1Jaana Jefetha wa Mogileate, a bo a le seganka se se pelokgale; a bo a le morwa seaka; Gileate a tsala Jefetha. 2Mosadi wa ga Gileate a bona nae bana ba basimane; mme e rile bomorwa mosadi wa gagwe ba sena go gola, ba leleka Jefetha, ba mo raya ba re: “Ga o ketla o o ja boswa mo ntlong ya rraetsho; gonne o morwa mosadi o sele.” 3Foo Jefetha a tswa mo baneng ba ga rraagwe, a tshaba, mme a ya a aga mo lefatsheng la Tobe; ga phuthegela kwa go Jefetha banna ba ba difafalele, mme ba nne ba bolole nae.
4Ga dirala ya re motlha mongwe bana ba Amone ba epela Iseraele dira. 5Ga dirala ya re bana ba Amone ba epela Iseraele dira, bagolwane ba Gileate ba ya go tsaya Jefetha kwa lefatsheng la Tobe; 6ba raya Jefetha ba re: “Ntlo o nne kgosi ya rona, gore re tle re tlhabane le bana ba Amone.” 7Mme Jefetha a raya bagolwane ba Gileate a re: “A ga lo a nkila, lo ntelekile mo ntlong ya ga rre? Lo tlelang kwa go nna jaanong lo le mo pitlaganong?”
8Bagolwane ba Gileate ba raya Jefetha ba re: “Ke gone ka fa re retologetseng mo go wena gompieno ka gone, gore o tle o tsamaye le rona, re ye go tlhabana le bana ba Amone, mme o tlaa nna tlhogo ya rona mo godimo ga banni botlhe ba Gileate.”
9Jefetha a raya bagolwane ba Gileate a re: “Fa lo mpusetsa kwa gae jaana ke ya go tlhabana le bana ba Amone, fa Jehofa a ba neela fa pele ga me, a ke tlaa nna tlhogo ya lona?”
10Bagolwane ba Gileate ba raya Jefetha ba re: “Jehofa o tlaa nna mosupi gare ga rona; ruri re tlaa dira ka fa lefokong la gago.” 11Foo Jefetha a ya le bagolwane ba Gileate, mme batho ba mo dira tlhogo le kgosi mo go bone; Jefetha a bua mafoko otlhe a gagwe fa pele ga Jehofa mo Misepa.
12Jefetha a roma batho kwa kgosing ya bana ba Amone, ba re: “Ga twe: O dirang ka nna, fa e bo ne ne o mpololetse jaana go tlhabana le lefatshe la gaetsho?”
13Kgosi ya bana ba Amone ya fetola barongwa ba ga Jefetha ya re: “Ke ka gonne e rile Iseraele a tswa Egepeto ba gapa lefatshe la gaetsho, go simolola kwa Arenone go ya Jaboke, le kwa Joretane; jaana rebola mafatshe ao ka kagiso.”
14Jefetha a roma batho gape ba ya kwa kgosing ya bana ba Amone. 15Mme a e raya a re: “Jefetha o bua jaana a re: Iseraele ga a ka a gapa lefatshe la Moabe, le fa e le lefatshe la bana ba Amone. 16Mme e rile ba tswa Egepeto, Iseraele a ralala naga go ya Lewatleng le Lehibidu, mme a fitlha mo Kateše; 17foo Iseraele a roma batho ba ya kwa kgosing ya Etome, ba re: ‘Ga twe: A ko o ntetlelele ke ralale lefatshe la gago;’ mme kgosi ya Etome ya se ka ya rata. A roma jalo le kwa kgosing ya Moabe; mme ya gana; mme Iseraele a nna mo Kateše. 18Foo a ralala naga, a potologa lefatshe la Etome, le lefatshe la Moabe, mme a tla a potile lefatshe la Moabe ka fa ntlheng ya botlhabatsatsi, mme ba thibelela kwa moseja ga Arenone; ba se ka ba tla mo teng ga molelwane wa Moabe, gonne Arenone e ne e le molelwane wa Moabe. 19Iseraele a roma batho kwa go Sihone kgosi ya Baamore, kgosi ya Hešebone; Iseraele a e raya a re: ‘A ko o mme re fete ka lefatshe la gago ke ye kwa gaetsho.’ 20Mme Sihone a se ka a ikanya Iseraele go mo letla go ralala ka fa molelwaneng wa gagwe; Sihone a phutha batho botlhe ba gagwe, a ya a thibelela mo Jahase, a tlhabana le Iseraele. 21Mme Jehofa Modimo wa Iseraele a tsenya Sihone le batho botlhe ba gagwe mo seatleng sa Iseraele, mme ba ba kgemetha; jalo Iseraele a rua lefatshe lotlhe la Baamore, e le banni ba lefatshe leo. 22Ba rua molelwane otlhe wa Baamore, go tswa Arenone go ya Jaboke, le go tswa nageng go ya fela kwa Joretane. 23Jaana Jehofa, Modimo wa Iseraele, o tloseditse Baamore boswa fa pele ga batho ba gagwe Iseraele, mme a e ka nna wena o tshwanetseng go ba rua? 24A ga o nke o rua sone se Kemoše modimo wa gago o se go nayang go se rua? Jalo fela ba Jehofa o ba tloseditseng boswa fa pele ga rona ke bone ba re tlaa ba ruang. 25Jaana a o gaisa Balake morwa Sipore, kgosi ya Moabe, ka gongwe? A ene o kile a ganela le Iseraele, kgotsa a o kile a tlhabana nabo? 26E rile Iseraele a ntse a agile mo Hešebone le metse ya teng, le mo Aroere le metse ya teng, le mo metseng yotlhe e e bapileng le Arenone, ka dinyaga di le 300; lo ne lo sa e ipuseletseng mo lobakeng loo? 27Ke gone nna ga ke a go leofela, mme wena o ntshiamololela ka go tlhabana le nna. Jehofa Moatlhodi a nne moatlhodi gompieno gare ga bana ba Iseraele le bana ba Amone.” 28Le fa go ntse jalo kgosi ya bana ba Amone ya se ka ya reetsa mafoko a ga Jefetha, a o a isitseng kwa go yone.
29Foo mowa wa ga Jehofa wa tla mo go Jefetha, mme a kgabaganya Gileate le Manase, a kgabaganya Misepa wa Gileate, a tswa Misepa wa Gileate, a kgabaganya kwa baneng ba Amone. 30Jefetha a ikanela Jehofa ka ikano a re: “Fa ruri o tlaa tsenya bana ba Amone mo seatleng sa me, 31foo go tlaa dirala go re, le fa e le eng se se nkgatlhantshang se tswa mo mejakong ya ntlo ya me mogang ke bowang ka kagiso kwa baneng ba Amone, e tlaa nna sa ga Jehofa, ke tlaa se isa tshupelo e e fisiwang.”
32Jalo Jefetha a kgabaganyetsa kwa baneng ba Amone a ya go tlhabana nabo; mme Jehofa a ba tsenya mo seatleng sa gagwe. 33A ba kgemetha go tswa Aroere go ya go fitlha kwa Minnite, e bong metse e e 20 le kwa Abele-keramime, ka polao e kgolo thata. Jalo bana ba Amone ba fenngwa fa pele ga bana ba Iseraele.
Morwadia Jefetha
34Jefetha a goroga mo Misepa kwa ntlong ya gagwe, mme morwadie a tswa go mo kgatlhantsha ka meropana le ka dipina; ya bo e le ngwana wa gagwe yo o esi; kwa ntle ga gagwe o ne a se na le fa e le ngwana wa mosimane le fa e le wa mosetsana. 35Ga dirala ya re a mmona, a ikgagola diaparo a re: “Ija, we, morwadiaka! O nkokobeditse thata, o mongwe wa bone ba ba mphuduang; gonne ke tumololetse Jehofa molomo wa me, mme ga nkake ka boela kwa morago.”
36Ngwana a mo raya a re: “Rra, o tumololetse Jehofa molomo wa gago; ntirela ka fa lefokong le le duleng mo molomong wa gago; ka Jehofa a go busoloseditse mo babeng ba gago, e bong mo baneng ba Amone.” 37A raya rraagwe a re: “A ke direlwe selo se; ntesa ka dikgwedi di le pedi, gore ke tloge ke tsamaye mo dithabeng, ke lelele bokgarebana jwa me, nna le bankana ba me.” 38Mme a re: “Tsamaya.” A mo lesa a tsamaya ka dikgwedi di le pedi; a tloga, ene le bankana ba gagwe, a ya a lelela bokgarebana jwa gagwe mo dithabeng. 39Ga dirala ya re dikgwedi tse pedi di sena go feta, a boela kwa go rraagwe, a mo direla ka fa ikanong e o ne a e ikanne; mme o ne a ise a itse monna. 40Ya tloga ya nna temalo mo Iseraele, ya go re, basetsana ba Iseraele ba ye ka ngwaga le ngwaga go lelela morwadia Jefetha wa Mogileate ka malatsi a le mane a ngwaga.
