Samesone le mosadi wa Timena
1Samesone a ya kwa Timena, ya re mo Timena a bona mosadi wa bomorwadia Bafilisitia. 2Mme a tla a bolelela rraagwe le mmaagwe a re: “Ke bonye mosadi wa bomorwadia Bafilisitia mo Timena; mme ka re lo mo mpatlele go nna mosadi wa me.”
3Foo rraagwe le mmaagwe ba mo raya ba re: “A ga go na mosadi ope mo go bomorwadia bagaeno, le fa e le mo bathong botlhe bagaeno, fa e bo ne ne o ya go tsaya mosadi wa Bafilisitia ba ba sa rupang?” Samesone a raya rraagwe a re: “Mo mpatlele; gonne o nkgatlha thata.”
4Rraagwe le mmaagwe ba bo ba sa itse fa e le se se tswang mo go Jehofa; gonne o ne a senka seipato sa go kgopisa Bafilisitia. Ya bo e rile ka baka loo Bafilisitia ba bo ba busa Iseraele.
5Foo Samesone a ya kwa Timena, a na le rraagwe le mmaagwe, a fitlha mo masimong a mafine a Timena; mme ledumedi la mo ratlatlela. 6Mowa wa ga Jehofa wa tla mo go ene ka thata, a le gagola jaaka fa a ka bo a gagola potsane, o ne a sa tshola sepe; mme a se ka a bolelela rraagwe le mmaagwe se o se dirileng.
7A ya a bua le mosadi; mme mosadi a kgatlha Samesone thata. 8E rile motlha mongwe a boa a ya go mo tsaya, a fapoga a ya go bona setoto sa tau; a fitlhela motshitshi wa dinotshe mo setotong sa tau, le mamepa. 9Mme a di rafa ka diatla a tswelela pele, a tla a ja, mme a fitlha kwa go rraagwe le mmaagwe, a ba fa, ba ja; mme a se ka a ba bolelela fa a tsere mamepa mo setotong sa tau.
10Rraagwe a ya kwa mosading; mme Samesone a dira modiro gone: gonne makau a ne a tle a dire jalo. 11E rile ba mmona, ba lere balekane ba gagwe ba le 30, ba tla go nna nae. 12Samesone a ba raya a re: “Mmang ke lo tlhabele nyoba; fa lo ka e ntepololela mo teng ga malatsi a a supang a modiro, lo e lemoga, foo ke tlaa lo naya dihempe tsa leloba di le 30, le diphapaanyo tsa diaparo di le 30. 13Fa lo retelelwa ke go e ntepololela, foo lo tlaa nnaya dihempe di le 30, le diphapaanyo tsa diaparo di le 30.” Ba mo raya ba re: “Tlhaba nyoba ya gago gore re tle re e utlwe.” 14A ba raya a re: “Ga tswa dijo mo mojing, ga tswa monate mo mothating.” Ka malatsi a le mararo ba retelelwa ke go lepolola nyoba.
15Ga dirala ya re ka letsatsi la bosupa ba raya mogatsa Samesone ba re: “Fepisa monna wa gago, gore a re bolelele nyoba, ka re ka tla ra go fisa ka molelo le ntlo ya ga rraago; a lo re bileditse go tla lo re humanegisa? A ga go a nna jalo?”
16Mosadi wa ga Samesone a lela fa pele gagwe a re: “O a bo o nkila fela, ga o nthate; o tlhabeleditse bana ba batho ba gaetsho nyoba, wa se ka wa e ntepololela.” A mo raya a re: “Bona, ga ke a e lepololela rre le mme, a ke ka e lepololela wena?” 17A lela fa pele ga gagwe ka malatsi ao a supa, modiro wa bone o ntse o jewa; ga dirala ya re ka letsatsi la bosupa, a mmolelela, ka a mo emeletse thata; mosadi a lepololela bana ba batho ba ga gabo nyoba. 18E rile ka tsatsi la bosupa, letsatsi le ise le phirime, batho ba motse ba raya Samesone ba re: “Go na le eng se se monate bogolo go dinotshe? Go na le eng se se thata bogolo go tau?” A ba raya a re: “Fa lo ka bo lo se ka lwa lema ka kgomo ya me ya moroba, lo ka bo lo se ka lwa lemoga nyoba ya me.” 19Mowa wa ga Jehofa wa tla mo go ene ka thata, mme a ya kwa Ašekelone, a bolaya banna ba teng ba le 30, a tsaya thopo ya bone, mme diphapaanyo tsa diaparo a di naya bone ba ba lopolotseng nyoba. Bogale jwa gagwe jwa tuka, mme a ya kwa ntlong ya ga rraagwe. 20Mosadi wa ga Samesone a newa monkana wa gagwe, yo o ne a mo kaile e le tsala ya gagwe.
