JOBE 21

₂“Lo bo lo utlweng puo ya me

sentle;

mme se e nne dikgomotso tsa lona.

₃Ntesang, le nna ke tlaa bua;

ke tlaa re ke sena go bua,

lo sotlele pele fela.

₄Ka ga me, go itoka ga me

a ke go itokela motho?

Ke tlaa bo ke sa nne legweegwee

ka ntlha yang?

₅Lo nkele tlhoko, lo gakgamale,

mme lo ipeye seatla mo melomong.

₆Ee, le e tle e re fa ke gakologelwa

ke huduege,

le go tsitla marapo go ntshware.

₇Ana baikepi ba tshela ka ntlha yang

ba tsofale,

ee, ba natlafale mo nonofong?

₈Losika lwa bone lo tlhomame nabo

mo ponong ya bone,

le lotsalo lwa bone

mo matlhong a bone.

₉Mantlo a bone a dibelesege

mo poifong,

le gone thupa ya Modimo

ga e ke e nna mo go bone.

₁₀Poo ya bone e gwele fela

e se ke e tlhaele;

kgomo ya bone e tsale

e se ke e folotse.

₁₁Ba tle ba bolotse banyana ba bone

jaaka letsomane,

mme bana ba bone ba bine.

₁₂Ba opelele meropana le harepe,

ba itumelele go lediwa ga lotlhaka.

₁₃Ba fetise malatsi a bone

mo tlhogonolofalong,

mme e a re ka ponyo ya leitlho

ba kotlomelele fela mo Bobipong.

₁₄Le fa go ntse jalo,

ba reile Modimo ba re:

‘Tloga mo go rona;

gonne ga re eletse kitso

ya ditsela tsa gago.

₁₅Mothatayotlhe ya bo e le eng,

fa e bo ne ne re ka mo direla?

Re tlaa bo re bona molemo wang

fa re mo rapela?’

₁₆Bona, go tlhogonolofala ga bone

ga go mo seatleng sa bone;

kgakololo ya baikepi

ke kgakala nayo.

₁₇Lobone lwa baikepi

lo tle lo tingwe ga kae?

Tatlhego ya bone

e tle e ba tlele ga kae?

Modimo o tle o abe mahutsana

mo bogaleng jwa one ga kae?

₁₈Fa ba tla bo ba ka nna ga kae

jaaka dirine fa pele ga phefo,

le jaaka mmoko

o setsuatsue se o tsubulang?

₁₉Lo a tle lo re:

‘Modimo o beela bana ba gagwe

boikepo jwa gagwe.’

A o bo lefetse mo go ene ka esi

gore a bo ikitse.

₂₀A matlho a gagwe ka osi

a bone tshenyego ya gagwe,

a a nwe botšarara

jwa Mothatayotlhe.

₂₁Gonne o na le go kgatlhwa ke eng

mo ntlong ya gagwe

morago ga gagwe,

etswa palo ya dikgwedi tsa gagwe

e kgaotswe ka bogare?

₂₂A mongwe o ka ruta Modimo kitso,

etswa o atlhola bogoletsegi?

₂₃Mongwe o swa a tletse nonofo

a iketlile,

a ituletse gotlhe fela.

₂₄Mabele a gagwe a tletse maši,

le moko wa marapo a gagwe

o mahura fela.

₂₅Yo mongwe a swe

a le mowa o botlhoko,

le a e se ke a utlwe

se se molemo gope.

₂₆Ba itelege mmogo fela

ka bobedi mo loroleng,

mme seboko se ba khurumetse.

₂₇“Bonang, ke a e itse

megopolo ya lona,

le maano a lo a ntogelang

ka go sa siamang.

₂₈Gonne lwa re:

‘Ntlo ya kgosana e kae?

Le mogope o moikepi o kileng

a o nna o kae?’

₂₉A ga lo a botsa bone

ba ba fetang le tsela?

A ga lo itse dikao tsa bone?

₃₀Go re motho yo o bosula

o rekegelelwa letsatsi la tatlhego,

le go re ba gogelwa koo

kwa letsatsing la botšarara?

₃₁E mang yo o tlaa bolelang

tsela ya gagwe matlhong a gagwe?

E mang yo o tlaa mo kgopololelang

se o se dirileng?

₃₂Le fa go ntse jalo

o tlaa isiwa kwa lebitleng,

mme ba tlaa lebela phupu ya gagwe.

₃₃Makote a molapo

a tlaa nna botshe mo go ene,

mme batho botlhe

ba tlaa gogegela kwa go ene,

jaaka go ne go le ba ba se nang palo

pele ga gagwe.

₃₄Mme e le foo lo nkgomotsa jang

ka lefela,

ka mo diphetolong tsa lona

go setse boikanyologo fela.”