Boleo jwa Jerusalema
1“Lo siane sianeleng
le mebila ya Jerusalema,
mme lo bone jaana lo itse,
lo batle mo dipatlelong tsa teng,
fa lo ka bona monna,
fa go na le mongwe
yo o dirang ka tekatekanyo,
le yo o batlang boammaaruri,
mme ke tlaa itshwarela motse.
2Le fa ba re: ‘Jaaka Jehofa
a tshedile’;
ba bo ba ikana ka maaka fela.”
3Jehofa, matlho a gago
a ga a a leba boammaaruri?
O ba iteile,
mme ga baa ka ba utlwa botlhoko;
o ba nyeleditse,
mme ba ganne go gapiwa;
ba ithatafaditse difatlhogo
go gaisa lefika;
ba ganne go sokologa.
4Foo ka re: “Ruri bao ba bo ba le
badidi; ba boeleele;
gonne ga ba itse tsela ya ga Jehofa,
le fa e le katlholo ya Modimo
wa bone.
5Ke tlaa ikela kwa bathong
ba batona, ke tlaa bua nabo;
gonne bone ba itse tsela
ya ga Jehofa,
le katlholo ya Modimo wa bone.”
Mme bone ka bongwe fela jwa pelo,
ba robile jokwe,
ba komagantse dikgolego.
6Ke gone tau e e tswang mo
sekgweng e tlaa ba bolaya,
letlonkana la maabanyane
le tlaa ba thopa,
nkwe o tlaa lalela metse ya bone,
mme mongwe le mongwe
yo o tswang mo go yone
o tlaa gagoganngwa,
gonne ditlolo tsa bone di dintsi,
le ditenego tsa bone di totafetse.
7“Ke ka go itshwarela jang?
Bana ba gago ba ntatlhile,
ba ikanne ka yone
e e seng medimo epe;
e rile ke sena go ba fa dijo
ka botlalo,
ba ya ba dira boaka,
ba phuthega ka masomo
mo matlong a diaka.
8Ba ne ba ntse jaaka dipitse
tse di otlwang
tse di kgarakgatshegang,
mongwe le mongwe
a kgwankgwanyegela mosadi
wa mongwe ka ene.
9A ga nketla ke kgopololela dilo tse?”
go bua Jehofa;
“A mowa wa me ga o ketla o itefetsa
mo morafeng o o ntseng jaana?
10“Palamelang mo dithakong tsa teng
lo senye;
mme lo se ka lwa nyeleletsa ruri;
lo tlose dikala tsa teng,
gonne ga se tsa ga Jehofa.
11Gonne ba ntlo ya Iseraele,
le ba ntlo ya Juta
ba dirile ka bolotsana jo bogolo
fa pele ga me,” go bua Jehofa.
Jehofa o latlha Jerusalema
12Ba itatotse Jehofa, ba rile: “Ga se ene; le gone bosula ga bo ketla bo tla mo go rona; le gone ga re ketla re bona tšhaka, le fa e le popamo. 13Baperofeti ba tlaa fetoga phefo, e bile lefoko ga leyo mo go bone; ba tlaa direlwa jalo.” 14Ke gone ka moo, go bua jaana Jehofa, Modimo wa masomosomo, a re: “Ereka lo bua lefoko le, bonang, ke tlaa dira mafoko a me gore a nne molelo mo molomong wa gago, le batho ba, ba tlaa nna dikgong, mme molelo o tlaa ba laila.
15“Bonang, ke tlaa lere mo go lona morafe o o tswang kgakala, lona ba ntlo ya Iseraele,” go bua Jehofa. “Ke morafe o o thata, ke morafe wa bogologolo, morafe o puo ya one o sa e itseng, o bile o sa tlhaloganye se ba se buang. 16Mokotlopo wa bone ke letswe le le atlhameng, ke batho ba ba nonofileng botlhe fela. 17Ba tlaa lakaila thobo ya gago, le dijo tsa gago, tse bana ba gago ba basimane le ba basetsana ba tshwanetseng go di ja; ba tlaa fetsa matsomane a gago le matlhape a gago; ba tlaa jela ruri mofine wa gago le mofeige wa gago; ka tšhaka ba tlaa humanegisa metse ya gago e e thekeleditsweng, e o ikantseng mo go yone.
18“Le mo metlheng eo ga nketla ke go nyeleletsa ruri,” go bua Jehofa. 19Go tlaa dirala, go re, mogang lo buang, lo re: “Ke ka ntlha yang Jehofa Modimo wa rona a re diretse dilo tsotlhe tse?” Foo o tlaa ba raya o re: “Fela jaaka lo ntatlhile, mme lwa direla medimo e sele fela mo lefatsheng la lona, jalo fela lo tlaa direla baeng mo lefatsheng le e seng la lona.”
Morena o tlhagisa batho ba gagwe
20“Bolelang selo se mo ntlong ya ga Jakobe, lo se kakanye mo Juta, lo re: 21A ko lo utlwe selo se, batho ba ba dieleele ke lona, le ba lo se nang tlhaloganyo; ba lo nang le matlho, mme lo sa bone; ba lo nang le ditsebe, mme lo sa utlwe: 22A ga lo mpoife?” Go bua Jehofa: “A ga lo ketla lo roroma ka sebonalo sa me, nna yo ke beileng mošawa gore o nne mmotwana wa lewatle ka molao o o sa khutleng, gore le se ka la o feta? Mme le fa makhubu a lone a itlodisa, le fa go ntse jalo ga a fenye, le fa a suma ka mosumo o mogolo, le fa go ntse jalo ga a na nonofo ya go o tlola. 23Mme tšhaba e e na le pelo e e rukutlhang e e tsuololang; barukutlhi ba ile. 24Le gone ga ba ke ba bua mo pelong ya bone ba re: ‘A re ke re boifeng Jehofa Modimo wa rona, yo o nesang pula ya sephai, le ya kgogolammoko, mo metlheng ya yone; yo o re bolokelang dibeke tse di laotsweng tsa thobo.’ 25Maikepo a lona a fapositse dilo tse, le maleo a lona a kganetse molemo gore o se tle mo go lona.
26“Gonne mo bathong ba me go fitlhelwa baikepi; ba lebelele jaaka bathaa dinonyane ba tle ba lalele; ba beye seru, ba tshware batho. 27Jaaka serobi se tletse dinonyane, jalo fela matlo a bone a tletse tsietso; ke gone ka moo ba leng bagolo, mme ba humile. 28Ba nonne, ba retefetse. Ee, ba feteletse mo ditirong tsa boikepo; ga ba sekele, ga ba sekele mafoko a masiela, gore ba tle ba tlhogonolofale; mme tshiamelo ya motlhoki ga ba e atlhole.
29“A ga nketla ke ba kgopololela dilo tse?” Go bua Jehofa; “A mowa wa me ga o ketla o itefetsa mo morafeng o o ntseng jaana? 30Selo se se gakgamatsang le se se tsitlisang marapo se dirafetse mo lefatsheng; 31baperofeti ba perofesa ka maaka, baperesiti ba laola ka thata ya bone; batho ba me ba rata gore go nne jalo; mme lo tlaa dirang mo bokhutlong jwa gone?
