JOELE 1

₂Utlwang se, lona bannabagolo,

lo sekegeng tsebe,

lona banni botlhe ba lefatshe!

A selo se, se kile sa nna

mo metlheng ya lona,

kgotsa mo metlheng ya borraeno?

₃Bolelelang bana ba lona

ka ga sone, a bana ba lona

ba bolelele bana ba bone,

mme bana ba bone ba bolelele

kokomana e nngwe.

₄Se mogokong o se tlogetseng,

tsie e se jele;

se tsie e se tlogetseng,

boijane bo se jele;

se boijane bo se tlogetseng,

seboko se se jele.

₅Kubugang, matagwa ke lona, lo lele;

bokolelang lona lotlhe

banwi ba bojalwa jwa mofine,

ka ntlha ya bojalwa jo bo monate;

gonne bo kgaotswe

mo ganong la lona.

₆Gonne morafe mongwe o o thata,

o o se nang palo,

o tsile mo lefatsheng la me;

meno a one ke meno a tau,

o na le meno a lotlhaa a tau e tona.

₇O kgakgabaditse mofine wa me,

o kgobotse feige ya me makwati,

o e kgoboletse ruri, o e latlhile,

dikala tsa yone di ditshweu.

₈Hutsafala jaaka lekgarebana

le le itlamileng ka letsela la kgetse,

le hutsafalela

monna wa borweetsana jwa lone.

₉Tshupelo ya boupe

e na le tshupelo e e nowang

e kgaotswe mo ntlong ya ga Jehofa;

baperesiti, badiredi ba ga Jehofa,

ba a hutsafala.

₁₀Lotlhagare lo kgakgabaditswe,

lefatshe le a hutsafala;

gonne mabele a sentswe,

bojalwa jwa mofine jo boša

bo tšhele,

lookwane lo a tshoboega.

₁₁Lo tlhajwe ke ditlhong,

lona balemi, bokolelang,

lona babaakanyi ba mafine,

ka ntlha ya mabele;

le ka ntlha ya barele;

gonne thobo ya masimo e sule.

₁₂Mofine o swabile,

mofeige o a tshoboega; mogaranata,

le one mokolane le moapole,

e bong ditlhare tsotlhe tsa masimo

di swabile;

gonne boitumelo bo swabile,

bo tlogile mo baneng ba batho.

₁₃Itlameng ka letsela la kgetse,

lo hutsafale lona baperesiti;

bokolelang lona badiredi ba sebeso;

ntlong, lo lale bosigo jotlhe

ka letsela la kgetse,

lona badiredi ba Modimo wa me;

gonne tshupelo ya boupe

e na le tshupelo e e nowang

e kganeletswe ntlo ya Modimo

wa lona.

₁₄Itshepiseng go ikitsa go ja,

kuang modiro o o masisi,

phuthang banna bagolo,

le banni botlhe ba lefatshe,

lo ba phuthele mo ntlong

ya ga Jehofa Modimo wa lona,

mme lo biletse kwa go Jehofa.

₁₅Ija we! A letsatsi le legolo!

Gonne letsatsi la ga Jehofa

le atametse,

le tlaa tla jaaka tshenyo

e e tswang kwa go Mothatayotlhe.

₁₆A dijo ga di a kgaolwa

fa pele ga matlho a lona?

Ee, boitumelo le boipelo

mo ntlong ya Modimo wa rona?

₁₇Dipeo di bola

fa tlase ga makote a tsone;

mabolokelo a mabele a swafaditswe,

matlo a mabele a rutlilwe;

gonne mabele a swabile.

₁₈Ana dikgomo di fegelwa jang!

Matlhape a akabetse,

ka a se na bohulo;

ee, matsomane a dinku

a swafaditswe.

₁₉Jehofa, ke goela koo go wena,

gonne molelo o laitse mafulo

a kwa nageng,

dikgabo di fisitse ditlhare tsotlhe

tsa naga.

₂₀Ee, diphologolo tsa naga

di a go fegelelwa,

gonne melatswana ya metsi

e kgadile,

molelo o laitse mafulo

a kwa nageng.