Leuba le legolo
1Lefoko la ga Jehofa le le tsileng mo go Jeremia ka ga leuba.
2“Juta o a hutsafala,
ba dikgoro tsa teng ba a topetega,
ba dutse fa fatshe ba apere bontsho;
mme go gala ga Jerusalema
go tlhatlogile.
3Bagolwane ba bone
ba roma babotlana ba bone
kwa metsing,
mme ba fitlhele go se na metsi;
ba boe fela dinkgwana tsa bone
di se na sepe;
ba tlhajwe ke ditlhong
ba sosobaganye,
ba ikhurumetse ditlhogo.
4Balemi ba tlhajwe ke ditlhong,
ba ikhurumetse ditlhogo,
ka ntlha ya mmu o o phanyegileng,
ka go bo pula e se ke e ne
mo lefatsheng.
5Ee, le tshephe mo nageng e tsale,
mme e tlogele ngwana,
ka go bo go se na bojang.
6Le diesela tsa nageng di eme
mo dithoteng tse di loforotlho,
di fegelelwe phefo jaaka diphokoje,
matlho a tsone a bokalale
ka go bo go se na dihulo.”
7Le fa maikepo a rona
a re supa fa re le molato,
a ko o dire fela
ka ntlha ya leina la gago, Jehofa;
gonne ditenego tsa rona di dintsi;
re go leofetse.
8Ao, wena tsholofelo ya Iseraele,
mmoloki wa gagwe
mo motlheng wa pitlagano,
o a bo o ka nna mo lefatsheng jang
jaaka e kete o mojaki fela,
le jaaka motsamai le tsela
yo o fapogang,
a ya go lala golo gangwe fela?
9O a bo o ka nna jang
jaaka motho yo o tseanyeng,
jaaka mothata
yo o sa kakeng a boloka?
Le fa go ntse jalo, wena Jehofa,
o ntse mo gare ga rona,
mme re bidiwa ka leina la gago;
o se ka wa re tlogela.
10Jehofa o raya tšhaba e jaana, a re: “Ba ratile go nna ba timela fela jalo; ga ba a ithiba dinao; ke gone ka moo Jehofa o sa ba amogeleng; jaanong o tlaa gakologelwa boikepo jwa bone, a sekisa maleo a bone.”
11Mme Jehofa a nthaya a re: “O se ka wa rapelela tšhaba e molemo. 12E tlaa re ba ikitsa go ja, ga nketla ke utlwa go goa ga bone; e tlaa re ba isa tshupelo ya phiso, le seromololo, ga nketla ke ba amogela; mme ke tlaa ba nyeletsa ka tšhaka, ka popamo, le ka kgogodi.”
13Foo ka re: “Ija! We! Jehofa Modimo! Bona, baperofeti ba ba raya ba re: ‘Ga lo ketla lo bona tšhaka, le gone ga lo ketla lo bona popamo; mme ke tlaa lo naya kagiso ya mmaanete mo felong fa.’ ”
14Foo Jehofa a nthaya a re: “Baperofeti ba perofesa maaka ka leina la me; ga ke a ba roma, le gone ga ke a ba laola, le fa e le go bua nabo; ba lo perofesetsa ponatshegelo ya maaka, le boitsejwanape, le selo se se seng sepe, le tsietso ya pelo tsa bone. 15Ke gone ka moo, go bua Jehofa ka ga baperofeti ba ba perofesang ka leina la me, mme ke sa ba roma, le fa go ntse jalo, ba re: ‘Tšhaka le popamo ga di ketla di bonwa mo lefatsheng le;’ a re: Baperofeti bao ba tlaa nyelediwa ke tšhaka le popamo. 16Le batho ba, ba ba ba perofesetsang ba tlaa latlhelwa kwa ntle mo mebileng ya Jerusalema ka ntlha ya popamo le tšhaka; mme ba tlaa bo ba se na ba ba ba fitlhang, bone, le fa e le basadi ba bone, le fa e le bana ba bone ba basimane, le fa e le bana ba bone ba basetsana; gonne ke tlaa feela boikepo jwa bone mo go bone.
17“O bue lefoko le nabo, o re:
“ ‘A matlho a me a tshologe dikeledi
bosigo le motshegare,
mme a a se khutle;
gonne kgarebane,
morwadia batho ba me,
o robegile ka thobego e e atlhameng,
ka ntho e e botlhoko thata.
18Ya re fa ke tswela mo nageng,
foo bonang,
go ba ba bolailweng ka tšhaka!
Fa ke tsena mo motseng, foo bonang,
go ba ba botlhoko ka popamo,
gonne moperofeti le moperesiti
boo babedi ba tsamayatsamaya
fela mo lefatsheng,
mme ba se na kitso.’ ”
Batho ba ikuela mo Moreneng
19A Juta o mo ganetse ruri?
A o fedisitswe ke Sione pelo?
Ana o re iteile ka ntlha yang,
mme re se na phodiso?
Ra lebelela kagiso,
mme go se ka ga tla molemo ope;
ra lebelela lobaka lwa go fodisiwa,
mme bonang, kotlomano fela!
20Jehofa, re ipolela boikepo jwa rona,
le boikepo jwa borraetsho,
gonne re go leofetse.
21Ka ntlha ya leina la gago,
o se ka wa re tlhoa;
o se ka wa tlotlolola setulo sa bogosi
sa kgalalelo ya gago,
a ko o gakologelwe,
o se ka wa senya kgolagano ya gago
le rona.
22Mo maithamakong a merafe,
a go na le bangwe
ba ba nesang pula?
Kgotsa a magodimo
a ka nesa medupe?
Jehofa Modimo wa rona,
a ga o ene?
Ke gone ka moo
re tlaa lebelelang mo go wena;
gonne o dirile dilo tse tsotlhe fela.
