ISAIA 20

₁E rile ka ngwaga o Taretane o tsileng mo Ašetote ka one, ka Saregone kgosi ya Asiria a mo roma, mme a tlhabana le Ašetote, a o gapa; ₂mo motlheng oo, Jehofa a bua ka Isaia morwa Amose, a re: “Tsamaya o funolole letsela la kgetse mo lothekeng lwa gago, o bo o role ditlhako mo naong tsa gago.” Mme a dira jalo, a tsamaya fela a sa ikatega, a bile a sa rwala ditlhako. ₃Jehofa a re: “Jaaka motlhanka wa me Isaia a tsamaile fela a sa ikatega, a sa rwala ditlhako ka dinyaga di le tharo, e le sesupo le kgakgamatso ka ga Egepeto le ka ga Ethiopia; ₄jalo kgosi ya Asiria e tlaa goga e isa ditshwarwa tsa Egepeto le bafaladi ba Ethiopia, ba bannye le ba batsofe, ba sa ikatega ba sa rwala ditlhako, ba le marago a a tsotsweng, go tlhabisa Egepeto ditlhong. ₅Mme ba tlaa tseanngwa ba tlhajwa ke ditlhong ka ntlha ya Ethiopia bolebelelo jwa bone, le ka ntlha ya Egepeto kgalalelo ya bone. ₆Banni ba lefatshe le, le le ikamileng lewatle, ba tlaa bua mo letsatsing leo, ba re: ‘Bonang, go dirafetse jaana mo go bone ba re neng re ba ikantse, re tshabetse kwa go bone re senka thuso, gore re gololwe mo kgosing ya Asiria; mme rona, ana re tlaa falola jang?’ ”