JOŠUA 6

₁Jaana Jeriko o ne o tswaletswe ruri thata ka ntlha ya bana ba Iseraele, go ne go sa tswe ope, go sa tsene ope. ₂Jehofa a raya Jošua, a re: “Bona, ke tsentse Jeriko mo seatleng sa gago, le kgosi ya gone, le banna ba diganka ba ba nonofileng. ₃Lo dikologe motse, batlhabani botlhe ba ntwa ba potonoge motse gangwe fela. O dire jalo ka malatsi a le marataro. ₄Baperesiti ba supa ba tsamaye fa pele ga letlole ba tshotse diphala di supa tsa dinaka tsa diphelefu; e tlaa re ka tsatsi la bosupa lo potonoge motse gasupa, mme baperesiti ba letse dinaka. ₅Go tlaa dirala, go re fa ba gelebetla ka boleele ka dinaka tsa diphelefu, mme fa lo utlwa modumo wa dinaka, a batho botlhe, ba thele lošalaba lo logolo; mme lorako lwa motse lo tlaa salalagana fela, batho ba tlaa palama, mongwe le mongwe fa go lebaganyeng nae.”

₆Jošua morwa Nune a bitsa baperesiti, a ba raya a re: “Tsholetsang letlole la kgolagano, baperesiti ba supa ba tsamaye fa pele ga letlole la ga Jehofa ba tshotse diphala di supa tsa dinaka tsa diphelefu.” ₇A raya batho a re: “Fetang lo dikologe motse, batho ba ba tlhometseng ba fetele fa pele ga letlole la ga Jehofa.”

₈Ga nna jalo, go re, e rile Jošua a sena go bua le batho, baperesiti ba supa ba ba tsotseng diphala di supa tsa naka tsa diphelefu fa pele ga Jehofa, ba feta ba letsa dinaka; mme letlole la kgolagano ya ga Jehofa la ba sala morago.

₉Banna ba ba tlhometseng ba ya fa pele ga baperesiti ba ba letsang diphala, tshimega ya sala letlole morago, baperesiti ba re ba tsamaya ba bo ba ntse ba letsa diphala. ₁₀Mme Jošua a laola batho, a re: “Lo se ka lwa thela lošalaba, le fa e le go ntsha lentswe, le fa e le lefoko lepe le se ka la tswa mo molomong wa lona, go tsamaya letsatsi le tla, le ke tlaa lo rayang ka lone, ke re: ‘Thelang lošalaba;’ foo lo tlaa thela lošalaba.” ₁₁Jalo letlole la ga Jehofa a le potonosa motse gangwe fela; mme ba tla mo bothibelelong, ba lala mo bothibelelong.

₁₂Jošua a phakela le baperesiti, ba tsaya letlole la ga Jehofa. ₁₃Baperesiti ba supa ba ba tshotseng diphala di supa tsa dinaka tsa diphelefu fa pele ga letlole la ga Jehofa, ba tswelela fela ba ntse ba letsa diphala, banna ba ba tlhometseng ba ba etelela pele; tshimega ya sala letlole la ga Jehofa morago, baperesiti ba feta ba letsa diphala. ₁₄Ba potonoga motse gangwe fela ka tsatsi la bobedi, ba boela mo bothibelelong; ba dira jalo ka malatsi a le marataro.

₁₅Ga dirala ya re ka letsatsi la bosupa ba phakela thata ka makuku, ba potonoga motse gasupa ka mokgwa oo fela; fa e se go re ka tsatsi leo ba potonoga motse gasupa. ₁₆Ga dirala ya re ka lwa bosupa ka baperesiti ba letsa dinaka, Jošua a raya batho, a re: “Thelang lošalaba; gonne Jehofa o lo neile motse. ₁₇Motse a o neelelwe, e bong one le tsotlhe tse di mo go one, a o neelelwe Jehofa; Rahabe seaka ke ene esi yo o tlaa tshelang, ene le botlhe ba o nang nabo mo ntlong, ka a fitlhile barongwa ba re ne re ba romile. ₁₈Lona, le gale lo ikefe mo go se se neeletsweng, e se ka ya re lo sena go se neelela, lwa tsaya ga se se neeletsweng; jalo lwa dira bothibelelo jwa Iseraele go hutsega, mme lwa bo kgobera. ₁₉Mme selefera sotlhe le gouta, le dilwana tsa kgotlho le tsa tshipi, di boitshepelo Jehofa, di tlaa tla mo polokelong ya ga Jehofa.”

₂₀Jalo batho ba thela lošalaba, le baperesiti ba letsa dinaka: ga dirala, ya re batho ba utlwa modumo wa phala, batho ba thela lošalaba lo logolo, lorako lwa salalagana, mme batho ba palamela mo motseng, mongwe le mongwe fa go lebaganyeng nae, ba thopa motse. ₂₁Ba senyetsa ruri dilo tsotlhe tse di mo motseng, monna le mosadi, lekau le motsofe, kgomo le sehutshane le esela, ba di senya ka bojetla jwa tšhaka.

₂₂Jošua a raya banna ba babedi ba ba neng ba tlhola lefatshe, a re: “Tsenang mo ntlong ya seaka lo ntshe mosadi teng, le tsotlhe tse o nang natso, jaaka lo mo ikanetse.” ₂₃Makau, e bong ditlhola, a tsena, a ntsha Rahabe, le rraagwe, le mmaagwe, le bana ba ga rraagwe, le tsotlhe tse o ne a na natso, le botlhe ba losika lwa gagwe, ba ba ntshetsa kwa ntle, ba ba baya kwa ntle ga bothibelelo jwa Iseraele. ₂₄Ba fisa motse ka molelo, le tsotlhe tse di mo go one; fa e se selefera le gouta, le dilwana tsa kgotlho, le tsa tshipi, tsone ba di tsenya mo polokelong ya ntlo ya ga Jehofa. ₂₅Mme Rahabe seaka, le ba ntlo ya ga rraagwe, le tsotlhe tse o ne a na natso, Jošua a di tshedisa; mme mosadi o sa le a aga mo gare ga Iseraele, nako ke eno, ka a ne a fitlha barongwa ba Jošua o kileng a ba roma ba ya go tlhola Jeriko.

₂₆Jošua a ba laya ka ikano ka baka loo, a re: “Go hutsegile motho fa pele ga Jehofa, yo o tlaa emang a aga motse wa Jeriko, o tlaa swelwa ke motsalwapele wa gagwe a thaya motheo wa one, mme o tlaa swelwa ke morwawe yo mmotlana a tlhoma ditswalo tsa one.”

₂₇Mme Jehofa a nna le Jošua jalo, mme tumedi ya gagwe ya nna mo lefatsheng lotlhe fela.