Polelo ya bofelo ya ga Jobe ka ga gagwe
1Mme Jobe a fela a tlhaba seane sa gagwe, a re:
2“A bo ke ka bo ke ntse jaaka
mo dikgweding tsa bogologolo,
jaaka mo malatsing
a Modimo o ntisitseng ka one;
3ka lampa ya one wa mphatsimela
mo tlhogong,
mme ka tsamaya ka lesedi la one;
4jaaka ke ne ke le mo nonofong
ya malatsi a me,
jaaka ka tsalano ya Modimo
e le mo mogopeng wa me;
5ka Mothatayotlhe
a sa ntse a na le nna,
le bana ba me
ba le tikologong ya me;
6ka dikgato tsa me
di ne di tlhapisiwa ka madila a maši,
mme lefika la nthelela
dinoka tsa lookwane!
7E ne e tle e re ke tswela
kwa kgotleng kwa motseng,
e re ke baakanya setulo sa me
mo mmileng,
8makau a ne a tle a re a mpona
a iphitlhe,
le banna bagolo ba nanoge
ba eme ka dinao;
9dikgosana di khutle go bua,
di ipeye seatla mo molomong;
10lentswe la bagolwane le tuulale,
le loleme lwa bone
lo ngaparele magalapa a bone.
11Gonne e ne e tle e re tsebe
e nkutlwa, foo e ntshegofatse;
e re leitlho le mpona, le supe ga me;
12gonne ke ne ke pholosa
mohumanegi yo o goelelang,
le lesiela le le se nang ope
yo o le thusang.
13Tshegofatso ya yo o batlileng
go nyelela ya tla mo go nna;
pelo ya mosadi wa motlholagadi
ka e ipedisa ka boitumelo.
14Ka apara tshiamo, mme ya nkapesa;
tekatekanyo ya me
e ne e ntse jaaka kobo
le tlhoro ya bogosi.
15Ke ne ke le matlho a difofu,
ke le dinao tsa batlhotsi.
16Ke ne ke le rra batlhoki;
ka ba ka tlhotlhomisa mafoko
a tsheko a yo ke sa mo itseng.
17Ka roba ditlhaya tsa mosiamolodi,
ka phamola thopo
mo menong a gagwe.
18Foo ka re ke tlaa swela
mo setlhageng sa me,
ke tlaa ntsifatsa malatsi a me
a nna jaaka mošawa.
19Modi wa me o anametse kwa
metsing, monyo o lala
o le mo kaleng ya me bosigo jotlhe.
20Borena jwa me bo ntse boša
mo go nna, bora jwa me
bo šafetse mo seatleng sa me.
21Batho ba ne ba tle ba ntshekegele
tsebe, ba lebelele,
ba didimalele kgakololo ya me.
22E re morago ga mafoko a me
ba se ke ba tlhole ba bua;
mme puo ya me ya ba rothela.
23Ba ne ba ntebelela
jaaka go lebelelwa pula;
ba atlhamolosa legano thata
jaaka ekete go na pula
ya kgogolammoko.
24Fa ke ne ke ba tshega
ba se ke ba go dumele;
le go sa ga matlho a me
ba se ke ba go tlhontshe.
25Ka ba senkela tsela ya bone,
mme ka nna tlhogo,
ka ba ka aga jaaka kgosi mo ntweng,
jaaka mongwe yo o gomotsang
bahutsafadi.”
