GENESISE 44

₁A laola molebalebi wa ntlo ya gagwe a re: “Thela mabele mo dikgetseng tsa banna bao, ka fa ba nonofileng go tsaya ka gone, o tsenye madi a mongwe le mongwe mo molomong wa kgetse ya gagwe. ₂Senwelo sa me, senwelo sa selefera, o se tsenye mo molomong wa kgetse ya yo mmotlana, le madi a gagwe a mabele.” A dira ka fa lefokong le Josefe o le buileng. ₃E rile bosigo bo sena go sa, banna bao ba newa tsela, bone le diesela tsa bone. ₄E rile ba sena go tswa mo motseng, ba ise ba ye kgakala, Josefe a raya molebalebedi wa gagwe a re: “Nanoga o latele banna bale; o tlaa re o ba tshwara, o ba reye o re: ‘Ana lo dueletseng molemo ka bosula? ₅A ga se sone se morena wa me o nwelang mo go sone, e bile e le sone, ruri, bola jo o laolang ka jone? Lo dirile bosula ka go dira jalo.’ ”

₆Mme a ba tshwara, a bua mafoko a nabo. ₇Ba mo raya ba re: “Morena wa rona, o buelang mafoko a a ntseng jaana? A go se tualo go re, batlhanka ba gago ba ka dira se se ntseng jalo. ₈Bona, madi a re a fitlhetseng mo melomong ya dikgetse tsa rona, ra ba ra a tlisa gape kwa go wena re tswa lefatsheng la Kanana; ana foo re ne re tlaa utswa jang selefera le fa e le gouta mo ntlong ya morena wa gago? ₉Le fa e le mang wa batlhanka ba gago yo se tlaa bonwang mo go ene a a swe, le rona re nne batlhanka ba morena wa rona.”

₁₀Mme a re: “Jaana le gale a go nne ka fa mafokong a lona; ene yo se tlaa bonwang mo go ene, o tlaa nna motlhanka wa me, lona lo tlaa bo lo se na molato.” ₁₁Foo ba akofa, mongwe le mongwe a pagolola kgetse ya gagwe a e baya fa fatshe, mme mongwe le mongwe a bofolola kgetse ya gagwe. ₁₂A hukutsa, a simolola ka yo mogolo, a khutla ka yo mmotlana; mme senwelo sa fitlhelwa mo kgetseng ya ga Benjamine. ₁₃Foo ba ikgagola diaparo, mongwe le mongwe a belesa esela ya gagwe, ba boela kwa motseng.

₁₄Juta le bomorwa rraagwe ba fitlha kwa ntlong ya ga Josefe, mme a bo a sa ntse a le gone; mme ba wela fa fatshe fa pele ga gagwe. ₁₅Josefe a ba raya a re: “Ana tiro e lo e dirileng ke efe? A ga lo itse fa ruri motho yo o ntseng jaaka nna a ka laola ka bola?”

₁₆Juta a re: “Re tlaa bua le morena wa me re reng? Ana re tlaa buang, kgotsa re tlaa ikgolola jang mo molatong? Modimo o tshwere boleo jwa batlhanka ba gago; bona, re batlhanka ba gago morena, rona le ene yo senwelo se bonyweng mo seatleng sa gagwe.”

₁₇Mme a re: “A go se tualo, gore ke ka dira jalo; monna yo senwelo se bonyweng mo seatleng sa gagwe, ene o tlaa nna motlhanka wa me; ka ga lona, tlhatlogelang kwa go rraa lona ka kagiso.”

₁₈Foo Juta a atamela fa go ene a re: “Morena wee, ke a go rapela, a ko o mme motlhanka wa gago a bue lefoko mo ditsebeng tsa morena wa me, a bogale jwa gago bo se tukele motlhanka wa gago; gonne o ntse fela jaaka Faro. ₁₉Morena wa me o kile a botsa batlhanka ba gagwe a re: ‘A lo na le rraeno, le fa e le monnaa lona?’ ₂₀Ra raya morena wa me ra re: ‘Re na le rraa rona, monnamogolo, o na le ngwana wa botsofe jwa gagwe, yo monnye; mogolowe o sule, mme o setse a le esi wa ga mmaagwe, rraagwe o a mo rata.’ ₂₁Mme wa raya batlhanka ba gago wa re: ‘Lo tle nae kwano go nna gore ke mmone.’ ₂₂Ra raya morena wa me ra re: ‘Mosimane ga a ka ke a tlogela rraagwe; gonne e tlaa re fa a ka tlogela rraagwe, rraagwe o ka swa.’ ₂₃Wena wa raya batlhanka ba gago wa re: ‘Fa monnaa lona yo mmotlana a sa tle le lona, ga lo ketla lo tlhola lo bona sefatlhogo sa me.’

₂₄“Mme ya re re fitlha kwa go rre motlhanka wa gago, ra mmolelela mafoko a morena wa me. ₂₅Mme rraetsho a re: ‘Yang gape, lo re rekele dijonyana.’ ₂₆Ra re ga re ka ke ra fologa; fa monnaa rona yo mmotlana re sa ye nae, foo ga re nka re fologa; gonne ga re ka ke ra bona sefatlhogo sa monna yole fa monnaa rona yo mmotlana re sa na nae. ₂₇Motlhanka wa gago rre, a re raya a re: ‘Lo a itse fa mosadi wa me a ne a bona bana ba basimane ba le babedi le nna, ₂₈mme yo mongwe a tswa mo go nna, mme ka re ruri o gagogantswe; e sa le jalo ga ke ise ke be ke mmone. ₂₉Fa lo ntseela yo le ene, mme tatlhego e mo wela, lo tlaa folosetsa moriri wa me o o thuntseng ka bohutsana mo phupung.’

₃₀“Ke gone jaana e tlaa re ke fitlha kwa go motlhanka wa gago rre, mosimane re se na nae, e re ka botshelo jwa gagwe bo bofilwe mmogo le botshelo jwa mosimane, ₃₁go tlaa dirala gore e tlaa re a bona fa mosimane re se na nae, foo a swe; batlhanka ba gago ba folosetse moriri o o thuntseng wa motlhanka wa gago rraetsho, ka bohutsana mo phupung. ₃₂Gonne nna motlhanka wa gago ka ipaya boipeelo jwa mosimane kwa go rre, ka re: ‘Fa ke sa mo tlise kwa go wena, foo ke tlaa bo ke tshwerwe ke molato mo go rre ka bosakhutleng.’ ₃₃Ke gone jaana, ke a go rapela, a motlhanka wa gago a sale boemong jwa mosimane, ke nne motlhanka mo go morena wa me; mme a mosimane a tlhatloge le bomogolowe. ₃₄Gonne ke tlaa tlhatlogela jang kwa go rre, mosimane ke se na nae? Ke raya gore ke tle ke se ka ka bona bosula jo bo tlaa welang rre.”