LUKE 13

₁Jaana e rile ka lobaka loo ga bo go le bangwe teng, ba molelela ka ga Bagalilea, ba madi a bone Pilato o a tlhakantseng le ditlhabelo tsa bone. ₂Mme Jesu a ba fetola a re: “A lo itlhoma gore Bagalilea bao e ne e le baleofi bogolo go Bagalilea botlhe, ka ba bogile dilo tse? ₃Ke a lo raya, nnyaa; fa lo sa ikwatlhaye, le lona lotlhe lo tlaa nyelela fela jalo. ₄Kgotsa ba ba 18 bale, ba kago e e godileng e ba wetseng, ya ba bolaya mo Siloame, a lo itlhoma gore e ne e le baleofi go feta batho botlhe ba ba agileng mo Jerusalema? ₅Ke a lo raya, nnyaa; fa lo sa ikwatlhaye, le lona lotlhe lo tlaa nyelela fela jalo.”

₆A bua setshwantsho ke se, a re: “Monna mongwe o ne a na le setlhare sa mofeige se tlhomilwe mo tshimong ya gagwe ya mafine; mme a tla go batla loungo mo go sone, mme a se ka a fitlhela sepe. ₇A raya mmaakanyi wa mafine a re: ‘Bona, dinyaga tse tharo tse, ke ntse ke tla go batla loungo mo setlhareng se, sa mofeige, mme ke sa fitlhele sepe; a se rengwe; se bile se emeletseng lefela mo mmung?’ ₈A mo fetola a re: ‘Morena, a ko o se lese le ka ngwaga ono, ke tle ke se lemele, ke se tsenye motshotelo. ₉E tlaa re fa se ungwa go tlaa nna molemo; fa go sa nne jalo, foo o tlaa itse go se rema.’ ”

₁₀Ya re ka letsatsi la Sabata a bo a ruta mo go nngwe ya matlo a thuto. ₁₁Bonang, ga bo go le motsadi mongwe yo o sa leng a tsenwa ke mowa wa seemera, ka dinyaga di le 18; mme a bo a hutaganye; a sa ka ke a ikinamolola ka gope. ₁₂Mme Jesu ya re a mmona, a mmitsa, a mo raya a re: “Mosadi, o golotswe mo seemereng sa gago.” ₁₃Mme a baya diatla tsa gagwe mo go ene, mme a siamisiwa fela ka bonako; mme a galaletsa Modimo.

₁₄Molaodi wa ntlo ya thuto ka a gakaditswe ke Jesu, ka a fodisitse ka letsatsi la Sabata, a raya batho a re: “Go malatsi a le marataro a batho ba tshwanetseng go dira ka one; ke gone tlang lo fodisiwe ka one, e seng ka letsatsi la Sabata.” ₁₅Mme Morena a mo fetola a re: “Baitimokanyi ke lona, a le mongwe le mongwe wa lona a e a re go le letsatsi la Sabata a golole kgomo ya gagwe le esela ya gagwe mo ntlong ya yone, a e goge a ye go e nosa? ₁₆Mosadi yo e le morwadia Aberahame, yo Satane o sa le a mo golega ka dinyaga di le 18, a ga a a tshwanelwa ke go gololwa mo kgoleng e, ka letsatsi la Sabata?” ₁₇Ya re a sena go bua dilo tse, baganetsi botlhe ba gagwe ba tlhabisiwa ditlhong; mme bontsi jotlhe jwa batho jwa itumela, ka ntlha ya dilo tsotlhe tsa kgalalelo tse di dirilweng ke ene.

₁₈Ke gone o ba reileng a re: “Ana bogosi jwa Modimo bo tshwana le eng? Mme ke tlaa bo tshwantsha ka eng? ₁₉Bo tshwana le tlhaka ya peo ya mosetara, e motho o ne a e tsaya, a e latlhela mo tshimong ya gagwe; mme ya gola, ya tswa setlhare: dinonyane tsa loapi tsa aga mo dikaleng tsa sone.”

₂₀Gape a re: “Ke tlaa tshwantsha bogosi jwa Modimo ka eng? ₂₁Bo tshwana le sebediso se mosadi o ne a se tsaya, a se tsenya mo dielong di le tharo tsa boupi, ga tsamaya jwa bela jotlhe fela.”

₂₂A nna a tsamaya a ralala metse le metsana, a ruta, a ntse a etela kwa Jerusalema. ₂₃Mongwe a mo raya a re: “Morena, ba ba bolokwang a ba ba botlana?” Mme a ba raya a re: ₂₄“Ganelang go tsena ka kgoro e e pitlaganyeng; gonne ke a lo raya, bantsi ba tlaa batla go tsena, mme ba tlaa retelelwa. ₂₅E tlaa re fa mong wa ntlo a setse a nanogile, mme a tswadile ntlo, mme lo simolola go ema ka fa ntle, lo kgwanyakgwanya setswalo, lo re: ‘Morena, Morena, re bulele;’ mme fa a lo fetola a re: ‘Ga ke lo itse kwa lo tswang teng;’ ₂₆e dira gone lo tlaa simololang go re: ‘Re kile ra ja ra nwa fa pele ga gago, mme o ne wa ruta mo mebileng ya rona.’ ₂₇Mme ene o tlaa re: ‘Ke a lo bolelela, ga ke lo itse kwa lo tswang teng; ntlogelang lona lotlhe badiri ba tshiamololo.’ ₂₈Go tlaa nna selelo le phuranyo ya meno, mogang lo bonang Aberahame le Isake, le Jakobe, le baperofeti botlhe mo bogosing jwa Modimo, mme lona lo kgoromeleditswe kwa ntle. ₂₉Mme ba tlaa tswa kwa botlhabatsatsi, le kwa bophirimatsatsi, le kwa botsheka le kwa borwa, mme ba tlaa dula mo bogosing jwa Modimo. ₃₀Bonang, go na le ba morago ba ba tlaa nnang ba pele, go bile go na le ba pele ba ba tlaa nnang ba morago.”

₃₁Ya re ka nako eo fela, ga tla bangwe ba Bafarisai, ba mo raya ba re: “Tswa mono o tsamaye, gonne Herote o rata gobo a ka go bolaya.” ₃₂Mme a ba raya a re: “Yang lo reye phokoje eo lo re: Bona, ke kgoromeletsa mewa e e maswe ntle, ke fodisa gompieno le ka moso, mme e tlaa re ka letsatsi la boraro ke be ke dirwa boitekanelo. ₃₃Le fa go ntse jalo ke na le go tswelela pela gompieno le ka moso, le ka moso o mongwe; gonne ga go ka ke ga nna go re moperofeti o ka swela kwa ntle ga Jerusalema.

₃₄“Jerusalema we! Jerusalema we! Wena yo o bolayang baperofeti, o kgobotletsa ka maje ba ba rongwang kwa go wena; ke ka bo ke phuthile bana ba gago mmogo gantsi jang, jaaka koko e tle e phuthele mamphorwana a yone mo diphukeng tsa yone, mme lo ganne. ₃₅Bona, ntlo ya lona lo e tlogeletswe e le letlotla fela; ammaaruri ke a lo raya, ga lo ketla lo tlhola lo mpona, go tle go tsamaye lobaka lo tle, lo lo tlaa buang ka lone, lo re: ‘Go bakwe ene yo o tlang mo ineng la Morena.’ ”