JOŠUA 16

₁Kabelo ya taolelo ya bana ba ga Josefe, ya tloga mo Joretane fa Jeriko, fa metsing a Jeriko, ntlheng ya botlhabatsatsi, e bong mo nageng, ya tlhatloga ka Jeriko e ralala lefatshe la makgabana e leba kwa Bethele; ₂ya tswa Bethele ya leba Luse, ya kgabaganyetsa kwa molelwaneng wa Baareke, go ya kwa Atarothe; ₃ya fologela ntlheng ya bophirimatsatsi, ya ya kwa molelwaneng wa Bajafelete, kwa molelwaneng wa Bethehorone o o kwa tlase, e bong kwa Gesere; mme mafelelo a molelwane a nna mo lewatleng.

₄Mme bana ba ga Josefe, e bong Manase le Eferaime, ba tsaya boswa jwa bone.

₅Molelwane wa bana ba ga Eferaime ka fa ditshikeng tsa bone wa nna jaana: e bong molelwane wa boswa jwa bone ntlheng ya botlhabatsatsi, ya nna: Atarothe-atare, go ya kwa Bethehorone o o godimo. ₆Molelwane wa tswela ntlheng ya bophirimatsatsi fa Mikemethathe ntlheng ya botsheka; molelwane wa menogela ntlheng ya botlhabatsatsi wa ya kwa Taanate-šilo, wa feta ka gone o isa bopota Janoa ntlheng ya botlhabatsatsi ga Janoa; ₇wa tswa Janoa wa fologela kwa Atarothe, le kwa Naara, wa fitlha kwa Jeriko, wa khutla mo Joretane. ₈Go tswa Tapua molelwane wa tswela ntlheng ya bophirimatsatsi kwa molatswaneng wa Kana; mafelelo a one a nna mo lewatleng. Jo ke jone boswa jwa lotso lwa bana ba ga Eferaime ka fa ditshikeng tsa bone; ₉bo pataganye le metse e e lomololetsweng bana ba ga Eferaime mo gare ga boswa jwa bana ba ga Manase, metse yotlhe le metsana ya yone. ₁₀Mme ba se ka ba leleka Bakanana ba ba neng ba agile mo Gesere; Bakanana ba aga mo gare ga Eferaime nako e se le eno, ba tswa batlhanka ba go dira se ba se laolwang.