Jobe
1Jobe a ba a tloga gape a tlhaba seane sa gagwe, a re:
2“Jaaka Modimo o tshedile,
o o ntloseditseng tshiamelo ya me;
le Mothatayotlhe
yo o tshwentseng mowa wa me:
3(Gonne botshelo jwa me
bo sa ntse bo itekanetse mo go nna
le mowa wa Modimo
o mo dinkong tsa me);
4ruri dipounama tsa me
ga di kake tsa bua tshiamololo,
le loleme lwa me
ga lo ketla lo bua tsietso.
5A go nne kgakala le nna
fa nka lo siamisa;
ga nketla ke itlosa thokgamo ya me,
go ba ke tla ke swa.
6Tshiamo ya me ke e tshwaretse
ruri,
ga nketla ke e lesa;
ke tlaa re ke sa ntse ke tshedile,
pelo ya me ga e ketla e nkgoba.
7A mmaba wa me
a nne jaaka baikepi,
le gone a yo o ntsogologelang
a nne jaaka basiamolodi.
8Gonne tsholofelo ya yo o sa reng
Modimo sepe ke eng,
le fa a bona papadi
mogang Modimo o tlosang
mowa wa gagwe?
9A Modimo o tlaa utlwa go goa
ga gagwe monna yo,
fa pitlagano e tla mo go ene?
10A o tlaa inatetshetsa Mothatayotlhe,
a biletsa kwa Modimong
ka metlha yotlhe?
11Ke tlaa lo ruta
ka ga letsogo la Modimo;
se se kwa go ene
Mothatayotlhe ga nketla ke se
loba.
12Bonang, lona lotlhe ka losi
lo se bonye;
ke ka ntlha yang
lo ithamaketse ruri?”
Sofare
13“E ke yone kabelo ya moikepi
mo Modimong,
le boswa jwa bapatiki
jo ba bo amogelang
mo go Mothatayotlhe.
14Fa bana ba gagwe ba ntsifala,
e be e le ba ntsifalela tšhaka fela;
lotsalo lwa gagwe
ga lo ketla lo kgora dijo.
15Ba gagwe ba ba setseng
ba tlaa fitlhwa mo losong,
batlholagadi ba gagwe
ga ba ketla ba dira khutsafalo.
16Le fa a ka koa selefera jaaka lorole,
a ba a baakanya diaparo
jaaka seretse;
17o ka di baakanya fela,
mme basiami ba tlaa di apara,
le ba ba se nang molato
ba tlaa kgaogana selefera.
18O aga ntlo ya gagwe jaaka
serurubele,
le jaaka loobo lo moleti o lo agang.
19O itelega a humile,
mme e be e le lwa bofelo;
a budulole matlho,
mme a ba a seyo.
20Ditherego di mo tshware
jaaka metsi;
ledimo la phefo le mo utswe bosigo.
21Phefo ya botlhabatsatsi e mo
kgopholele koo, mme a tloge;
e mo feele,
a tloge mo felong ga gagwe.
22Gonne Modimo o tlaa mo hureetsa,
mme o se ke o rekegele;
o ka rata a ka bo a tshaba
a tswa mo seatleng sa one.
23Batho ba tlaa mo opela diatla,
ba mo otsa,
ba mo ntsha felong ga gagwe.”
