Satane o leka Jobe lwa bobedi
1Gape go le letsatsi lengwe le bomorwa Modimo ba yang go iponatsa fa pele ga Jehofa ka lone, Satane le ene a ya nabo, a ya go iponatsa fa pele ga Jehofa. 2Jehofa a raya Satane a re: “O tswa kae?” Satane a fetola Jehofa a re: “Ke tswa go kgarakgatshega mo lefatsheng, le go tsamayatsamaya mo go lone.”
3Jehofa a raya Satane a re: “A o ntse o tlhokometse motlhanka wa me Jobe, gonne ga go na ope yo o tshwanang nae mo lefatsheng, e le monna yo o itekanetseng, yo o thokgameng, a boifa Modimo, a tshaba bosula? O sa ntse a tshegeditse bosenang molato jwa gagwe, le fa o ntlhotlheleditse, gore ke mo senye ka bomo.”
4Satane a fetola Jehofa a re: “Letlalo le tle le ntshediwe letlalo, ee, tsotlhe tse motho o nang natso o tlaa di ntshetsa botshelo jwa gagwe. 5Mme a ko o ntshe seatla sa gago jaana, o mo ame lesapo le nama, mme o tlaa go itatola mo matlhong a gago.”
6Jehofa a raya Satane a re: “Bona, o mo seatleng sa gago; o rekegele botshelo jwa gagwe, ke gone gotlhe.”
7Jalo Satane a tswa fa pele ga Jehofa a ya a itaya Jobe ka diso tse di bosula, go simolola ka sebete sa lonao go ya phogong ya gagwe. 8A itseela lobeana go ingwaya ka lone; mme a dula mo meloreng.
9Foo mosadi wa gagwe a mo raya a re: “A o sa ntse o tshegeditse bosenang molato jwa gago? Itatole Modimo, mme o swe.”
10Mme a raya mosadi a re: “O bua jaaka mongwe wa basadi ba ba dieleele a tle a bue. Wa reng? A re tlaa amogela molemo mo seatleng sa Modimo, mme re se ke re amogele bosula?” Mo go tse tsotlhe Jobe ga a ka a leofa ka molomo wa gagwe.
Jobe o lekolwa ke ditsala tsa gagwe
11Jaana e rile ditsala tsa ga Jobe di le tharo di utlwela bosula jotlhe jo, jo bo tsileng mo go ene, tsa tloga tsa tswa mongwe le mongwe kwa ga gagwe; Elifase wa Motemane, Biletate wa Mošuhe le Sofare wa Monaamathe; ba laletsanya gore ba kgatlhane ba ye go mo hutsafalela le go mo gomotsa. 12Ya re ba tsholetsa matlho ba sa le kgakala, mme ba sa mo itse, ba tlhatlosa mantswe a bone ba lela; mongwe le mongwe a ikgagola kobo, mme ba kubuelela lorole legodimong godimo ga tlhogo tsa bone. 13Jalo ba dula nae fa fatshe ka malatsi a supa le masigo a supa, ope a se ka a bua lefoko nae; gonne ba bona fa botlhoko jwa gagwe bo le botona thata.
