LEFITIKO 14

₁Jehofa a bua le Moše a re: ₂“O, e nne one molao wa molepero mo tsatsing la go itshekisiwa ga gagwe, a a isiwe kwa moperesiting: ₃A moperesiti a tswele kwa ntle ga bothibelelo, mme moperesiti a lebe, mme fa a fitlhela sebetso sa lepero se fodile mo moleperong, ₄foo moperesiti a laole gore go tseelwe ene yo o itshekisiwang dinonyane di le pedi, tse di utlwang, tse dintle, le logong lwa mosetara, le bohibidu jo bo letlhololo le mosiama; ₅moperesiti a laole gore go bolawe nonyane e nngwe, e bolaelwe mo sejaneng sa letsopa se okame metsi a a elang. ₆Ka ga nonyane e e utlwang, a a e tseye, le logong lwa mosetara, le bohibidu jo bo letlhololo, le mosiama, a di ine le nonyane e e utlwang mo mading a nonyane e e bolailweng e okame metsi a a elang; ₇a a kgatshe gasupa mo go ene yo o itshekisiwang lepero, mme a mmolele gore o itshekile, a lese nonyane e e utlwang e ye kwa nageng. ₈Ene yo o itshekisiwang a a tlhatswe diaparo tsa gagwe, a ipeole gotlhe, a tlhape mo metsing, mme o tlaa itsheka; morago ga moo a tsene mo bothibelelong, a nne kwa ntle ga mogope wa gagwe ka malatsi a supa. ₉Go tlaa dirala ka letsatsi la bosupa, a ipeole tlhogo yotlhe, le ditedu, le dintshi, ke gore, a ipeole gotlhe fela, a tlhatswe diaparo tsa gagwe, a itlhapise mmele mo metsing, mme o tlaa itsheka.

₁₀“Ka letsatsi la bo 8 a a tseye dikwanyana tse ditonanyana di le pedi tse di se nang bogole, le kwanyana e namagatsanyana ya ngwaga wa ntlha e e se nang bogole, le emere ya setou, e e reng e kgaogantswe sesome a tseye dikgaogano di le tharo, e le tshupelo ya boupe, go tlhakanye le lookwane, le lookwane lo le selekanyo sa sekgotswanyana se le sengwe fela. ₁₁Moperesiti yo o mo itshekisang, a a emise motho yo o itshekisiwang fa pele ga Jehofa, a na le dilo tseo, fa mojakong wa mogope wa bophuthegelo. ₁₂Moperesiti a tseye nngwe ya dikwanyana tse ditonanyana, a e ise e le tshupelelo ya molato, e na le sekgotswanyana sa lookwane; a a di fokise fa pele ga Jehofa e le tshupelo ya mofoko. ₁₃A a tlhabele kwanyana e tonanyana mo felong fa ba tleng ba tlhabele tshupelelo ya boleo gone, le tshupelo e e fisiwang mo felong ga boitshepo, gonne jaaka tshupelelo ya boleo e le ya moperesiti, tshupelelo ya molato le yone e ntse jalo, e boitshepo jo bo itshepileng. ₁₄Moperesiti a tseye ga madi a tshupelelo ya molato, mme a moperesiti a a beye fa ntlheng ya tsebe ya ka fa tsogong le legolo la gagwe yo o itshekisiwang, le mo monwaneng o motona wa letsogo le legolo, le mo monwaneng o motona wa lonao lwa ka fa tsogong le legolo. ₁₅A moperesiti a tseye ga sekgotswanyana sa lookwane, a thele mo khuting ya seatla sa gagwe sa molema. ₁₆A moperesiti a ine monwana wa letsogo le legolo mo lookwaneng lo lo mo seatleng sa gagwe sa molema, a mathe lookwane gasupa fa pele ga Jehofa. ₁₇Ga lookwane lo lo setseng mo seatleng sa gagwe, a moperesiti a lo beye fa ntlheng ya tsebe ya ka fa tsogong le legolo la yo o itshekisiwang, le mo monwaneng o motona wa letsogo la gagwe le legolo, le mo monwaneng o motona wa lonao lwa gagwe lwa ka fa tsogong le legolo, mo godimo ga madi a tshupelelo ya molato. ₁₈Lookwane lo lo setseng mo seatleng sa moperesiti, a a lo thele mo tlhogong ya yo o itshekisiwang; mme moperesiti o tlaa mo direla tetlanyo fa pele ga Jehofa.

₁₉“A moperesiti a ise tshupelelo ya boleo, a direle ene yo o itshekisiwang tetlanyo ka ntlha ya boitshekologo jwa gagwe; morago ga moo a tlhabe tshupelo e e fisiwang. ₂₀A moperesiti a ise tshupelo e e fisiwang le tshupelo ya boupe mo sebesong; mme moperesiti o tlaa mo direla tetlanyo, mme o tlaa itsheka.

₂₁“Fa a humanegile, a retelelwa ke go ntsha bokalo, foo a tseye kwanyana e tonanyana e le nngwe fela, e le tshupelelo ya molato e e tlaa fokisiwang go mo direla tetlanyo, le emere ya setou e e reng e kgaogantswe sesome a tseye kgaogano ya bosome, e tlhakanye le lookwane e le tshupelo ya boupe, le sekgotswanyana sa lookwane, ₂₂le maphoi a le mabedi, kgotsa maebana a le mabedi, a o ka a bonang fela; lengwe e nne tshupelelo ya boleo, le lengwe e nne tshupelo e e fisiwang. ₂₃Ka tsatsi la bofera mebedi a di ise kwa moperesiting kwa mojakong wa mogope wa bophuthegelo, fa pele ga Jehofa, e le tsa go itshekisiwa ga gagwe. ₂₄A moperesiti a tseye kwanyana ya tshupelelo ya molato, le sekgotswanyana sa lookwane, mme a moperesiti a di fokise fa pele ga Jehofa e le tshupelo yo mofoko. ₂₅A tlhabe kwanyana ya tshupelelo ya molato, mme moperesiti a tseye ga madi a tshupelelo ya molato, a a beye fa ntlheng ya tsebe ya ka fa letsogong le legolo la yo o itshekisiwang, le mo monwaneng o motona wa letsogo la gagwe le legolo, le mo monwaneng o motona wa lonao lwa gagwe lwa ka fa tsogong le legolo. ₂₆A moperesiti a thele ga lookwane mo khuting ya seatla sa gagwe sa molema; ₂₇ga lookwane lo lo mo seatleng sa gagwe sa molema, a moperesiti a mathe gasupa fa pele ga Jehofa, ₂₈a moperesiti a beye ga lookwane lo lo mo seatleng sa gagwe sa molema fa ntlheng ya tsebe ya ka fa letsogong le legolo la gagwe yo o itshekisiwang, le mo monwaneng o motona wa lonao lwa gagwe lwa ka fa tsogong le legolo, fa go beilweng madi a tshupelelo ya molato teng. ₂₉Lookwane lo lo setseng mo seatleng sa moperesiti a lo thele mo tlhogong ya yo o itshekisiwang go mo direla tetlanyo fa pele ga Jehofa. ₃₀A a tseye lengwe la maphoi, kgotsa la maebana, ka fa o ka bonang ka teng fela; ₃₁fela ka fa o ka bonang ka gone, lengwe a le ise tshupelo e e fisiwang, e na le tshupelo ya boupe; moperesiti o tlaa mo direla tetlanyo fa pele ga Jehofa, e bong ene yo o itshekisiwang. ₃₂O ke one molao wa yo sebetso sa lepero se mo go ene, yo o retelelwang ke go bona se se tshwanetseng itshekiso ya gagwe.”

₃₃Jehofa a bua le Moše le Arone a re: ₃₄“E tlaa re lo sena go fitlha mo lefatsheng la Kanana le ke le lo nayang go nna boswa, fa ke tsenya sebetso sa lepero mo ntlong nngwe ya lefatshe la boswa jwa lona, ₃₅foo yo e leng mong wa ntlo a ye a bolelele moperesiti a re: ‘Ekete go na le sebetso mo ntlong ya me.’ ₃₆Moperesiti o tlaa laola gore ba ntshe dilo tsotlhe mo ntlong, moperesiti a ise a ye go bona sebetso, gore dilo tsotlhe tse di mo ntlong di se ka tsa nna itshekologo; morago ga moo moperesiti a tsene a ye go bona ntlo, ₃₇o tlaa leba sebetso, mme fa a fitlhela sebetso se le mo dimoteng tsa ntlo, se le mahutinyana a botalanyana, kgotsa a bohibitswana, se bonala ekete se kwa teng ga lomota, ₃₈foo a moperesiti a tswele kwa mojakong wa ntlo, mme a tswale ntlo ka malatsi a supa. ₃₉Moperesiti o tlaa ba a ya gape ka letsatsi la bosupa, mme o tlaa leba; fa a fitlhela sebetso se keketse le dimota tsa ntlo, ₄₀foo a moperesiti a laole gore ba ntshe maje a sebetso se leng mo go one, ba a latlhele mo felong gongwe ga boitshekologo, kwa ntle ga motse. ₄₁Mme o tlaa ba fadisa ntlo ka fa teng mo tikologong ya yone, mmu o ba o fadileng ba o latlhele kwa ntle ga motse mo felong gongwe ga boitshekologo. ₄₂A ba tseye maje a mangwe, ba a tsenye mo boemong jwa maje ao, mme a a tseye mmu o sele a batege ntlo dimota.

₄₃“Fa sebetso se tla gape, se kukunya mo ntlong, a sena go ntsha maje, le a sena go fala ntlo, le e sena go bategwa dimota; ₄₄foo moperesiti o tlaa ya a leba, mme fa a fitlhela sebetso se keketse mo ntlong, ke lepero le le garubang mo ntlong, e itshekologile. ₄₅A a rutle ntlo, maje a yone, le dikgong tsa yone, le mmu otlhe o o didileng ntlo, a ise gotlhe fela kwa ntle ga motse kwa felong gongwe ga boitshekologo. ₄₆Gape yo o tsenang mo ntlong ka lobaka lotlhe lo e tswadilweng ka lone o tlaa nna itshekologo go ya maitseboeng. ₄₇Yo o rapamang mo ntlong eo, a a tlhatswe diaparo tsa gagwe, le yo o jelang mo ntlong eo, a tlhatswe diaparo tsa gagwe.

₄₈“Fa moperesiti a tsena, a leba, a fitlhela sebetso se sa kekela mo ntlong, ntlo e sena go bategwa dimota, foo moperesiti o tlaa bolela ntlo gore e itshekile, gonne sebetso se fodile. ₄₉A a tseye dinonyane di le pedi, le logong lwa mosetara, le bohibidu jo bo letlhololo, le mosiama, go itshekisa ntlo ka tsone. ₅₀Nonyane e nngwe a e bolaele mo sejaneng sa letsopa se okame metsi a a elang. ₅₁A a tseye logong lwa mosetara, le mosiama, le bohibidu jo bo letlhololo, le nonyane e e utlwang, a di ine mo mading a nonyane e e bolailweng, le mo metsing a a elang, mme a kgatshe ntlo ga supa: ₅₂A a itshekise ntlo ka madi a nonyane, le ka metsi a a elang, le ka nonyane e e utlwang, le ka logong lwa mosetara, le ka mosiama, le ka bohibidu jo bo letlhololo. ₅₃Nonyane e e utlwang a e lese e tswe mo motseng, e ye kwa nageng; o tlaa direla ntlo tetlanyo jalo, mme e tlaa itsheka.

₅₄“O ke one molao wa sebetso sotlhe sa lepero, le wa sekwaba, ₅₅wa lepero la seaparo, le wa ntlo, ₅₆wa thurugo, le wa lobadi, le wa lesophi; ₅₇go ruta batho fa go leng boitshekologo, le fa go leng boitsheko; o ke one molao wa lepero.”