ISAIA 30

₁“Ija! A bo go latlhega bana ba ba dirukhutlhi,” go bua Jehofa, “ba ba lopang kgakololo, mme e seng mo go nna; ba bipa ka sebipo, mme e seng ga mowa wa me, gore ba oketse boleo ka boleo. ₂Ba ba dirang mosepele ba re ba ya Egepeto, mme ba se ke ba botsa molomo wa me; ba ya go ithatafatsa mo thateng ya ga Faro, le go ikanya mo moriting wa Egepeto. ₃Ke gone ka moo thata ya ga Faro e tlaa nnang ditlhong tsa lona, le go ikanya ga lone mo tshuting ya Egepeto go tlaa lo tlhakanya tlhogo. ₄Gonne dikgosana tsa gagwe di kwa Soane, le barongwa ba gagwe ba fitlhile kwa Hanese. ₅Botlhe ba tlaa tlhabisiwa ditlhong ke batho ba ba sa kakeng ba ba direla molemo, ba ba se nang thuso, le fa e le molemo, fa e se ditlhong fela le yone kgobo.”

₆Ponelopele kaga dibatana tsa kwa ntlheng ya Borwa. Ba tla ba raletse lefatshe la tlalelo, le botlhoko jo bo molelo, kwa tau e namagadi le tau e tona di tswang gone, le šaušawane, le kgwanyape e e fofong, ba tla ba tshotse dikhumo tsa bone ba di belesitse mo magetleng a dieselana, le mahumo a bone mo diroteng tsa dikamela, ba di isa kwa tšhabeng e e se ketlang e dirana le molemo mo go bone ka sepe. ₇Gonne Egepeto o thusetsa lefela, le ka mo go se nang tiro; ke gone ka moo ke mmiditseng Rahabe yo o ntseng fela.

₈Jaana ya o se kwale fa pele ga bone mo sekwalelong, o se kwale ka go se nyenyeka mo lokwalong, gore e tle e nne selo sa motlha o o tlang, ka bosakhutleng le ka bosaengkae. ₉Gonne ke tšhaba e e tsuololang, bana ba ba akang, bana ba ba ganang go utlwa molao wa ga Jehofa; ₁₀ba ba rayang baboni, ba re: “Se boneng!” Le baperofeti, ba re: “Se re boleleleng dilo tse di siameng, buang le rona ka dilo tse di borethe, lo re bolelele ditsietso!” Ba re: ₁₁“Tlogang mo tseleng lo fapoge, khutlisang Moitshepi wa Iseraele fa pele ga rona.”

₁₂Ke gone ka moo go buang Moitshepi wa Iseraele jaana, a re: “E re ka lo nyatsa lefoko le, lo ikanya patiko le tshokamo, lo itlhabetsa ka tsone, ₁₃ke gone boikepo jo bo tlaa nnang mo go lona jaaka thubego e e gaufi le go wa, e e fapogang mo lorakong lo lo godileng, lo thubagano ya lone e tlang ka tshoganetso le ka ponyo. ₁₄O tlaa lo rabanya jaaka nkgwana ya mmopi e rabaganngwa, a e rebanye a sa rekegele; go ba go tlhokafala mo dikabetlaneng tsa yone le fa e le lobeanyana lo lo ka ogolelang molelo mo isong, le fa e le go ga metsinyana ka lone mo ledibeleng.”

₁₅Gonne go bua jaana Morena Modimo, Moitshepi wa Iseraele, a re: “Lo ne lo tlaa bolokwa ke go bowa le go ithokgamisa; mo tuulalong le mo go ikanyeng e tlaa nna thata ya lona; mme lo ganne.” ₁₆Lo ne lwa re: “Nnyaa! Re tlaa tshaba re pagame dipitse.” Ke gone lo tlaa tshabang; gape, “Re tlaa pagama tse di difadima.” Ke gone ka moo bakhukhedi ba lona ba tlaa nnang bafadima. ₁₇Batho ba le 1 000 ba tlaa tshaba ka kgalemo ya motho a le mongwe fela; lo tlaa tshaba ka kgalemo ya ba le batlhano; lo ba lo tlogelwa jaaka sesa kwa setlhoeng sa thaba, le jaaka mokgele mo thoteng. ₁₈Ke gone ka moo Jehofa o tlaa letang, gore a tle a lo tlhomogele pelo, ke gone ka moo o tlaa nanogang gore a tle a nne pelotshweu go lona; gonne Jehofa ke Modimo wa katlholo; go sego botlhe ba ba mo letang.

₁₉Gonne batho ba tlaa aga mo Sione kwa Jerusalema; ga o ketla o tlhola o lela; ruri o tlaa nna pelotshweu go wena, a utlwa lentswe la pitso ya gago; o tlaa re a utlwa a go arabe. ₂₀Le fa Morena a go naya dijo tsa pabaletso, le metsi a patikego, le fa go ntse jalo baruti ba gago ga ba ketla ba tlhola ba subega gope, matlho a gago a tlaa bona baruti ba gago. ₂₁Le ditsebe tsa gago di tlaa utlwa lefoko sefularong sa gago, le re: “Tsela ke e, tsamayang mo go yone:” Ke go re, mogang lo fapogelang ka fa letsogong le le siameng, le fa lo fapogela ka fa go la molema. ₂₂Mme lo tlaa atlafatsa sethathelelo sa selefera, sa ditshwantsho tsa disetwa tsa gago, le dipapetlana tsa gouta tse di apesitseng ditshwantsho tse di tshetsweng, o tlaa di latlha jaaka sekatana se se maswe; o tlaa se raya, o re: “Tloga fano.” ₂₃O tlaa nesetsa peo ya gago e o tlaa e jalang mo mmung pula; a go naya dijo tsa loato lwa mmu, mme e tlaa bo e le mo go nonneng, mo go letlotlo. Mo letsatsing leo dikgomo tsa gago di tlaa fula mo mafulong a a atlhameng. ₂₄Le dikgomo jalo le dieselana tse di lemang mmu, di tlaa ja dijo tse di lenko, tse di olositsweng ka seoloso le ka loselo. ₂₅Mo godimo ga thaba nngwe le nngwe e e godileng le mo lekhubung lengwe le lengwe le le godileng, go tlaa nna dinoka le dinokana tsa metsi, mo letsatsing la kgailo e kgolo, mogang dikago tsa phemelo di wang. ₂₆Gape lesedi la ngwedi le tlaa nna jaaka lesedi la letsatsi, mme lesedi la letsatsi le tlaa sedifala gasupa, jaaka lesedi la malatsi a supa; mo letsatsing le Jehofa o tlaa fapang botlhoko jwa batho ba gagwe ka lone, a fodisa titeo ya ntho ya bone.

₂₇Bonang, leina la ga Jehofa, le etla le tswa kgakala, le tuka ka bogale jwa gagwe, le ka mosi o o kalabanyeng o a kuuloga; dipounama tsa gagwe di tletse kgakalo; loleme lwa gagwe ke molelo o o lailang; ₂₈mowa wa gagwe o ntse jaaka nokana e e penologang, e e fitlhang le fa thamong, go tshetshetha merafe ka loselo lwa boithamako; mogala wa pitse o o timetsang o tlaa nna mo ditlhaeng tsa ditšhaba. ₂₉Lona lo tlaa nna le kopelo jaaka mo bosigong jwa fa go jewa moletlo o o boitshepo; le boitumelo jwa pelo jaaka fa mongwe a gwanta ka molodi wa lotlhaka, a ya kwa thabeng ya ga Jehofa, kwa Lefikeng la Iseraele.

₃₀Jehofa o tlaa utlwatsa lentswe la gagwe le lentlentle, a bonaletsa go bata ga letsogo la gagwe, le na le kgakalo ya bogale jwa gagwe, le kgabo ya molelo o o lailang, le leratla, le ledimo, le difako. ₃₁Gonne Moasiria o tlaa thubaganngwa ka lentswe la ga Jehofa, ene Moasiria yo o kileng a itaya ka thobane. ₃₂Titeo nngwe le nngwe ya thobane e e laotsweng, e Jehofa o tlaa e bayang mo go ene, e tlaa ba e nna ka meropana le ka diharepe; mme o tlaa tlhabana nabo ka ditlhabano tsa dingatetso. ₃₃Gonne felo ga phisetso go sa le go baakanngwa bogologolo; ee, go baakanyeditswe kgosi; o go epile boteng le botona; mokoa wa gone ke molelo le dikgong tse ditona; mowa wa Morena, jaaka nokana ya sulefura, o a o tshuba.