JOŠUA 1

₁Jaana ga dirala e rile morago ga loso lwa ga Moše motlhanka wa ga Jehofa, Jehofa a bua le Jošua morwa Nune, modiredi wa ga Moše, a re: ₂“Moše motlhanka wa me o sule; jaana nanoga o kgabaganye Joretane ono, wena le tšhaba e yotlhe, lo ye kwa lefatsheng le ke le ba nayang, e bong bana ba Iseraele. ₃Gongwe le gongwe fa pato ya lonao lwa lona e tlaa go gatang, ke go lo neile jaaka ke buile le Moše. ₄Go simologa kwa nageng, le Lebanone yo, go ya fela kwa nokeng e kgolo, noka ya Euferatese, lefatshe lotlhe la Bahite go ya kwa lewatleng le legolo ntlheng ya bophirimatsatsi, e tlaa nna molelwane wa lona. ₅Ga go ketla go nna motho ope yo o tlaa nonofang go ema fa pele ga gago malatsi otlhe a botshelo jwa gago; jaaka ke ne ka nna le Moše, ke tlaa nna nao jalo; ga nke ke go latlha le fa e le go go tlogela. ₆Nna thata le pelokgale, gonne ke wena yo o tlaa nayang setšhaba se lefatshe le ke neng ka ikanela go le naya borraabo. ₇Fela o nne thata le pelokgale, go tlhokomela go dira ka fa molaong otlhe, o Moše motlhanka wa me o o go laoletseng; o se ka wa o fapoga wa ya ka fa ntlheng ya le legolo kgotsa go la molema, gore o tle o bone go segofala sentle kwa le kwa o yang teng. ₈Lokwalo lo lwa molao, lo se tloge mo molomong wa gago, o akanye mo go lone motshegare le bosigo, gore o tlhokomele go dira ka fa go tsotlhe tse di kwadilweng mo go lone, gonne tsela ya gago e tlaa nna le letlhogonolo jalo, mme o tlaa bona go segofala sentle. ₉A ga ke a go laola? Nna thata le pelogale; o se boifisiwe, le gone o se ka wa raraana, gonne Jehofa Modimo wa gago o na nao kwa le kwa o yang gone.”

₁₀Foo Jošua a laola bagolo ba batho, a re: ₁₁“Ralalang bothibelelo, lo laole batho, lo re: ‘Lo ipaakanyetseng mefago; gonne e tlaa re malaatsi e le mararo a ise a fete lo tlaa bo lo kgabaganya Joretane ono, lo ya go tsena lo rua lefatshe le Jehofa Modimo wa lona o le lo nayang go le rua.’ ”

₁₂Jošua a bua le Barubene, le Bagate, le ba ntlhanngwe ya lotso lwa ga Manase, a re: ₁₃“Gakologelwang lefoko le Moše motlhanka wa ga Jehofa o le lo laoletseng, a re: ‘Jehofa Modimo wa lona o lo naya boikhutso, o tlaa lo naya lefatshe le.’ ₁₄Basadi ba lona, le banyana ba lona, a ba nne le dikgomo tsa lona, mo lefatsheng le Moše o le lo neileng moseja ono ga Joretane; mme lona lo kgabaganye fa pele ga bana ba rraeno lo tlhometse, e bong banna botlhe ba ba diganka ba ba pelokgale, mme lo ba thuse; ₁₅go tsamaya Jehofa a naya bana ba rraeno boikhutso, jaaka a neile lona, le bone ba rua lefatshe le Jehofa Modimo wa lona o le ba nayang; foo lo tlaa boela lefatsheng la thuo ya lona, lo le rua, e bong Moše motlhanka wa ga Jehofa o le lo neileng moseja ono ga Joretane ntlheng ya botlhabatsatsi.”

₁₆Ba fetola Jošua, ba re: “Tsotlhe tse o di re laoletseng re tlaa di dira, le kwa le kwa o re romang teng re tlaa ya. ₁₇Jaaka re reeditse Moše mo dilong tsotlhe, le wena re tlaa go reetsa jalo: ra re: A Jehofa Modimo wa gago o nne nao, jaaka o ne a nna le Moše! ₁₈Le fa e le mang yo o tlaa tsuololelang taolo ya gago, a gana go reetsa mafoko a gago mo go tsotlhe tse o di mo laolelang, o tlaa bolawa; fela, o nne thata le pelokgale.”