Giteone
1Bana ba Iseraele ba tloga ba dira se se bosula mo ponong ya ga Jehofa; Jehofa a ba neela mo seatleng sa Bamidiane ka dinyaga di supa. 2Letsogo la Bamidiane la fenya Iseraele; mme ya re ka ntlha ya Bamidiane bana ba Iseraele ba itirela mengobo e e mo dithabeng, le dikgaga, le mafelo a a thata a boiphemelo. 3Ga nna jalo, e ne e tle e re Baiseraele ba sena go jala, Bamidiane ba tle, le Baamaleke, le bana ba botlhabatsatsi, ba tle go ba tlhasela. 4Ba ba thibelelele, ba senye totafalo ya lefatshe go ya go fitlha kwa Gasa, mme ba se ke ba tlogela botshelo bope mo Iseraele, le fa e le nku, le fa e le kgomo, le fa e le esela. 5Gonne ba ne ba tle ba tle le matlhape a bone, le megope ya bone, ba ririane jaaka tsie ka bontsi; go le bone, go le dikamela tsa bone, go ne go se na palo; mme ba tle lefatsheng go le senya. 6Baiseraele ba humanega thata ka ntlha ya Bamidiane; mme bana ba Iseraele ba goela kwa go Jehofa.
7Ga dirala e rile bana ba Iseraele ba goela kwa go Jehofa ka ntlha ya Bamidiane, 8Jehofa a roma moperofeti kwa baneng ba Iseraele; a ba raya a re: “Jehofa Modimo wa Iseraele o bua jaana a re: Ke lo ntshitse mo Egepeto, ka lo ntsha mo ntlong ya botlhanka; 9ka lo golola mo seatleng sa Baegepeto le mo seatleng sa botlhe ba ba lo patikang, ka ba leleka fa pele ga lona, mme ka lo naya lefatshe la bone. 10Ka lo raya ka re: ‘Ke nna Jehofa Modimo wa lona; lo se ka lwa boifa medimo ya Baamore, ba lo agileng mo lefatsheng la bone;’ mme ga lo a reetsa lentswe la me.”
11Moengele wa ga Jehofa a tla a dula fa tlase ga mooka o o neng o le mo Ofera, o e ne e le wa Joaše wa Moabiesere: Giteone morwawe a bo a phothela mabele mo kgatisetsong ya bojalwa go a subela Bamidiane. 12Moengele wa ga Jehofa a bonala kwa go ene a mo raya a re: “Jehofa o na nao wena senatla se se pelokgale.”
13Giteone a mo raya a re: “Ao Morena wa me, a e re fa Jehofa a na le rona, ana gotlhe mo, go bo go re wetse ka ntlha yang? Ditiro tsotlhe tsa gagwe tse di gakgamatsang, tse borraetsho ba re boleletseng ka ga tsone, di ile kae, ka ba re: ‘A Jehofa ga a a re ntsha mo Egepeto?’ Gompieno Jehofa o re latlhile, o re neetse mo seatleng sa Bamidiane.”
14Jehofa a mo leba, a re: “Ya mo thateng e ya gago, o golole Iseraele mo seatleng sa Bamidiane; a ga ke a go roma?”
15A mo raya a re: “Ao Morena, ke tlaa golola Iseraele ka eng? Bona, losika lwa me lo humanegile bogolo go botlhe ba ba mo go Manase, le nna ke mmotlana mo ntlong ya ga rre.”
16Jehofa a mo raya a re: “Ruri ke tlaa nna nao, mme o tlaa kgemetha Bamidiane jaaka e ka bo e le motho a le mongwe fela.”
17A mo raya a re: “E re fa jaana ke bonye letlhogonolo mo matlhong a gago, ka re, o ntshupetse sesupo sa go re ke wena o buang le nna. 18A ko o se ka wa tloga fa, ke ise ke tle kwano go wena, ke lere mpho ya me, ke e beye fa pele ga gago.” Mme a re: “Ke tlaa nna o bo o tsamaya o tla gape.”
19Giteone a tsena, a baakanya potsane le dinkgwana tse di sa bedisiwang tsa boupe bo le emere a le mongwe fela; nama a e tsenya mo serotong, moro a o tsenya mo pitsaneng, a di lere kwa go ene fa tlase ga mooka, a di mo naya. 20Moengele wa Modimo a mo raya a re: “Tsaya nama le dinkgwenyana tse di sa bedisiwang, o di beye mo letlapeng le, o bo a thela moro.” Mme a dira jalo. 21Foo moengele wa ga Jehofa a ntsha thobane e o e tshotseng, a ama nama le dinkgwenyana tse di sa bedisiwang ka ntlha ya yona, mme ga tswa molelo mo letlapeng, wa nyeletsa nama le dinkgwenyana tse di sa bedisiwang; mme moengele wa ga Jehofa a tsamaya a tswa mo ponong ya gagwe.
22Giteone a lemoga fa e ne e le moengele wa ga Jehofa; Giteone a re: “Ija, Morena Modimo! Gonne ke bonye moengele wa ga Jehofa re lebanye ka difatlhogo.”
23Mme Jehofa a mo raya a re: “Kagiso e nne go wena; o se ka wa boifa, ga o ketla o swa.” 24Foo Giteone a agela Jehofa sebeso gone, a se raya leina a re: Jehofa-šalome, (ke go re, Jehofa o kagiso); le gompieno se sa ntse se le gone mo Ofera wa Baabiesere.
25Ga dirala ya re bosigo joo Jehofa a mo raya a re: “Tsaya kgomo ya ga rraago, e bong kgomo ya bobedi e e dinyaga di supa, o dige sebeso sa ga Baale se rraago o nang naso, o bo o reme Modimako o o fa go sone. 26O agele Jehofa Modimo wa gago sebeso mo godimo ga dithako tsa felo fa, fa go thata, ka thulaganyo e e siameng, o tseye kgomo ya bobedi, o dire tshupelo e e fisiwang ka dikgong tsa Modimako o o tlaa o remang.” 27Foo Giteone a tsaya banna ba le some ba batlhanka ba gagwe, a dira jaaka Jehofa a buile nae; ga dirala ya re ka a boifa ba ntlo ya ga rraagwe le banna ba motse, mme a retelelwa ke go se dira motshegare, a se dira bosigo.
28E rile banna ba motse ba tsoga ka maphakela, ba fitlhela sebeso sa ga Baale se rutlilwe, le Modimako o remilwe, o o neng o le fa go sone, le kgomo ya bobedi e isitswe tshupelo mo sebesong se se agilweng. 29Ba raana ba re: “E mang yo o dirileng seo se?” E rile ba sena go tlhotlhomisa le go botsa, ba re: “Giteone morwa Joaše o dirile selo se.” 30Foo banna ba motse ba raya Joaše ba re: “Ntsha morwao, gore a swe; gonne o rutlile sebeso sa ga Baale, le gonne o remile Modimako o o neng o le fa go sone.”
31Mme Joaše a raya botlhe ba ba ganelang nae a re: “A lo tlaa ganelela Baale, kgotsa a lo tlaa mmoloka? Yo o tlaa mo ganelelang a a bolawe go sa ntse go le ka moso; fa e le modimo mongwe a a ikganelele, gonne mongwe o rutlile sebeso sa gagwe.” 32Ke gone ka moo a mmitsa Jerubaale ka tsatsi leo, a re: “A Baale a ganele nae ka a rutlile sebeso sa gagwe.”
33Foo Bamidiane botlhe, le Baamaleke, le bana ba botlhabatsatsi ba phuthega; ba kgabaganya, ba thibelela mo molapong wa Jesereele. 34Mowa wa ga Jehofa wa tla mo go Giteone; mme a letsa lonaka; ba Abiesere ba phuthega ba mo sala morago. 35A roma barongwa ba ya le lefatshe lotlhe la ga Manase; le bone ba phuthega ba mo sala morago; a ba a roma barongwa, ba ya kwa go Ašere le kwa Sebulone le kwa go Nafetali; ba tla go rakana nae.
36Giteone a raya Modimo, a re: “Fa o tlaa golola Iseraele ka seatla sa me jaaka o buile, 37bona, ke tlaa baya sesetlo sa bobowa jwa nku mo seboping; fa go le monyo mo sesetlong se le sosi, mme go omeletse gotlhe fa fatshe, foo ke tlaa bo ke itse fa o tlaa golola Iseraele ka seatla sa me jaaka o buile.” 38Ga nna jalo; gonne o ne a phakela ka moso, a phutha sesetlo, a gamola monyo mo sesetlong, mme metsi a tlala mo mogotšaneng. 39Giteone a raya Modimo a re: “A bogale jwa gago bo se ntukele, ke tlaa fela ke bua gangwe fela, a ko o mme ke leke gape gangwe fela; jaanong a go omelele mo sesetlong, go nne monyo fa fatshe.” 40Modimo wa dira jalo bosigo joo, gonne go ne go omeletse sesetlo se le sosi, mme ga nna monyo fa fatshe gotlhe fela.
