mosadi wa gagwe. Josefe a tswa a ralala-ralala lefatshe la Egepeto. 46Josefe o rile a ema fa pele ga Faro kgosi ya Egepeto a bo a le dinyaga di le 30. Mme Josefe a tswa fa pele ga Faro, a ya a ralala-ralala lefatshe lotlhe la Egepeto. 47Ya re mo dinyageng tse di supang tsa letlotlo lefatshe la ungwa ka thata e kgolo. 48A kgobokanya dijo tsotlhe tse di mo lefatsheng la Egepeto tsa dinyaga tseo tse di supang, a baya dijo tseo mo metseng; dijo tsa naga e e tikologong ya motse mongwe le mongwe a di beye mo motseng oo. 49Josefe a kgobokanya mabele a nna jaaka mošawa wa lewatle, a le magolo thata, a ba a tla a lesa go bala; gonne a ne e se na palo.
50Josefe a bona bana ba basimane ba le babedi ngwaga wa leuba o ise o tle, ba Asenathe morwadia Potifera, moperesiti wa One, a ba bonyeng nae. 51Josefe a raya wa ntlha leina a re Manase; gonne a re: “Modimo o ntebaditse letsapa lotlhe la me le ntlo yotlhe ya ga rre.” 52A raya wa bobedi leina a re Eferaime; gonne a re: “Modimo o nkungwisitse mo lefatsheng la pogiso ya me.”
53Dinyaga tse, tse di supang tsa letlotlo le le mo lefatsheng la Egepeto, tsa khutla. 54Dinyaga tse di supang tsa leuba tsa simolola go tla, ka fa Josefe o buileng ka gone; mme ga nna leuba mo mafatsheng otlhe; mme mo lefatsheng la Egepeto ga bo go na le dijo. 55E rile lefatshe lotlhe la Egepeto le bolailwe ke tlala, batho ba ikuela Faro, ba batla dijo. Faro a raya Baegepeto botlhe a re: “Yang kwa go Josefe; se o se lo rayang lo se dire.” 56Leuba la bo le wetse lefatshe lotlhe fela; mme Josefe a bula matlo otlhe a a boloketseng, a rekisa mo go Baegepeto; mme leuba la nna botlhoko mo lefatsheng la Egepeto. 57Mafatshe otlhe a ya kwa Egepeto kwa go Josefe go reka mabele; ka gobo leuba le ne le le botlhoko mo lefatsheng lotlhe fela.
