JOBE 15

₂“A monna yo o botlhale

o tshwanetse go fetola

ka kitso ya boithamako,

a kgorisa mpa ya gagwe

ka phefo ya botlhabatsatsi?

₃A go tshwanetse fa a ka tsaya kgang

ka puo e e se nang thuso,

kgotsa ka dipolelo

tse o sa kakeng a dira molemo ope

ka tsone?

₄Ee, o tsupuetsa poifo,

mme o ngotla tshisimogo

fa pele ga Modimo.

₅Gonne boikepo jwa gago

bo ruta molomo wa gago,

mme o itshenkela loleme

lwa maferefere.

₆Molomo wa gago tota o a go sekisa,

e seng nna;

ee, dipounama tsa gago

di supa ka ga gago di go nyatsa.

₇“A ke wena monna wa ntlha

yo o tsetsweng?

Kgotsa a o tsetswe pele

ga dithabana?

₈A o utlwile kgakololo

e e sa itsiweng ya Modimo?

A o ikganelela botlhale?

₉O itse eng se rona re sa se itseng?

O tlhaloganya eng

se se seng mo go rona?

₁₀Ba ba ditlhogo ditshweu

le banna ba ba tsofetseng thata

re na nabo,

ba ba tsofetseng thata

bogolo go rraago.

₁₁A dikgomotso tsa Modimo

di dipotlana bobe mo go wena,

le lefoko le le buang nao ka bonolo?

₁₂Ana pelo ya gago

e go isetsang kwa kgakala,

le matlho a gago a gwetlhelang?

₁₃Fa e bo ne ne o sokolola mowa

wa gago go tlhabana le Modimo,

o lesa mafoko a a ntseng jalo

a tswa mo molomong wa gago?

₁₄Ana motho e be e le eng,

fa e bo ne ne go twe,

o ka nna montle,

le yo o tsetsweng ke mosadi,

fa e bo ne ne go twe,

o ka nna tshiamo?

₁₅Bona, ga o ikanye baitshepi ba one;

ee, le magodimo ga a mantle

mo ponong ya one.

₁₆Bogolo jang go sa kake ga nna jalo

motho yo o makgapha,

yo o bodileng, e le monna

yo o nwang boikepo jaaka metsi!

₁₇“Nkutlwa, ke tlaa go kaela;

se ke se bonyeng ke tlaa se bolela:

₁₈(Se banna ba ba botlhale

ba se boletseng

se tswa mo go borraabo,

mme ba se ka ba se loba;

₁₉ba lefatshe le neilweng bone

ba le bosi,

mme go se ka ga fetela moeng ope

mo go bone:)

₂₀Moikepi o inganga mo botlhokong

ka metlha yotlhe ya gagwe,

mme dinyaga tse di badilweng

di beetswe mopatiki.

₂₁Modumo wa ditheregiso

o mo ditsebeng tsa gagwe;

le a le mo tlhogonolong

mothopi o tlaa mo wela.

₂₂Ga a dumele fa a tlaa boa

a tswa mo lefifing,

a lebeletswe ke tšhaka.

₂₃O kgarakgatshegela dijo, a re:

‘Di kae?’ O a itse fa letsatsi la lefifi

le etleetsegile, le le fa go ene:

₂₄Pitlagano le tlalelo e e mahehe

di a mmoifisa;

di a mo fenya jaaka kgosi

e e iketleeditseng go tlhabana;

₂₅gonne o otlololetse Modimo letsogo

go tlhabana nao,

o inatlafaletsa Mothatayotlhe.

₂₆O a o sotlhomelela ka thamo

e e thata le ka dikgogoropo

tsa dithebe tsa gagwe;

₂₇gonne o ikhurumeditse sefatlhogo

ka monono wa gagwe;

mme a dire makukunopo

a mahura mo dithekeng tsa gagwe.

₂₈O ntse a agile mo metseng

e e swafetseng, mo matlong

a a sa nnweng ke ope,

a a ne a iketleeditse

go nna mekoa ya go wa fela.

₂₉Ga a ketla a huma,

le dithoto tsa gagwe

ga di ketla di tlhomama,

le gone go ungwa ga tsone

ga go ketla go inamela fa fatshe.

₃₀Ga a ketla a tswa mo lefifing;

kgabo ya molelo

e tlaa omeletsa dikala tsa gagwe,

mme o tlaa tsamaela koo ka pudulo

ya molomo wa one.

₃₁A a se ikanye boithamako a itsietsa,

gonne boithamako e tlaa nna maduo

a gagwe.

₃₂Go tlaa mo dirafalela

pele ga motlha wa gagwe,

kala ya gagwe

ga e ketla e nna nana.

₃₃O tlaa udubatsega

dikungwa tsa gagwe

tse di sa butswang jaaka mofine,

o tlaa tlhotlhorega sethunya

sa gagwe jaaka motlhware.

₃₄Gonne lesomo la ba ba sa reng

Modimo sepe le tlaa nna boopa,

molelo o tlaa laila megope

ya ba ba neo e e faposang tshiamo.

₃₅Ba ithwala bosenyi,

ba tsala boikepo,

mpa ya bone e baakanya tsietso.”