JOŠUA 21

₁Foo ga atamela ditlhogo tsa Balefi tsa makgotla a borra batho, kwa go Eleasare moperesiti, le kwa go Jošua morwa Nune, le kwa ditlhogong tsa makgotla a borra batho, tsa ditso tsa bana ba Iseraele; ₂ba bua nabo mo Shilo mo lefatsheng la Kanana, ba re: “Jehofa o ne a laola ka Moše, gore ba re neye metse go aga mo go yone, e na le dintlhana, tsa yone.” ₃Bana ba Iseraele ba tsaya metse e, e na le dintlhana tsa yone, mo bosweng jwa bone, ba e naya Balefi, ka fa taolong ya ga Jehofa.

₄Kabelo ya taolelo ya tswela ditshika tsa Bakohathe; bana ba ga Arone moperesiti, ba e leng ba Balefi, ba bona metse e le 13 ka taolelo ya bola, e tswa mo lotsong lwa Juta, le mo lotsong lwa Basimeone, le mo lotsong lwa Benjamine. ₅Ba ba setseng ba bana ba ga Kohathe ba bona metse e le some ka taolelo ya bola, ya tswa mo ditshikeng tsa lotso lwa Eferaime, le mo lotsong lwa Dane, le mo go bontlhanngwe jwa lotso lwa Manase.

₆Bana ba ga Gerešone ba bona metse e le 13 ka taolelo ya bola, ya tswa mo ditshikeng tsa lotso lwa Isakare le mo lotsong lwa Ašere le mo lotsong lwa Nafetali, le mo go bontlhanngwe jwa lotso lwa Manase mo Bašane.

₇Bana ba ga Merari ka fa ditshikeng tsa bone ba bona metse e le 12 e tswa mo lotsong lwa Rubene, le mo lotsong lwa Gate, le mo lotsong lwa Sebulone.

₈Bana ba Iseraele ba naya Balefi metse eo le dintlhana mo tikologong ya yone, ka taolelo ya bola, jaaka Jehofa a laotse ka Moše.

₉Ba tsaya mo lotsong lwa bana ba Juta, le mo lotsong lwa bana ba Simeone, ba ba naya metse e e bolelwang fano ka maina; ₁₀ya nna ya bana ba ga Arone, ba ditshika tsa Bakohathe, ba e neng e le ba bana ba ga Lefi, gonne taolelo ya bola ya ntlha e le ya bone. ₁₁Ba ba naya Kiriathe-areba, Areba yoo e ne e le rraagwe Anake, (ke one Heberone), mo lefatsheng la Juta la makgabana, ka dintlhana mo tikologong ya gone. ₁₂Matlhagare a motse, le metsana ya one, ba go naya Kalebe morwa Jefune go nna boswa jwa gagwe.

₁₃Heberone ba go naya bana ba ga Arone moperesiti, le dintlhana tsa one, motse wa botshabelo jwa mmolai wa motho le Libena le dintlhana tsa gone; ₁₄le Jatire le dintlhana tsa gone, le Ešetemoa le dintlhana tsa gone; ₁₅le Holone le dintlhana tsa gone, le Debire le dintlhana tsa gone; ₁₆le Aine le dintlhana tsa gone, le Juta le dintlhana tsa gone, le Bethešemeše le dintlhana tsa gone; metse e fera mongwe fela mo ditsong tse pedi tse. ₁₇Mo lotsong lwa Benjamine ga tsewa Gibeone le dintlhana tsa gone; Geba le dintlhana tsa gone; ₁₈Anathothe le dintlhana tsa teng; Alemone le dintlhana tsa teng; metse e le mene. ₁₉Metse yotlhe ya bana ba ga Arone baperesiti, e ne e le metse e le 13 le dintlhana tsa yone.

₂₀Ditshika tsa bana ba ga Kohathe, Balefi, e bong ba ba setseng ba bana ba ga Kohathe, ba bona metse ya kabelo ya taolelo ya bone mo lotsong lwa Eferaime. ₂₁Ba ba naya Shekeme le dintlhana tsa teng mo lefatsheng la Eferaime la makgabana, motse wa botshabelo jwa mmolai wa motho, le Gesere le dintlhana tsa teng; ₂₂le Kibesaime le dintlhana tsa gone, le Bethehorone le dintlhana tsa gone; metse e le mene. ₂₃Mo lotsong lwa Dane, Eleteke le dintlhana tsa teng, Gibethone le dintlhana tsa teng; ₂₄Aijalone le dintlhana tsa gone, Gatherimone le dintlhana tsa gone; metse e le mene. ₂₅Mo go bontlhanngwe jwa lotso lwa Manase, Taanake le dintlhana tsa teng, le Gatherimone le dintlhana tsa teng; metse e le mebedi. ₂₆Metse yotlhe ya ditshika tsa bana ba bangwe ba ga Kohathe e ne e le some le dintlhana tsa yone.

₂₇Ba naya bana ba ga Gerešome le ba ditshika tsa Balefi, ba ba naya Golane mo Bašane, le dintlhana tsa teng, motse wa botshabelo jwa mmolai wa motho, e le wa bontlhanngwe jwa lotso lwa Manase; le Beešetera le dintlhana tsa teng; metse e le mabedi. ₂₈Mo lotsong lwa Isakare, Kišione le dintlhana tsa gone, Daberathe le dintlhana tsa gone; ₂₉Jaremuthe le dintlhana tsa teng, Eneganime le dintlhana tsa teng; metse e le mene. ₃₀Mo lotsong lwa Ašere, Mišale le dintlhana tsa teng, Abetone le dintlhana tsa teng; ₃₁Helekathe le dintlhana tsa gone, le Rehobe le dintlhana tsa gone; metse e le mene. ₃₂Mo lotsong lwa Nafetali, Keteše mo Galilea, le dintlhana tsa teng, motse wa botshabelo jwa mmolai wa motho, le Hamothetore le dintlhana tsa teng, le Karetane le dintlhana tsa teng; metse e le meraro. ₃₃Metse yotlhe ya Bagerešone ka fa ditshikeng tsa bone e ne e le metse e le 13, ka dintlhana tsa yone.

₃₄Ditshika tsa bana ba ga Merari, ba ba setseng ba Balefi, mo lotsong lwa ga Sebulone ba newa Jokeneame le dintlhana tsa teng, le Kareta le dintlhana tsa teng. ₃₅Dimena le dintlhana tsa gone, Nahalale le dintlhana tsa gone; metse e le mene. ₃₆Mo lotsong lwa Rubene, Besere le dintlhana tsa gone, le Jahase le dintlhana tsa gone. ₃₇Ketemothe le dintlhana tsa teng, le Mefaathe le dintlhana tsa teng; metse e le mene. ₃₈Mo lotsong lwa ga Gate, Ramothe mo Gileate, le dintlhana tsa gone, motse wa botshabelo jwa mmolai wa motho, le Mahanaime le dintlhana tsa gone; ₃₉Hešebone le dintlhana tsa teng; Jasere le dintlhana tsa teng: metse e le mene fa e le mmogo. ₄₀Metse eo yotlhe e ne e le metse ya bana ba ga Merari ka fa ditshikeng tsa bone, e bong ditshika tse di setseng tsa Balefi; kabelo ya taolelo ya bone e ne e le metse e le 12.

₄₁Metse yotlhe ya Balefi, mo gare ga thuo ya bana ba Iseraele e ne e le metse e le 48 le dintlhana tsa yone. ₄₂Metse eo yotlhe e ne e na le dintlhana tsa yone mo tikologong ya yone; go ne go ntse jalo le metse eo yotlhe fela.

₄₃Jalo Jehofa a naya Iseraele lefatshe lotlhe le o ikanneng fa a tlaa le naya borraabo; mme ba le rua, ba aga mo go lone. ₄₄Jehofa a ba naya boikhutso mo tikologong ya bone, jaaka tsotlhe tse o ne a di ikanetse borraabo; mme ga se ka ga ema motho ope wa baba ba bone botlhe fa pele ga bone; Jehofa a tsenya baba botlhe ba bone mo seatleng sa bone. ₄₅Ga se ka ga tlhaela sepe sa se se molemo se Jehofa o ne a se buile le ntlo ya Iseraele; ga dirala gotlhe fela.