Jobe
1“Motho yo o tsetsweng ke
mosadi o malatsi mannye,
o bile o tletse khuduego.
2O tswa jaaka sethunya,
mme a kgaolwe;
le gone o tshaba jaaka moriti,
mme a se ke a tlhola.
3A o budulogela yo o ntseng jalo
matlho,
o ba o nkisa tshekong nao?
4E mang yo o ka ntshang selo se
sentle mo go se se seng sentle?
Ga go na ope.
5E re ka malatsi a gagwe a laotswe,
le palo ya dikgwedi tsa gagwe
e na nao,
o bile o mmeetse melelwane
ya gagwe
e o sa kakeng a e tlola;
6sheboga mo go ene,
gore a tle a ikhutse,
go tsamaya a dirafatse
letsatsi la gagwe
jaaka mothapiwa wa tuelo.
7Gonne mo setlhareng
go na le tsholofelo ya go re
le fa se remilwe
se tlaa ba se tlhoga matswela,
le go re letswela le lenana la sone
ga le ketla le khutla.
8Le fa modi wa sone
o onalela mo lefatsheng,
le thito ya sone e swela mo mmung;
9le fa go ntse jalo,
fa se utlwa monko wa metsi
se tlaa kukunya,
se ntsha dikala
jaaka se se tlhomilweng.
10Mme motho ene o a swa,
a nyelele;
ee, motho a gonoge,
mme o ba a le kae?
11Jaaka metsi a tle a ngangaolege
mo letsheng,
le noka e tle e kgale e omelele;
12motho o itelega jalo,
mme a sa tsoge;
ga ba ketla ba kubuga
le fa e le go tsosiwa
mo go robaleng ga bone
go bo go tsamaye magodimo
a sa tlhole a leyo.
13O a bo o ka ka wa mphitlha
mo Bobipong,
wa ka wa mpoloka ka bosaitsiweng,
go tsamaya bogale jwa gago bo feta,
wa ka wa ntaolela motlha
o o tlhomameng,
mme wa nkgakologelwa.
14Fa monna a swa,
a o tlaa ba a tshela?
Ke ne ke tlaa lebelela
ka malatsi otlhe a ntwa eo ya me,
kgololo ya me e be e tsamaye e tle.
15O ne o ka bitsa,
ke ne ke tlaa go araba;
o ne o tlaa eletsa
tiro ya diatla tsa gago.
16Mme jaanong, ke fa,
o bala dikgato tsa me;
a ga o lebale boleo jwa me?
17Tlolo ya me e kanetswe
mo kgetseng,
mme o hunela boikepo jwa me.
18Ruri thaba e e wang e tle e nyelele,
le lefika le sutisiwe
mo bonnong jwa lone;
19metsi a tle a gotlhe maje;
merwalela ya one
e gopele ruri lorole lwa lefatshe;
le wena o tle o senye tsholofelo
ya motho.
20O mo fenya ka bosakhutleng,
mme a fete;
o fetole sefatlhogo sa gagwe,
mme o mo neye tsela.
21Bomorwawe ba newe tlotlo,
mme ene a se ke a itse;
ba kokobediwe,
mme a se ke a go lemoge
mo go bone.
22Nama ya gagwe mo go ene
e nne botlhoko,
mowa wa gagwe mo teng ga gagwe
o hutsafale.”
