Jobe
1Foo Jobe a fetola a re:
2“Le gale ke a itse fa go ntse jalo,
mme motho o ka siama jang
fa pele ga Modimo?
3Fa a rata go ganela nao,
ga a kake a o fetola
ka ga molato o le mongwe fela
mo go e e makgolo a lesome.
4O botlhale mo pelong,
o thata mo nonofong;
e mang yo o o ithatafaleditseng
mme a tlhogonolofala?
5O o sutisang dithaba,
di se ke di itse,
mogang o di pitikololang
mo bogaleng jwa one.
6O o reketlisang lefatshe,
le tloge felong ga lone,
le maotwana a lone a rorome.
7O o laolang letsatsi,
mme le se ke le tlhabe;
o bo o kane dinaledi.
8O o phuthololang magodimo
o le osi,
o gate makhubu a metsi a lewatle.
9O o dirang dinaledi tsa
Kgogamasigo, Oriona, Selemela,
le matlwana a kwa Borwa.
10O o dirang dilo tse dikgolo
tse di se nang botlhotlhomiso;
ee, dilo tse di gakgamatsang
tse di se nang palo.
11Bonang, o kgabaganya fa go nna,
mme ga ke o bone;
le gone o fetele kwa pele,
mme ga ke o lemoge.
12Bonang, o a thopa,
mme e mang yo o ka kganelang?
E mang yo o tlaa o rayang a re:
‘O dirang?’
13“Modimo ga o ketla o kganelela
bogale jwa one kwa morago;
bathusi ba moikgogomosi
ba ikokobetse fa tlase ga gagwe.
14Ana nna bogolo jang, ke tlhoka
ka fa ke ka o fetolang ka gone,
le go itlhophela mantswe
a nka ganetsanyang nao ka one.
15O, le fa ke ne ke le tshiamo,
le fa go ntse jalo
ke ne ke se ketla ke o fetola,
ke ne ke ka kokotlela
moganetsi wa me fela.
16Fa nka bo ke ne ke biditse,
mme fa o ne o nkarabile;
le fa go ntse jalo
ke ne ke se ketla ke dumela
fa o reeditse lentswe la me.
17Gonne o nthobaka ka ledimo
la phefo,
o ntsifatsa dintho tsa me ka bomo.
18O gana go nteseletsa
ka kgwa setšhe,
o ntlatsa ka bogalaka.
19Fa re bua ka ga thata ya mothata,
bonang, o a bo a le fa!
Fa e le ka ga tsheko,
e mang yo o tlaa ntaolelang lobaka?
20Le fa ke le tshiamo,
o o leng molomo wa me
o tlaa ntshekisa;
le fa ke le boitekanelo
o tlaa ntshupa gore ke lesoko.
21Le fa ke itekanetse
ga ke itlhokomele;
ke nyatsa botshelo jwa me.
22Go tshwana fela;
ke gone ke reng,
o senya moitekanedi le moikepi.
23Fa sebetso se bolaya ka tshoganetso,
o tlaa sotla ka tshenyegelo
ya yo o se nang molato.
24Lefatshe le tsentswe mo seatleng
sa baikepi,
o khurumetse sefatlhogo
sa baatlhodi ba lone;
fa e se one,
ana e tlaa bo e le mang?
25“Jaanong malatsi a me a bofefo
bogolo go motabogi
yo o isang dikwalo;
a tshabela koo,
ga a bone molemo ope.
26A fetile jaaka dikepe
tse di hadimang;
jaaka ntswi yo motona
yo o tsuulalelang phologolo.
27Fa ke re: ‘Ke tlaa lebala boitoko
jwa me,
ke tlaa apola sefatlhogo
se se tlhontseng,
ke tlaa nametsega pelo;’
28ke boifa mahutsana a me otlhe,
ke a itse fa o se ketla o nkaya go re
ga ke na molato.
29Ke tlaa sekisiwa;
ke ka ntlha yang
fa ke kgokololela lefela?
30Fa ke tlhapa ka metsi a kapoko,
ke ba ke intlafatsa diatla
mo go ntseng jang;
31le fa go ntse jalo,
o tlaa nthabuetsa
mo moseleng wa metsi,
diaparo tse e leng tsa me
di tlaa nkila.
32Gonne one ga se monna jaaka nna,
yo ke ka reng ke ka mo fetola,
gore re tle re kopane mmogo
mo tshekong.
33Ga go na motsereganyi
gare ga rona,
yo o ka re bayang seatla
roo babedi.
34A o tlose thupa ya one mo go nna,
a theregiso ya one e se mpoifise;
35foo ke ne ke tlaa bua,
ke sa o boife,
gonne mo go nna ka nosi
ga ke a nna jalo.”
