LUKE 9

₁A phutha ba ba 12, a ba naya thata le taolo go laola mewa e e maswe yotlhe, le go fodisa malwetse. ₂A ba roma gore ba ye go rera bogosi jwa Modimo, le go fodisa ba ba lwalang. ₃A ba raya a re: “Lo se ka lwa tseela loeto lwa lona sepe, le fa e ka nna thobane, le fa e le kuana, le fa e le senkgwe, le fa e le madi; le gone a go se nne ope wa lona yo o tsayang dikobo di le pedi. ₄Ntlo e lo tsenang mo go yone, le fa e ka nna efe, lo nne teng; e be e nne yone e lo tswang mo go yone fa lo tsamaya. ₅Le fa e le bomang ba ba sa lo tsholeng, e re lo tswa mo motseng oo, lo itlhotlhore lorole mo dinaong tsa lona, go nna tshupo ka ga bone.”

₆Ba tsamaya; ba ralala metsana, ba rera Mafoko a a Molemo, ba ba ba fodisa balwetse mo ntlheng tsotlhe.

₇Jaana kgosana Herote a utlwa ka ga dilo tsotlhe tse di dirilweng ke ene; mme a akabala thata, gonne bangwe ba re: “Johane o tsogile mo losong.” ₈Ba bangwe ba re: “Elija o bonetse,” mme ba bangwe ba re: “Mongwe wa baperofeti ba bogologolo o bile o tsogile.” ₉Herote a re: “Johane ke mo kgaotse tlhogo; mme yo ke utlwang dilo tse di ntseng jaana ka ga gagwe, ya bo e le mang?” Mme a eletsa go mmona.

₁₀E rile baaposetole ba sena go boa, ba mmolelela dilo tse ba di dirileng. A ba tsaya, ba ngongwaelela kwa thoko ba le bosi, kwa motseng o o bidiwang Bethesaita. ₁₁Ya re batho ba bantsi ba sena go lemoga ba mo latela; a ba tshola a bua nabo ka ga bogosi jwa Modimo, a fodisa ba ba tlhokang phodiso.

₁₂Ya re letsatsi le simolola go fefa, ba ba 12 ba tla kwa go ene, ba mo raya ba re: “Phatlalatsa bontsi jo, jwa batho, gore ba ye kwa metseng le kwa metsaneng mo ntlheng tsotlhe, ba robale teng, ba bone dijo; gonne fano re mo gare ga naga fela.”

₁₃A ba raya a re: “Lona lo ba fe, ba je.” Mme ba re: “Ga re na sepe, fa e se dinkgwe di le tlhano le ditlhapi di le pedi; fa e se fela re ka ya go rekela batho botlhe ba dijo.” ₁₄Gonne go ne go le banna e ka ne e le ba le 5 000. A raya barutwa ba gagwe gore ba dudise batho fa fatshe ka masomo, lesomo lengwe le lengwe batho ba nne 50.

₁₅Ba dira jalo ba ba dudisa botlhe. ₁₆Mme a tsaya dinkgwe tse tlhano, le ditlhapi tse pedi, a lelalela legodimong a di segofatsa, a di ngathoganya, a di neela barutwa go di baya fa pele ga batho. ₁₇Ba ja, ba kgora botlhe; mme ga selwa dikabetla tse ba di siileng, diroto di le 12.

₁₈Ga dirala ya re a rapela a le esi, barutwa ba gagwe ba bo ba na nae; mme a ba botsa a re: “Batho ba tle ba re nna ke mang?”

₁₉Ba mo fetola ba re: “Johane Mokolobetsi; bangwe ba re: Elija; ba bangwe ba re: mongwe wa baperofeti ba bogologolo o bile o tsogile.”

₂₀A ba raya a re: “Lona lwa re ke mang?” Petere a mo fetola a re: “O Keresete wa Modimo.”

₂₁A ba laya thata, a ba laola gore ba se bolelele ope selo seo; ₂₂a re: “Morwa Motho o na le go boga dilo di le dintsi, le go ganwa ke bagolwane le ke ditlhogo tsa baperesiti, le bakwadi, mme o tlaa bolawa, a ba a tsosiwa ka letsatsi la boraro.”

₂₃A raya botlhe a re: “Fa motho mongwe a rata go ntshala morago a a iitatole, a tseye mokgoro wa gagwe ka malatsi otlhe, mme a ntshale morago. ₂₄Gonne le fa e le mang yo o ratang a ka bo a boloka botshelo jwa gagwe bo tlaa mo latlhegela; mme le fa e le mang yo o tlaa latlhegelwang ke botshelo jwa gagwe ka ntlha ya me, yoo o tlaa bo boloka. ₂₅Gonne motho o a ba a ka thusega eng, fa a fenya lefatshe lotlhe, mme ene ka sebele sa gagwe a itimetsa, kgotsa a itatlha? ₂₆Gonne le fa e le mang yo o tlaa ntlhabelwang ke ditlhong, le mafoko a me a a tlhabelwa ke ditlhong, Morwa Motho o tlaa tlhabisiwa ditlhong ke ene, mogang o tlang ka kgalalelo ya gagwe, le ya ga rraagwe, le ya baengele ba ba boitshepo. ₂₇Ke lo bolelela ruri gore go na le bangwe ba bone ba ba emeng fa, ba ba se ketlang ba utlwa loso, ba ise ba bone bogosi jwa Modimo.”

₂₈Ga dirala ya re e ka ne e le malatsi a 8 morago ga mafoko a, a tsaya Petere, le Johane le Jakobe, a tlhatlogela mo thabeng, a ya go rapela. ₂₉Ya re a sa ntse a rapela, tshwano ya sefatlhogo sa gagwe ya fetoga, le diaparo tsa gagwe tsa sweufala, e le bosweu jo bo fatlhang. ₃₀Mme bonang, ga bua nae banna ba le babedi, e le Moše le Elija; ₃₁ba bonala ba le mo kgalalelong, mme ba bua ka ga go swa ga gagwe mo o tlaa tlogang a go dirafatsa kwa Jerusalema. ₃₂Jaana Petere le ba o nang nabo ba bo ba fentswe ke boroko; ya re ba sena go tsoga, ba bona kgalalelo ya gagwe, le banna ba babedi ba ba emeng nae. ₃₃Ga dirala ya re ba kgaogana nae, Petere a raya Jesu a re: “Morena, go molemo go rona go nna fa; o mme re dire metlaagana e le meraro; mongwe e nne wa gago, mongwe e nne wa ga Moše, mongwe e nne wa ga Elija,” ka a sa itse se o se buang.

₃₄Mme ya re a sa ntse a bua jalo, ga tla leru la ba tshutifalela; mme ya re ba tsena mo lerung ba boifa. ₃₅Ga tswa lentswe mo lerung la re: “Yo ke Morwaake, (yo o rategang) moitshenkedwi wa me; utlwang ene.”

₃₆Mme ya re lentswe le khutla, Jesu a bonwa a le esi. Mme ba didimala fela, ba se ka ba bolelela ope mo malatsing ao sepe sa dilo tse ba di bonyeng.

₃₇Ga dirala ya re ka moso ba sena go fologa mo thabeng, bontsi jo bogolo jwa batho jwa mo kgatlhantsha. ₃₈Mme bonang, monna mongwe mo bontsing a goa a re: “Moruti, ke a go rapela, a ko o lebe morwaake; gonne ke ene ngwanake yo o esi. ₃₉Mme bona, mowa o tlo o mo tseye, mme re tshogane ka a goa, o mo tsibiketse, a phoke masulo, o mo tapete, o mo tlogele ka bothata. ₄₀Ke rapetse barutwa ba gago gore ba o kgoromeletse ntle; mme ba reteletswe.”

₄₁Jesu a fetola a re: “Ao, losika lo lo se nang tumelo, lo lo tlhogo e thata! Ke tlaa nna le lona lobaka lo lo kae ke iphapaanya le lona? Lere morwao kwano.”

₄₂Ya re a sa ntse a tla kwa go ene, mowa o o maswe wa mo piriganya, wa mo tsibiketsa mo go botlhoko. Jesu a kgalemela mowa o o maswe, a fodisa ngwana, a ba o mo neela rraagwe.

₄₃Botlhe ba gakgamadiwa ke tlotlomalo e kgolo ya Modimo. Ya re ba sa ntse ba gakgametse botlhe ka ga dilo tsotlhe tse Jesu o di dirileng, a raya barutwa ba gagwe a re: ₄₄“A mafoko a, a tsenelele mo ditsebeng tsa lona; gonne Morwa Motho o tlaa neelwa mo diatleng tsa batho.” ₄₅Mme ba se ka ba tlhaloganya lefoko le; ba le lobelwa gore ba se ka ba le lemoga; mme ba boifa go mmotsa ka ga lefoko leo.

₄₆Mme ga tsoga kgang mo go bone ya gore, yo o tlaa nnang mogolo mo go bone ke mang? ₄₇Ya re Jesu a bona mogopolo wa dipelo tsa bone, a tsaya ngwanyana, a mmaya fa go ene. ₄₈A ba raya a re: “Le fa e le mang yo o tlaa tsholang ngwanyana yo ka leina la me, o tshola nna; mme le fa e le mang yo o tlaa ntsholang, o tshola ene yo o nthomileng; gonne yo o leng mmotlana bogolo mo go lona, ke ene yo e leng mogolo.”

₄₉Johane a bua a re: “Morena re kile ra bona mongwe a kgoromeletsa mewa e e maswe kwa ntle ka leina la gago; mme ra mo itsa ka a sa go sale morago le rona.” ₅₀Jesu a mo raya a re: “Lo se ka lwa mo itsa; gonne yo o sa tlhabaneng le rona o ntlheng ya rona.”

₅₁Ga dirala e rile motlha o setse o atametse o a tlaa tsholediwang ka one, a lebanyetsa ruri sefatlhogo sa gagwe go ya Jerusalema. ₅₂A roma barongwa fa pele ga sefatlhogo sa gagwe; ba ya ba tsena mo motsaneng wa Basamaria go mo etleeletsa teng. ₅₃Mme ba se ka ba mo tshola, ka sefatlhogo sa gagwe se ntse jaaka e kete o ya Jerusalama. ₅₄Ya re barutwa ba gagwe, Jakobe le Johane, ba bona jalo ba re: “Morena, a o rata ra laola molelo wa fologa kwa legodimong wa ba laila?” ₅₅Mme a retologa, a ba omanya, (a re: “Ga lo ikitse gore lo ba mowa o o ntseng jang. ₅₆Gonne Morwa Motho ga a a tla go senya botshelo jwa batho fa e se go bo boloka fela.”) Mme ba ya kwa motsaneng o sele.

₅₇Ya re ba ntse ba tsamaya mo tseleng, monna mongwe a mo raya a re: “Ke tlaa go sala morago gongwe le gongwe kwa o yang teng.”

₅₈Jesu a mo raya a re: “Diphokoje di na le mesima, le dinonyane tsa loapi di na le ditlhaga; mme Morwa Motho ene ga a na fa o ka itatsang tlhogo teng.”

₅₉A raya yo mongwe a re: “Ntshala morago.” Mme a re: “Morena, ntesa pele ke ye go fitlha rre.”

₆₀Jesu a mo raya a re: “Lesa baswi ba fitlhe baswi ba bone; mme wena tsamaya o utlwatse bogosi jwa Modimo.”

₆₁Yo mongwe le ene a re: “Morena, ke tla go sala morago, ntesa pele ke ye go dumedisa bone ba ba kwa gaetsho.”

₆₂Jesu a mo raya a re: “Ga go motho ope yo o ka reng a tshwere mogoma ka seatla, mme a šeba kwa morago, yo o ka tshwanelang bogosi jwa Modimo.”