ISAIA 56

₁Go bua jaana Jehofa, a re: “Bolokang katlholo, lo dire tshiamo; gonne poloka ya me e gaufi le go tla, le tshiamo ya me a gaufi le go senolwa. ₂Go sego motho yo o dirang mo, le morwa motho yo o go tshwarang thata; yo o ilelang Sabata a sa o tlhapatse, a gone seatla sa gagwe, gore se se dire bosula bope.”

₃Le gone a moeng yo o ikopantseng le Jehofa a se bue, a re: “Ruri Jehofa o tlaa ntomologanya le batho ba gagwe;” le gone a moopafadiwi a se ka a re: “Nna ke setlhare se se omeletseng.” ₄Gonne go bua jaana Jehofa, a re: “Ka ga baopafadiwi ba ba ilelang bosabata ba me, ba itshenkela dilo tse di nkgatlhang, mme ba tshwara kgolagano ya me ka thata; ₅bone bao ke tlaa ba naya segopodiso le leina, mo teng ga ntlo ya me le mo teng ga dithako tsa me, go gaisa jaaka la bana ba basimane le ba basetsanyana; ke tlaa ba naya leina le le sa khutleng, le le se ketlang le kgaolwa.

₆“Le bone baeng ba ba ikopanyang le Jehofa go mo direla, le go rata leina la ga Jehofa, le go nna batlhanka ba gagwe, mongwe le mongwe yo o ilelang sabata a sa o tlhapatse, le kgolagano ya me ba e tshwara ka thata; ₇ba le bone ke tlaa ba lere mo thabeng ya me e e boitshepo, ke ba jesa monate mo ntlong ya me ya thapelo; ditshupelo tsa bone tsa phiso, le ditlhabelo tsa bone, di tlaa amogelwa mo sebesong sa me; gonne ntlo ya me e tlaa bidiwa Ntlo ya borapelelo jwa ditšhaba tsotlhe. ₈Morena MODIMO yo o phuthang balelekwi ba Iseraele, a re: Ke tlaa nama ke phuthela kwa go ene ba sele, kwa ntle ga ba ga gabo ba ba phuthilweng.”

₉Lona dibatana tsotlhe tsa naga, tlang lo rume, ee, dibatana tsotlhe tse di mo sekgweng. ₁₀Balebedi ba gagwe ba foufetse, botlhe ga ba na kitso; botlhe ke dintša tse di dimumu fela, di retelelwa ke go bogola; di a lora, di a rapama, di rata go otsela fela. ₁₁Ee, dintša tse di legalegela dijo, ga di kake tsa kgora gope; le ba, ke badisa ba ba sa kakeng ba tlhaloganya, botlhe ba fapogetse kwa mokgweng wa bone, mongwe le mongwe kwa papading ya gagwe, ba tswa ntlheng tsotlhe. ₁₂Ba re: “Ntlong, ke tlaa ya go lere bojalwa jwa mofine, mme re tlaa ikgorisa ka seno se se loileng; mme ka moso go tlaa nna jaaka gompieno, letsatsi le legolo go fetelela.”