JOŠUA 7

₁Mme bana ba Iseraele ba tlola ka ga se se neeletsweng; gonne Akane morwa Karemi, morwa Sabedi, morwa Sera, wa lotso lwa Juta, a tsaya ga sone se se neeletsweng; mme bogale jwa ga Jehofa jwa tukela bana ba Iseraele.

₂Jošua a ntsha banna kwa Jeriko a ba roma kwa Ai, o o fa Bethafene, go pota Bethele ka fa botlhabatsatsi, a bua nabo, a re: “Yang go tlhola lefatshe.” Banna ba, ba ya ba tlhola Ai. ₃Ba boela kwa go Jošua, ba mo raya ba re: “A batho ba se ye botlhe; go ye batho e ka ne e le ba le makgolo a a masome mabedi, kgotsa a a masome mararo, ba ye go kgemetha Ai; o se ka wa lapisa batho botlhe ka go ba bololetsa gone; gonne ba bannyennyane fela.” ₄Ga ya teng e ka ne e le batho ba le makgolo a le masome mararo; mme ba tshaba fa pele ga banna ba Ai. ₅Banna ba Ai ba ba bolaya e ka ne e le batho ba le masome a mararo le borataro; ba ba leleka go tswa fa pele ga kgoro, go ya fela kwa Shebarime, ba ba bolaela fa phologong; mme dipelo tsa batho tsa tlhapologa, tsa nna jaaka metsi fela.

₆Jošua a ikgagola diaparo, a wela ka sefatlhogo fa fatshe fa pele ga letlole la ga Jehofa go ya maitseboeng, ene le bagolwane ba Iseraele; ba baya lorole mo ditlhogong tsa bone. ₇Jošua a re: “Ijoo, Morena Modimo, ana batho o ba kgabagantsheditseng Joretane, go tla go re tsenya mo diatleng tsa Baamore, go re nyeletsa? A bo re ka bo re itumeletse fela go nna kwa moseja ga Joretane. ₈Morena ke tlaa reng, ka e le fa Baiseraele ba neile baba ba bone dikotla fela! ₉Gonne Bakanana le banni botlhe ba lefatshe ba tlaa utlwa, mme ba tlaa re dika, ba tlaa kgaola leina la rona mo lefatsheng; mme leina la gago le legolo o tlaa le direla jang?”

₁₀Jehofa a raya Jošua, a re: “Nanoga, o wetseng jalo ka sefatlhogo fa fatshe? ₁₁Iseraele o leofile; ee, ba tlodile kgolagano ya me e ke e ba laoletseng; ee, ba tshotse ga se se neeletsweng; ba bile ba utswile, ba itimokantse, ba bile ba se tsentse mo thotong ya bone. ₁₂Ke gone ka fa bana ba Iseraele ba retelelwang ke go ema fa pele ga baba ba bone ka gone, ba naya baba ba bone dikotla, gonne ba hutsegile; ga nketla ke tlhola ke nna le lona, fa lo sa senye se se neeletsweng sa tswa mo lona. ₁₃Nanoga, o itshepise batho, o re: ‘E re ka moso lo bo lo iitshepisitse; gonne Jehofa Modimo wa Iseraele o bua jaana, a re: Go na le se se neeletsweng mo gare ga gago wena Iseraele; ga o kake wa ema fa pele ga baba ba gago, go tsamaya lo tlosa se se neeletsweng mo gare ga lona pele. ₁₄Ke gone e tlaa re ka moso lo tlaa atamediwa ka ditso tsa lona; go tlaa dirala go re lotso lo Jehofa o tlaa lo tsayang lo tlaa atamela ka ditshika; mme losika lo Jehofa o tlaa lo tsayang lo tlaa atamela ka dikgotla; mme ba kgotla e Jehofa o tlaa e tsayang ba tla atamela monna le monna. ₁₅Go tlaa dirala go re, yo o tlaa tsewang a na le se se neeletsweng o tlaa fisiwa ka molelo, ene le tsotlhe tse o nang natso; ka a tlodile kgolagano ya ga Jehofa, le ka gonne a dirile bosilo mo Iseraele.’ ”

₁₆Jalo Jošua a phakela, a atametsa Baiseraele ka ditso tsa bone; mme ga tsewa lotso lwa Juta; ₁₇a atametsa losika lwa ga Juta; a tsaya losika lwa Basera: a atametsa losika lwa Basera, monna le monna; ga tsewa Sabedi; ₁₈a atametsa ba kgotla ya gagwe monna le monna; ga tsewa Akane morwa Karemi, morwa Sabedi, morwa Sera, wa lotso lwa Juta. ₁₉Jošua a raya Akane, a re: “Morwaaka, a ko o galaletse Jehofa Modimo wa Iseraele, o mo ipolelele; le nna o mpolelele se o se dirileng; o se ka wa ntobela.”

₂₀Akane a araba Jošua, a re: “Ruri ke leofetse Jehofa, Modimo wa Iseraele, ke dirile jaana le jaana: ₂₁Ke rile ke bona mo thopong kobo nngwe e ntle ya Sebabilone, le dikilokerame di ka nna 2,3 tsa selefera, le kgapetla ya gouta e le bokete jwa dikilokerame di ka nna 0,6, ka di eletsa, ka di tsaya; mme bona, di fitlhilwe mo mmung mo gare ga mogope wa me, le selefera fa tlase ga one.”

₂₂Jalo Jošua a roma batho, ba sianela kwa mogopeng; ba fitlhela go fitlhilwe mo mogopeng wa gagwe, le selefera kwa tlase. ₂₃Ba di ntsha mo gare ga mogope, ba di isa kwa go Jošua, le kwa baneng botlhe ba Iseraele; ba di baya fa pele ga Jehofa. ₂₄Jošua, a na le Baiseraele botlhe, ba tsaya Akane morwa Sera, le selefera, le kobo, le kgapetla ya gouta, le bomorwawe, le bomorwadie, le dikgomo tsa gagwe, le diesela tsa gagwe, le dinku tsa gagwe, le mogope wa gagwe, le tsotlhe tse o ne a na natso: ba di isa kwa molapong wa Akore. ₂₅Jošua a re: “Ana, o ne o re huduelang? Jehofa o tlaa go hudua gompieno.” Baiseraele botlhe ba mo kgobotletsa ka maje, ba ba fisa ka molelo, ba ba kgobotletsa ka maje. ₂₆Ba koela mo godimo ga gagwe mokoa o mogolo wa maje o o gone le gompieno; mme Jehofa a faposa phiso ya bogale jwa gagwe. Ke gone ka moo leina la felo foo le bidiwang go twe, Molapo wa ga Akore, le gompieno.