Modimo o tlhomamisetsa Iseraele
1Lo nne lo didimale
fa pele ga me, lona ditlhake;
a ditšhaba di šafatse thata ya bone;
a di atamele; foo a di bue;
a re atamalaneng re tle tshekong.
2E mang yo o tswang go tsosa
mongwe kwa botlhabatsatsi,
yo o mmiletsang fa lonaong
lwa gagwe mo tshiamong?
A aba merafe fa pele ga gagwe,
a mo laodisa dikgosi;
a di abela tšhaka ya gagwe
jaaka lorole,
a di abela bora jwa gagwe
jaaka dirite tse di gogolwang.
3O a di konatelela
mme a fete sentle fela,
le ka tsela e o ne a ise
a ke a tsamaye ka yone
ka dinao tsa gagwe.
4E mang yo o go dirileng
a go swetsa,
a bitsa ditshika tsa batho
le go tswa tshimologong?
Ke nna Jehofa,
wa ntlha, e bile ke nna
le wa bofelo, ke nna ene.
5Ditlhake tsa bona, mme tsa boifa;
dikhutlo tsa lefatshe tsa roroma,
tsa atamela, tsa tla.
6Ba ne ba thusanya,
mongwe le mongwe le wa ga gabo;
mongwe le mongwe a raya ngwana
wa ga rraagwe a re:
“O nametsege.”
7Jalo mmetli wa dikgong
a nametsa mothudi wa gouta,
yo o rethefatsang ka notwana,
a nametsa yo o batolang
mo lentswetshiping,
a bua ka ga go tshwaranya
ka selomaganyi, a re:
“Go molemo;”
mme a se kokothela ka dimapo,
gore se se tshikinyege.
8Mme wena Iseraele,
motlhanka wa me,
Jakobe yo ke go ipatletseng,
losika lwa ga Aberahame
tsala ya me;
9wena yo ke tswang go go tsaya
kwa dikhutlong tsa lefatshe,
ka go bitsa
go tswa dikgokgotsong tsa lone,
ka go raya ka re:
“O motlhanka wa me,
ke go ipatletse, ga ke a go latlha.”
10O se ka wa boifa,
gonne ke nna nao;
o se ka wa kgaoga pelo,
gonne ke Modimo wa gago;
ke tlaa go thatafatsa;
Ee, ke tlaa go thusa;
ee, ke tlaa go tshegetsa
ka seatla se se siameng
sa tshiamo ya me.
11Bona, botlhe ba ba go gakaletseng
ba tlaa tlhajwa ke ditlhong
ba sosobaganngwa;
ba ba lwang nao
ba tlaa nna jaaka bosengsepe,
mme ba tlaa nyelela.
12O tlaa ba batla,
mme ga o ketla o ba bona,
e bong ba ba ganelang nao;
ba ba tlhabanang nao
ba tlaa nna jaaka bosengsepe,
le jaaka selo sa lefela fela.
13Gonne nna, Jehofa
Modimo wa gago,
ke tlaa tshwara seatla sa gago
se se siameng,
ke go raya ke re:
“Se boife; ke tlaa go thusa.”
14O se ka wa boifa,
wena seboko Jakobe,
le lona banna ba Iseraele;
ke tlaa go thusa, go bua Jehofa,
mme Morekolodi wa gago
ke Moitshepi wa Iseraele.
15Bona, ke tlaa go direla sephotho
se seša se se bogale,
se se nang le meno:
o tlaa photha dithaba,
o di gaila, di nna masesane;
makhubu o tlaa a etsa
mmoko fela.
16O tlaa a olosa,
mme phefo e tlaa a kgophola,
le setsuatsue se tlaa a phatlalatsa;
wena o tlaa itumela mo go Jehofa,
o kgana ka Moitshepi wa Iseraele.
17Bahumanegi le batlhoki
ba batla metsi,
mme ga go na ape,
loleme lwa bone
lo phaphaladitswe ke lenyora.
Nna Jehofa ke tlaa ba araba,
nna Modimo wa Iseraele
ga nketla ke ba latlha.
18Ke tlaa phunya dinoka mo
dithoteng tse di leforotlho fela,
le metswedi mo gare ga megogoro;
le naga fela ke tlaa e sema
mogobe wa metsi,
le lefatshe le le omeletseng
metlhodi ya metsi.
19Ke tlaa tlhoma mosetara mo nageng,
le mosetlha, le mosilabele,
le motlhware;
ke tlaa tlhoma mo sekakeng
setlhare sa mofira,
le mopine, le sa mokuperese mmogo;
20gore ba tle ba bone,
ba itse ba akanye,
ba tlhaloganye mmogo
fa seatla sa ga Jehofa
se dirile go mo,
le go re Moitshepi wa Iseraele
o go tlhodile.
Modimo o itebaganya le medimo e e seng yone
21Supang kgang ya lona,
go bua Jehofa;
ntshang mafoko a a thata,
go bua kgosi ya ga Jakobe.
22A ba a ntshe, ba re kakanyetse
se se tlaa dirafalang;
kakanyang dilo tse di kileng tsa nna
tsa pele go re ke dife,
re tle re di akanye,
re be re itse bofelelo jwa tsone;
kgotsa lo re supetse
dilo tse di tlaa tlang.
23Kakanyang dilo
tse di tlaa namang di tla
gore re tle re itse fa lo le medimo.
Ee, dirang molemo
gongwe lo dire bosula,
gore re kobakobane,
re go bone mmogo.
24Bonang, lo ba ba seng sepe,
le tiro ya lona ke ya lefela fela;
o maswe, ene yo o lo itshenkelang.
25Ke tsositse mongwe
a tswa botsheka, mme o tsile;
kwa botlhabatsatsi mongwe
yo o bitsang leina la me;
o tlaa tla mo balaoding
jaaka mo seretseng,
le jaaka mmopi a tle
a gate letsopa.
26E mang yo o se kakantseng
le mo tshimologong
gore re ke re itse?
Kgotsa mo go sa bolong,
gore re ke re re: “O siame”?
Ee, ga go ope yo o kakanyang;
ee, ga go ope yo o supang;
ee, ga go ope yo o utlwang
mafoko a lona.
27Nna pele ke tlaa raya Sione, ke re:
Bona, o ba lebe;
mme ke tlaa naya Jerusalema
mongwe yo o tlisang mafoko
a a molemo.
28Mme e a tle e re fa ke leba
go bo go se monna ope;
le mo go bone tota
ga go na mogakolodi ope,
yo e ka reng fa ke ba botsa
a ba a ka mphetola ka lefoko lepe.
29Bonang, bone botlhe fela
ditiro tsa bone ke boithamako
le bosengsepe fela;
ditshwantsho tsa bone
tse di tshetsweng ke phefo fela
le madubadube fela.
