LEFITIKO 2

₁“Motlhang mongwe o isetsang Jehofa tshupelo ya boupe, tshupelo ya gagwe e nne ya setou; a thele lookwane mo go sone, a beye lebano mo go sone. ₂A a e lere kwa go bomorwa Arone, e bong baperesiti; a ene a tabole setou ka legofi, a tseye ga lookwane lwa sone, le lebano le le mmogo; a moperesiti a e fise, e le morafolo wa tsone tsotlhe mo sebesong, e le e e dirwang ka molelo, e e monko o monate mo go Jehofa. ₃Se se setseng sa tshupelo ya boupe a e nne sa ga Arone le bomorwawe; ke se se boitshepo jo bo itshepileng mo ditshupelong tsa ga Jehofa tse di dirwang ka molelo.

₄“Fa o isa seromololo sa boupe sa mo go besitsweng mo pesetsong, a e nne dipapetlana tsa dinkgwe tse di sa bedisiwang tsa setou se tlhakanye le lookwane, le dinkgwenyana tse di sa bedisiwang tse di lotsatsa, di tshasitswe lookwane.

₅“Fa seromololo sa gago e le tshupelo ya boupe sa pitsa e e besetsang a e nne sa setou se se sa bedisiwang, se tlhakanye le lookwane. ₆O se ngathoganye, o thele lookwane mo go sone; ke tshupelo ya boupe.

₇“Fa seromololo sa gago e le tshupelo ya boupe ya pitsa e e sepapetla e e gadikelang, a se dirwe ka setou le lookwane. ₈Tshupelo ya boupe e e dirilweng ka dilo tse, o e lere mo go Jehofa; e newe moperesiti, mme ene a e ise kwa sebesong. ₉A moperesiti a tabole mo tshupelong ya boupe morafolo wa yone, a o fisetse mo sebesong; ke tshupelo e e dirwang ka molelo, e e monko o monate mo go Jehofa. ₁₀Se se setseng sa tshupelo ya boupe a e nne sa ga Arone, le bomorwawe: ke selo se se boitshepo jo bo itshepileng mo ditshupelong tsa ga Jehofa, tse di dirwang ka molelo.

₁₁“A go se nne tshupelo epe ya boupe e e isediwang Jehofa, e e dubilweng ka sebediso; gonne ga lo ketla lo fisa sebediso sepe, le fa e le dinotshe, fa e le tshupelo e e direlwang Jehofa ka molelo. ₁₂Lo ka di isetsa Jehofa e le tshupelo ya mabutswapele, mme di se ka tsa nna mo sebesong go kuba monko o o monate. ₁₃Seromololo sengwe le sengwe sa tshupelo ya gago ya boupe, o se loke ka letswai, le gone letswai la kgolagano ya Modimo wa gago o se ka wa le lesa la tlhokafala mo tshupelong ya gago ya boupe; o tle o ise letswai le diromololo tsotlhe tsa gago.

₁₄“Fa o isetsa Jehofa tshupelo ya boupe jwa mabutswapele, a e nne ya mabele a a babotsweng ka molelo, a le mo seakong se seša, a thugilwe. ₁₅O thele lookwane mo go one, le lebano o le beye mo go one; ke tshupelo ya boupe. ₁₆Moperesiti a fise morafolo wa tsone, botlhanngwe jwa mabele a a thugilweng a one, le bontlha e nngwe jwa lookwane lwa one, le lebano la one le le mmogo, ke tshupelo e e direlwang Jehofa ka molelo.