JOŠUA 18

₁Phuthego yotlhe ya bana ba Iseraele ya phuthegela kwa Shilo, mme ba tlhoma mogope wa bophuthegelo teng; lefatshe la bo le fenyegile fa pele ga bone. ₂Ga bo go setse ditso di supa mo baneng ba Iseraele, tse di iseng di abelwe boswa jwa tsone. ₃Mme Jošua a raya bana ba Iseraele, a re: “Lo tlaa nyafala ka lobaka lo lo kae go ya go rua lefatshe le Jehofa Modimo wa borraeno o le lo neileng? ₄Itebalebeleng banna ba le bararo ba lotso longwe le longwe; ke tlaa ba roma, ba tlaa nanoga ba ralala lefatshe ba le kwala ka fa bosweng jwa bone, ba tla itse go tla kwano go nna. ₅Ba tlaa le kgaoganya sesupa: Juta o tlaa nna mo teng ga molelwane wa gagwe fela ntlheng ya borwa, ba ntlo ya ga Josefe ba tlaa nna mo teng ga molelwane wa bone ntlheng ya botsheka. ₆Lo tla kwala lefatshe dikabo di supa, lo lere lokwalo kwano go nna; mme ke tlaa lo laolela ka bola fano fa pele ga Jehofa Modimo wa rona. ₇Gonne Balefi ga ba na kabelo mo go lona; gonne boperesiti jwa ga Jehofa ke jone boswa jwa bone; mme Gate le Rubene le bontlhanngwe jwa lotso lwa ga Manase ba amogetse boswa jwa bone kwa moseja ga Joretane ntlheng ya botlhabatsatsi, jo Moše motlhanka wa ga Jehofa o bo ba neileng.”

₈Banna bao ba nanoga ba tsamaya; Jošua a laya bone ba ba yang go kwala lefatshe, a re: “Yang lo ralale lefatshe, lo le kwale, lo itse go boela kwano go nna, ke tlaa lo laolela ka bola fano fa pele ga Jehofa mo Shilo.” ₉Banna bao ba ya ba ralala lefatshe, ba le kwala dikgaogano di supa mo lokwalong ka fa metseng ya lone, ba itse go tla kwa go Jošua mo bothibelelong kwa Shilo. ₁₀Jošua a ba laolela ka bola mo Shilo fa pele ga Jehofa; Jošua a kgaoganyetsa bana ba Iseraele lefatshe teng, ka fa dikgaoganong tsa bone.

₁₁Kabelo ya taolelo ya lotso lwa bana ba ga Benjamine ya tswa ka fa ditshikeng tsa bone; molelwane wa taolelo ya bone wa tswa fa gare ga bana ba ga Juta le bana ba ga Josefe. ₁₂Molelwane wa bone ntlheng ya botsheka wa simologa mo Joretane; molelwane wa tlhatlogela kwa lotlhakoreng lwa Jeriko ntlheng ya botsheka, wa tlhatloga le lefatshe la makgabana, wa ya ntlheng ya bophirimatsatsi; mafelelo a one a nna mo nageng ya Bethafene. ₁₃Molelwane wa tswa teng wa kgabaganyetsa kwa Luse, kwa lotlhakoreng lwa Luse (ke one Bethele) ntlheng ya borwa; molelwane wa fologela kwa Atarothe-atare ka fa thabeng e e potileng Bethehorone o o kwa tlase, ntlheng ya borwa. ₁₄Molelwane wa ralwa, mo ntlheng ya bophirimatsatsi wa menogela kwa ntlheng ya borwa, go tswa mo thabeng e e lebaganyeng le Bethehorone go ya ntlheng ya borwa; mafelelo a one a nna kwa Kiriathe-baale (ke one Kiriathe-jearime) motse wa bana ba ga Juta; ya nna one mofama wa kwa bophirimatsatsi. ₁₅Ntlha ya borwa ya simologa kwa bofelong jwa Kiriathe-jearime, molelwane wa tswela ntlheng ya bophirimatsatsi, wa tswela kwa motsweding wa metsi wa Nefetoa. ₁₆Molelwane wa fologela kwa bofelong jwa thaba e e lebaganyeng le mogogoro wa morwa Hinome, o o mo mogogorong wa Refaime ntlheng ya botsheka; wa fologela mo mogogorong wa Hinome go ya lotlhakoreng lwa Mojebuse ntlheng ya borwa, wa fologela kwa Enerogele; ₁₇wa ralwa ntlheng ya botsheka, wa tswa fa Enešemeše, wa tswela kwa Gelilothe, o o lebaganyeng le botlhatlogo jwa Adumime; wa fologela kwa letlapeng la ga Bohane morwa Rubene; ₁₈wa feta wa ya kwa lotlhakoreng lo lo lebaganyeng le Areba ntlheng ya botsheka, wa fologela mo Areba. ₁₉Molelwane wa kgabaganyetsa kwa lotlhakoreng lwa Bethehogela ntlheng ya botsheka; mafelelo a molelwane a nna mo sekgonong sa botsheka sa Lewatle la Letswai, kwa bokhutlong jwa Joretane ntlheng ya borwa; e ne e le one molelwane ntlheng ya borwa. ₂₀Joretane e ne e le molelwane wa lone ntlheng ya botlhabatsatsi. E ne e le jone boswa jwa bana ba ga Benjamine, ka melelwane ya lone mo tikologong, ka fa ditshikeng tsa bone.

₂₁Jaana metse ya lotso lwa bana ba ga Benjamine, ka fa ditshikeng tsa bone e ne e le Jeriko, Bethehogela, le Emeke-kesise; ₂₂le Betharaba, le Semaraime, le Bethele; ₂₃le Afime, le Para, le Ofera; ₂₄le Kefaramoni, Ofeni, le Geba; metse e le 12, le metsana ya yone; ₂₅Gibeone, Rama le Beerothe; ₂₆le Misepe, Kefira le Mosa; ₂₇le Rekeme, Irepeele le Tarala; ₂₈le Sela, Elefe, le Mojebuse (ke one Jerusalema), Gibeathe le Kiriathe; metse e le 14, le metsana ya yone. Ke yone boswa jwa bana ba ga Benjamine ka fa ditshikeng tsa bone.