Jehofa ke ene esi Modimo
1“Le fa go ntse jalo, utlwa jaana,
wena Jakobe motlhanka wa me;
le Iseraele yo ke go itshenketseng;
2go bua jaana,
Jehofa yo o go dirileng,
a go bopa o sa le mo sebopelong,
yo o tlaa go thusang, a re:
Se boife wena Jakobe,
motlhanka wa me;
le wena Ješurune
yo ke go itshenketseng.
3Gonne ke tlaa tshela metsi
mo go ene yo o nyorilweng,
le dinokana mo lefatsheng
le le omeletseng;
losika lwa gago ke tlaa lo tshela
mowa wa me,
le matlhogela a gago tshegofatso ya me.
4Ba tlaa tlhoga mo bojangnyeng jaaka
medibonoka fa meelong ya metsi.
5Mongwe o tlaa re:
‘Nna, ke wa ga Jehofa;’
le yo mongwe o tlaa ipitsa
ka leina la ga Jakobe;
mme yo mongwe
o tlaa ikwalela Jehofa
ka seatla sa gagwe;
yo mongwe o tlaa itheta
ka leina la Iseraele.”
6Go bua jaana Jehofa, Kgosi ya Iseraele le morekolodi wa gagwe, Jehofa wa masomosomo a re:
“Ke nna wa ntlha,
ke bile ke wa bofelo,
mme kwa ntle ga me
ga go na Modimo ope.
7E mang jaaka nna, yo o tlaa bitsang,
a ba a se bolela, a se nthulaganyetsa,
ka e le nna ke baakantseng
batho ba bogologolo?
Le dilo tse di tlang,
le tse di tlaa diralang,
a ba di bolele.
8Se boifeng,
le gone lo se ka lwa tshoga;
a ga ke a go bolelela bogologolo,
ka ba ka se supa?
Mme le lona lo basupi ba me.
A go na le modimo mongwe
kwa ntle ga me?
Ee, ga go na Lefika lepe.
Nna, ga ke itse lepe.”
Jehofa o kgala boeleele jwa go obamela disetwa
9Ba ba betlang setshwantsho se se setwang ba boithamako botlhe fela; dilo tse di eletsegang tsa bone, ga di ketla di thusa sepe; le ba e leng basupi ba bone ga ba bone sepe, le gone ga ba itse, gore ba tle ba tlhajwe ke ditlhong. 10Mang yo o betlileng modimo, kgotsa a tshela setshwantsho se se setwang se se nang le thuso nngwe? 11Bonang, bankana ba gagwe ba tlaa tlhajwa ke ditlhong; mme badiri ke batho fela; a ba phuthwe mmogo, a ba eme ka dinao; ba tlaa boifa, ba tlhajwa ke ditlhong mmogo.
12Mothudi o a tle a thule selepe, a dire ka magala a se baakanye ka dinoto a se thule ka letsogo la gagwe le le thata; ee, a bolawe ke tlala, mme thata ya gagwe e tlhaele, a se ke a nwe metsi, mme a idibale.
13Mmetli wa dikgong o a tle a ngamole thapo, a lo rale ka lekgaba la letsoku, a lo sete ka meseto, a lo ralarale ka tshitswana ya kompase, a lo etse setshwantsho sa motho, ka fa bontleng jwa motho, gore se nne mo ntlong. 14O tle a ithemele masetara, a tseye setlhare sa motswere, kgotsa sa mooka, a ithatafaletse sengwe sa ditlhare tsa sekgwa; o a tle a tlhome setlhare sa mokoso, mme pula e se otle. 15Foo e tlaa bo e le sa motho go se fisa; a tseye ga sone a ore; ee, a se gotse molelo a bese senkgwe ka sone; ee, a se dire modimo a o obamele; a se dire setshwantsho se se setilweng, mme a wele fa pele ga sone. 16Ntlha nngwe a se fise mo molelong; a je nama ka ntlha nngwe ya sone; a bese, a kgore; ee, a ore, mme a re: “Ehe! Ke orile, ke bonye molelo.” 17Mme ka mo go setseng a dire modimo, e bong setshwantsho se se setilweng sa gagwe; a tloge a wele fa pele ga sone a se obamele, a se rapele a re: “Nkgolola tlhe, gonne o modimo wa me.”
18Ga ba itse, le gone ga ba gopole, gonne o ba buduladitse matlho, jalo ba sa kake ba bona; le dipelo tsa bone, jalo ba sa kake ba tlhaloganya. 19Mme ga go ope yo o ikgopodisang, le gone ga go na kitso le fa e le tlhaloganyo ya go re: “Ke fisitse ntlha nngwe ya sone mo molelong; ee, le gone ke besitse senkgwe mo magaleng a sone; ke besitse nama ka e ja, mme a ke tlaa tloga ke dira makgapha ka mo go setseng; a ke tlaa wela fa pele ga sesana sa setlhare?”
20O ja melora fela; pelo e e tsietsegileng e mo fapositse, mme a sa kake a golola mowa wa gagwe, le fa e le go re: “A jaana maaka ga a mo seatleng sa me se segolo?”
Jehofa ke mmopi le morekolodi wa Iseraele
21“Gakologelwa dilo tse, wena Jakobe,
le Iseraele,
gonne o motlhanka wa me;
ke go bopile,
o motlhanka wa me;
wena Iseraele,
ga o ketla o lebalwa ke nna.
22Ke kaolotse ditlolo tsa gago
jaaka leru le le kwenneng,
le dibe tsa gago jaaka leru;
boela mo go nna,
gonne ke go rekolotse.”
23Opelang lona magodimo,
gonne Jehofa o dirile;
thelang lošalaba
lona mafelo a kwa tlase a lefatshe;
ponyegang ka sefela,
lona dithaba;
wena sekgwa,
le setlhare sengwe le sengwe
se se mo go sone;
gonne Jehofa o rekolotse Jakobe,
o tlaa ikgalaletsa mo go Iseraele.
24Go bua jaana Jehofa, Morekolodi wa gago, e bile ke ene yo o sa leng a go bopa mo sebopelong:
“Ke nna Jehofa
yo ke dirang dilo tsotlhe,
yo ke phuthololang magodimo
ke le nosi;
yo ke ritibatsang lefatshe ke le nosi;
yo ke nang nae ya bo e le mang?
25Yo ke tlhokafisang ditshupo
tsa baaki,
le baitseanape ke ba tsentshang;
yo ke busetsang
batho ba ba botlhale kwa morago,
ke dira kitso ya bone boeleele fela.
26Yo ke tlhomamisang lefoko
la motlhanka wa me,
ke dirafatsa kgakololo
ya barongwa ba me;
yo ke buang ka ga Jerusalema ke re:
‘O tlaa nnwa;’
le ka ga metse ya Juta,
ke re: ‘E tlaa agiwa,
mme ke tlaa tsosolosa mafelo a gone
a a kgakgabetseng;’
27yo ke rayang lediba le le boteng
ke re:
‘Tšha, mme ke tlaa kgadisa dinoka
tsa gago.’
28Yo ke buang ka ga Kurose, ke re:
‘Ke motho wa me yo o disang,
mme o tlaa dirafatsa
go kgatlhega ga me gotlhe fela;’
yo ke rayang Jerusalema, ke re:
‘O tlaa agiwa;’ le tempele, ke re:
‘Motheo wa gago o tlaa thaiwa.’ ”
